عشقِ نبوی کیا ہے کونین کی دولت ہے

عشقِ نبوی کیا ہے کونین کی دولت ہے

یہ جس کو میسر ہے وہ صاحبِ قسمت ہے

دیدار خدا کا ہے دیدارِ محمد میں

ہے عرشِ بریں روضہ طیبہ مری جنت ہے

سب حسن کے جلووں نے تکمیل یہیں پائی

بندے میں خدائی ہے اللہ کی قدرت ہے

کس طرح گزرتی ہے کیا عرض کیا جائے

روشن شہِ والا پر سب حال حقیقت ہے

سرکار اکرم ہو گا پھر اس پہ کرم کیجیے

پھر آپ کا دیوانہ مشتاقِ زیارت ہے

بے مثل کو اپنا کس طرح کوئی سمجھے

اس برزخِ کبریٰ کو اللہ سے نسبت ہے

ٹلتی ہے قضا ان کی ابرو کے اشارے پر

ہر چشمِ کرم گویا اک آیۂ رحمت ہے

زاہد میں بتاؤں کیا الفاظ نہیں ملتے

سنگِ درِ جاناں پر سجدوں میں جو لذت ہے

بھولو نہ کہیں اپنے کاملؔ کو سرِ محشر

یہ بندۂ عاصی بھی محتاجِ شفاعت ہے