nihayat sadma-e-furqat se hun ranjur ya-allah

nihāyat sadma-e-furqat se huuñ ranjūr yā-allāh

dikhā de mujh ko apnā jalva-e-pur-nūr yā-allāh

jahāñ tak sabr mumkin thā kiyā ab ho nahīñ saktā

tap-e-furqat ne aisā kar diyā mā’zūr yā-allāh

ġham-e-duniyā rahe baaqī na ho kuchh fikr 'uqbā kī

mai-e-ulfat se kar aisā mujhe maḳhmūr yā-allāh

agarche qābil-e-dīdār maiñ hargiz nahīñ lekin

kar apne fazl-o-ehsāñ se mujhe masrūr yā-allāh

na ḳhvāhish māl-o-zar kī hai na tālib ḳhuld-o-kausar kā

mujhe to dil se hai terī razā manzūr yā-allāh

burā huuñ yā bhalā huuñ maiñ ġharaz jaisā bhī huuñ jo huuñ

ye terā banda-e-nāchīz huuñ mash.hūr yā-allāh

merā hāl-e-pareshāñ in dinoñ hai rahm ke qābil

ġham-e-furqat se dil meñ ho gayā nāsūr yā-allāh

kar apne vasl kī daulat se mālā-māl rustam ko

bhalā is taur se kab tak rahe vo duur yā-allāh

nihayat sadma-e-furqat se hun ranjur ya-allah

dikha de mujh ko apna jalwa-e-pur-nur ya-allah

jahan tak sabr mumkin tha kiya ab ho nahin sakta

tap-e-furqat ne aisa kar diya ma’zur ya-allah

gham-e-duniya rahe baqi na ho kuchh fikr 'uqba ki

mai-e-ulfat se kar aisa mujhe maKHmur ya-allah

agarche qabil-e-didar main hargiz nahin lekin

kar apne fazl-o-ehsan se mujhe masrur ya-allah

na KHwahish mal-o-zar ki hai na talib KHuld-o-kausar ka

mujhe to dil se hai teri raza manzur ya-allah

bura hun ya bhala hun main gharaz jaisa bhi hun jo hun

ye tera banda-e-nachiz hun mashhur ya-allah

mera haal-e-pareshan in dinon hai rahm ke qabil

gham-e-furqat se dil mein ho gaya nasur ya-allah

kar apne wasl ki daulat se mala-mal rustam ko

bhala is taur se kab tak rahe wo dur ya-allah