دم دما دم، دم علی کا فلسفہ کچھ اور ہے

دم دما دم، دم علی کا فلسفہ کچھ اور ہے

ہر گھڑی وردِ زباں ہے یہ نشہ کچھ اور ہے

جو علی سے بغض رکھے اس کی یہ پہچان ہے

سوچتا کچھ اور ہے اور بولتا کچھ اور ہے

جانشیں بھی بھائی بھی، داماد بھی اور دوست بھی

میرے آقا سے علی کا رابطہ کچھ اور ہے

مست بولے بارش عشق علی میں بھیگ کر

بوندا باندی اور، رحمت کی گھٹا کچھ اور ہے

وہ نمایاں ہو گیا جس نے لیا نامِ علی

جو علی کا ہو گیا اس کی جگہ کچھ اور ہے

چار یاروں میں علی کا مرتبہ کچھ اور تھا

خم کے منبر پر علی کا مرتبہ کچھ اور ہے

ہند کی مٹی سے الفت ٹھیک ہے اپنی جگہ

شہرِ مولیٰ کی ظفرؔ آب و ہوا کچھ اور ہے