میرے دل کا چین آنکھوں کی بصارت ہیں بتول

میرے دل کا چین آنکھوں کی بصارت ہیں بتول

فکر و فن کی اور تصور کی طہارت ہیں بتول

صبر و استقلال، تقویٰ کے معانی جس میں ہیں

اس کتابِ زندگی کی شان و رفعت ہیں بتول

نازشِ شرم و حیا ہیں اور وفا کی تاجور

کنزِ ایماں بحرِ اخلاص و محبت ہیں بتول

تربیت جس سے ہوئی ہے شبر و شبیر کی

جانثاری کے سبق کی وہ عبارت ہیں بتول

اس لیے ہے اُن کے در پر آرزوؤں کا ہجوم

مرکزِ لطف و کرم بحرِ سخاوت ہیں بتول

بے زبانوں کی زباں ہیں غم کے ماروں کا بھرم

چارہ سازِ زخمِ دل تسکین و راحت ہیں بتول

دخترِ شاہ امم ہیں زوجۂ مولیٰ علی

مادرِ شبیر و شبر فخرِ جنت ہیں بتول

جس کو سن کر جاگ جائے اہلِ باطل کا ضمیر

جذبۂ ایثار کی ایسی ضمانت ہیں بتول

اس لیے دل پر نہیں ہے دوسرا کوئی بھی رنگ

شبر و شبیر کے پرچم کی رنگت ہیں بتول

لالہ زارِ مصطفیٰ میں جس سے آئی ہے بہار

وہ مقدس آبشارِ دین و سنت ہیں بتول

آدمی کو زندگی بھر جس کی رہتی ہے تلاش

دینِ حق کا وہ نشانِ استقامت ہیں بتول

اے خدا مہر و وفا سے لوگ خالی ہوگیے

بھیج دے پھر عہدِ حاضر کی ضرورت ہیں بتول

اس لیے خالدؔ حسابِ حشر کا کھٹکا نہیں

ہم گنہگاروں کی محشر میں ضمانت ہیں بتول