تمہارے در کا میں بھی ہوں گدا سرکارِ ربانی

تمہارے در کا میں بھی ہوں گدا سرکارِ ربانی

عطا کر دو، عطا کر دو، عطا سرکارِ ربانی

بدل دی رب نے بھی اس کی دِشا سرکارِ ربانی

تمہارے نام کو جس نے جپا سرکارِ ربانی

مرا ایماں ہے تیری بادشاہت لازوالی ہے

ترا سکہ ہمیشہ ہی چلا سرکارِ ربانی

مریضِ عشق ہیں ہم بھی تمہاری دید کے طالب

ہمارے درد کی ہو بھی دوا سرکارِ ربانی

مقدر کا لکھا تو سب کا سب کو مل ہی جاتا ہے

مقدر سے سوا تم نے دیا سرکارِ ربانی

تمہاری خوبیاں اہلِ نظر نے دیکھیں تو بولے

جمالِ غوث کا ہیں آئینہ سرکارِ ربانی

ہمارے دل میں خواہش ہے تو بس یہ تنہا خواہش ہے

تمہارے قدموں میں آئے قضا سرکارِ ربانی