کرو مشکلیں میری حل غوثِ اعظم

کرو مشکلیں میری حل غوثِ اعظم

ملے بے قراری کو کل غوثِ اعظم

بچا لو مجھے بہرِ حسنین آقا

سفینہ ہے سوئے خلل غوثِ اعظم

بجز تیری نسبت کے کچھ بھی نہیں ہے

مرے پاس حسنِ عمل غوثِ اعظم

تمہارے کرم پر بھروسہ ہے ورنہ

برے ہیں مرے سب عمل غوثِ اعظم

خدا سے سرِ حشر بخشانا مجھ کو

ہے تم سے امید و امل غوثِ اعظم

مرے گلشنِ زندگی میں بہر سو

کھلاؤ خوشی کے کنول غوثِ اعظم

ترے نورِ عرفاں سے زنگ و سیاہی

مرے دل سے جائے نکل غوثِ اعظم

زمانے میں لاکھوں ولی آئے لیکن

تری شان ضرب المثل غوثِ اعظم

وہ دربار تیرا جہاں سر جھکائیں

سلاطین و اہلِ دول غوثِ اعظم

ہے فرمان جب لا تخف تو ہو کیوں کر

مریدوں کو خوفِ اجل غوثِ اعظم

مری روح پہ رحمتیں ہوں گی قرباں

جو آ جائیں وقتِ اجل غوثِ اعظم

جو لمحہ تری یاد میں گزرے بس ہے

وہی عمر کا ماحصل غوثِ اعظم

کرم کیجیے اپنے سجادؔ پر بھی

پریشاں ہے یہ آج کل غوثِ اعظم