یاں بزمِ ذکرِ مولدِ خیرالوریٰ ہے آج

یاں بزمِ ذکرِ مولدِ خیرالوریٰ ہے آج

جس کا کرم مہتمم ہوا خود کبریا ہے آج

کیوں کر نہ ہو کہ اس کے ہے محبوب کا یہ ذکر

سننے کو جس کے خود ہی وہ روضہ نما ہے آج

جبریل اور ملائک و ارواحِ انبیا

حاضر ہیں شورِ صل علیٰ یا نبی ہے آج

عاجز ہے جس کے دیکھنے سے چشمِ ہر بشر

حسنِ حبیب میں ہوا وہ رونما ہے آج

تاباں ہے آج نیرِ رخسارِ مصطفیٰ

ہر اک فرع کو اصل کی اپنے بقا ہے آج

عرفانِ اپنے نفس کا عارف کو آج ہے

نفسِ النفوسِ خلق ہوا رہنما ہے آج

شاکرؔ پہ بھی ہو آج نگاہِ کرم شہا!

تیرے ہی آسرے پہ کھڑا یہ گدا ہے آج