وہ جن کی یاد میں محفل سجی سرکارِ جیلاں ہیں

وہ جن کی یاد میں محفل سجی سرکارِ جیلاں ہیں

وہ جن کے نام سے بگڑی بنی سرکارِ جیلاں ہیں

جمالِ حق کے ہیں مظہرِ نبی کے خلق کے پیکر

نشانِ فاطمہ جانِ علی سرکارِ جیلاں ہیں

سراپا تابعِ سنت عمل تفسیرِ قرآں کی

شرع کو زندگی جن سے ملی سرکارِ جیلاں ہیں

نگاہِ فیض سے قسمت ہزاروں کی بدل ڈالی

خدائے پاک کے ایسے ولی سرکارِ جیلاں ہیں

اندھیروں کے بھنور سے دور اپنی کشتی کردیں گے

ہماری آس جن سے ہے لگی سرکارِ جیلاں ہیں

حکومت عام ہے جن و بشر پر جن کی دنیا میں

ملے گا حشر میں رتبہ یہی سرکارِ جیلاں ہیں

کرم کر دیں وہ جس پر بیڑا اس کا پار ہو جائے

کروں کیوں فکر اپنے جرم کی سرکارِ جیلاں ہیں

اگر ہے ناز دنیا کو علوِ شان پر اپنی

مجھے بھی فخر ہے میرے وصی سرکارِ جیلاں ہیں

مجیبی خانقاہ روحانیت کا قلعہ ہے جس کی

عمارت کا ستونِ مرکزی سرکارِ جیلاں ہیں

شرابِ آیتی کی بے خودی پوچھے کوئی ہم سے

خمار و رنگ اور اس کی نمی سرکارِ جیلاں ہیں

رضائے نفس کا طالب نہ ہو سجادؔ تم ہرگز

مجیبی میکدہ میں کیا کمی؟ سرکارِ جیلاں ہیں