سب سے بڑی یہی تو فضیلت علی کی ہے

سب سے بڑی یہی تو فضیلت علی کی ہے

سیرت جو ہے نبی کی وہ سیرت علی کی ہے

جس علم کے حصول سے بنتا ہے آدمی

اس کے لیے ہمیشہ وساطت علی کی ہے

اس کو تو صاحبان نظر ہی پوچھیے

کس درجہ بے مثال فتوت علی کی ہے

تاریکیٔ لحد کا نہیں کوئی دغدغہ

روشن جو دل میں شمعِ محبت علی کی ہے

روزِ جزا کی فکر سے کیا اُس کو واسطہ

حال جسے ازل سے معیت علی کی ہے

بے شبہ کب رہی ہے عبادت میں زندگی

جب تک نگاہِ شوق میں صورت علی کی ہے

جو عاشقِ رسول ہے وہ عاشقِ علی ہے

حبِ نبی کے ساتھ محبت علی کی ہے

منہ سے نکل ہی جاتا ہے مشکل میں یا علی

ہر دور میں جہاں کو ضرورت علی کی ہے

مولیٰ ہمارے کس کے نہیں مقتدا لئیقؔ

ہر ایک سلسلہ میں امامت علی کی ہے