تخلیط وزیر در احکام انجیل

انجیل کے حکموں میں وزیر کا گڑ بڑ کرنا ، اوراس کی چالاکی

اس نے ہر ایک کے نام پر ایک تحریر تیار کی

اور ہر تحریر کی عبارت دوسرے مسلک کی تھی

ہر ایک کے احکام دوسری قسم کے

یہ اول سے آخر تک اس کے بالکل خلاف

ایک میں ریاضت اور بھوکا رہنے کو

توبہ کارکن بنایا اور اللہ کی طرف رجوع کی شرط

ایک میں کہا کہ ریاضت کا کوئی فائدہ نہیں

اور اس راستہ میں سخاوت کے علاوہ چارہ نہیں

ایک میں کہا کہ تیری فاقہ کشی اور سخاوت

تیرے اور تیرے معبود کے درمیان شرک ہے

توکل اور رضا کے علاوہ

غم اور راحت میں سب چالاکی اور جال ہے

ایک میں کہا ، کہ اطاعت ضروری ہے

ورنہ توکل کا خیال تہمت ہے

ایک میں کہا ، کہ کرنے نہ کرنے کے جو حکم ہیں

کرنے کے لئے نہیں ہیں ، ہمارے عجز کی تفصیل ہیں

تاکہ ہم ان میں عجز دیکھ لیں

اس وقت خدا کی قدرت کو پہچانیں

ایک میں کہا کہ اپنے عجز کو نہ دیکھ

خبردار ! وہ عجز احسان فراموشی ہے

اپنی قدرت کو دیکھ یہ قدرت اسی کی دی ہوئی ہے

اپنی قدرت کو اس کا انعام سمجھ ، کہ وہی وہ ہے

ایک میں کہا ، ان دونوں سے گذر جا

بت ہوگا جو نظر میں سمائیگا ( ان دونوں میں سے)

ایک میں کہا کہ تیرا عجز اور قدرت

اور جو کچھ تیرے فکر میں ہے (خود بخود) گزر جائے گا

ہر مذہب میں اپنی خواہش نفسانی سے

ہر قوم ذلت میں گرفتار ہوئی ہے

ایک میں کہا (عقل کی) اس شمع کو نہ بجھا

اس لئے کہ یہ غور و فکر شمعِ محفل ہے

اس لئے کہ شمع کے بجھانے سے روح بڑھے گی

تیرے صبر کی وجہ سے تیری لیلیٰ مجنوں کی طرح ہوجائے گی

جس نے اپنے زہد کی وجہ سے دنیا کو چھوڑ دیا

اس کے سامنے دنیا پہلے سے زیادہ آتی ہے

ایک میں کہا ، جو کچھ اللہ نے تجھے دیا ہے

وہ آفرینش کے وقت اللہ نے تیرے لیے شیریں کر دیا

تیرے لیے آسان اور خوشگوار کر دیا ہے اس کو لے لے

اپنے آپ کو پیچش میں مبتلا نہ کر

ایک میں کہا، اپنی ملکیت سے دستکش ہو جا

اس لئے کہ تیری مرغوب طبع چیزمردود اور بری ہے

مختلف راستے آسان ہوگئے ہیں

ہر ایک کے لیے ایک مذہب جان کی طرح بن گیا ہے

اگر اللہ کا آسان کردینا ہی کوئی راستہ ہوتا

ہر یہودی اور آتش پرست اس سے واقف ہوتا

ایک میں کہا، کہ آسان چیز وہ ہوتی ہے

جو دل کی زندگی او رجا ن کی غذا ہوتی ہے

جو چیز طبیعت کے ذوق کے مطابق ہوتی ہے جب گذر جاتی ہے

تو شور زمین کی طرح پیداوار اور فصل نہیں دیتی ہے

اس کی پیداوار شرمندگی کے سوا نہیں ہوتی

اور اس کی بیع کا حاصل نقصان کے سوا کچھ نہیں ہوتا

انجام کار وہ آسان نہیں ہوتی

اور آخر میں اس کا نام دشوار ہوتا ہے

تو دشوار اور آسان کے فرق کو سمجھ

اس اور اس کے حسن کے نتیجہ پر نظر رکھ

ایک میں کہا ، کسی استاد کی طلب کر

(محض) ذاتی شرافت سے تجھے عاقبت اندیشی حاصل نہیں ہو سکتی

(بغیر استاد) جس قوم نے انجام کو معلوم کیا

لا محالہ لغزش میں گرفتار ہوئی

آخرت کو سمجھنا (اپنے) ہاتھ کا کام نہیں ہے

ورنہ مذہبوں میں اختلاف نہ ہوتا

ایک میں کہا ، استاد بھی تو ہی ہے

اس لئے کہ استاد کو پہچاننے والا تو ہی ہے

مرد بن اور لوگوں کا بیگاری نہ بن

جا، خود اپنی فکر کر اور پریشان نہ ہو

ایک میں کہا ، یہ سب (کائنات) ایک (ذات) ہے

جو دوسمجھے وہ کمینہ ، بھینگا ہے

ایک میں کہا کہ سو ایک کیسے ہو سکتے ہیں

جو یہ سوچے وہ شاید پاگل ہو

ہر ایک قول دوسرے کی ضد ہے

بتا، زہر اور شکر ایک کیسے ہو سکتے ہیں ؟

جب تک تو زہر اور شکر سے نہ گذرے گا

وحدت کے چمن کی خوشبو کب سونگھے گا ؟