جس روپ میں بھی آئیں جلوہ ہے آپ ہی کا

جس روپ میں بھی آئیں جلوہ ہے آپ ہی کا

اب اس مقام پر ہے ذوق نظر کسی کا

حب علی نتیجہ ہے حسن آگہی کا

مولیٰ پہ جان دینا مقصد ہے زندگی کا

ہے زندگی ہماری سرکار ہی کے دم سے

دل کی ہر ایک دھڑکن صدقہ ہے آپ ہی کا

مشکل میں ربط ان سے فطرت کا اقتضا ہے

ہر ایک کی زباں پر نعرہ ہے یا علی کا

بے شک ہے ذات اس کی تسکین جان پاکاں

ہے نام جس کا حامل اک لطف معنوی کا

وہ مظہر العجائب سلطان ملک دل ہیں

ہر اہل دل کے دل پر قبضہ ہے آپ ہی کا

یا رب کبھی تو میں بھی پہنچوں در نجف تک

کب تک یہ دکھ اٹھاؤں اللہ نارسی کا

بے ربط زندگی اک بے روح زندگی ہے

وہ زندگی نہیں ہے دھوکا ہے زندگی کا

دنیائے عشق ساری جز واردات کیا ہے

کیا دخل اس جہاں میں تعلیل منطقی کا

قابل تو میں نہیں تھا اس فضل اس کرم کے

شکر خدا کہ میں بھی محسود ہوں کسی کا

قربان ان پہ جانے کتنوں کی زندگی ہے

جن کو اجل نے بخشا پروانہ زندگی کا

تکمیل عبدیت ہے کامل اسی میں اپنی

بندہ وہی خدا کا بندہ ہے جو علی کا