چلا لکھنے میں جس لمحہ، تو سوچا کیا چمکتا ہے

چلا لکھنے میں جس لمحہ، تو سوچا کیا چمکتا ہے

قلم نے لکھ دیا نورِ شہِ بطحہ چمکتا ہے

دیارِ سرورِ کونین کی عظمت ذرا دیکھو

ہر اک خطہ چمکتا ہے، ہر اک رستہ چمکتا ہے

سبھی کا ماننا ہے اور میرا بھی ہے یہ کہنا

محمد مصطفیٰ کا عرش پر تلوہ چمکتا ہے

ادا میں کر رہا ہوں حضرتِ حسان کی سنت

ضیائے نعت سے، ہر سو مرا لہجہ چمکتا ہے

کہیں اصغر کہیں اکبر، کہیں عباس کا تیور

علی میدانِ کربل میں ترا کنبہ چمکتا ہے

نبی کے نور کا صدقہ میسر ہو گیا شادابؔ

تبھی تو آسماں کی گود میں تارہ چمکتا ہے