diwali

guloñ pe husn hai ġhunchoñ pe naujavānī hai

chaman meñ dekhiye jis samt shādmānī hai

nigāh shaad hai dil mutma.in nafas masrūr

lahak rahī haiñ havā.eñ chahak rahe haiñ tuyūr

ye ruup aur ye rañg aur nikhār kyā kahnā

bahār aur mukammal bahār kyā kahnā

jagah jagah jo munavvar haiñ zau-fishāñ qindīl

jahāñ husn kī har chiiz hai hasīn-o-jamīl

ye kaun aayā hai chaudah baras ke ba.ad yahāñ

jilau meñ kis ke chale aa rahe haiñ pī-o-javāñ

ye rām-chandr haiñ laxman haiñ aur siitā haiñ

ki jin pe ahl-e-vafā jān-o-dil se shaidā haiñ

unhīñ kī vaj.h se tanvīr paa.ī jaatī hai

unhīñ ke dam se divālī manā.ī jaatī hai

gulon pe husn hai ghunchon pe naujawani hai

chaman mein dekhiye jis samt shadmani hai

nigah shad hai dil mutmain nafas masrur

lahak rahi hain hawaen chahak rahe hain tuyur

ye rup aur ye rang aur nikhaar kya kahna

bahaar aur mukammal bahaar kya kahna

jagah jagah jo munawwar hain zau-fishan qindil

jahan husn ki har chiz hai hasin-o-jamil

ye kaun aaya hai chaudah baras ke baad yahan

jilau mein kis ke chale aa rahe hain pi-o-jawan

ye ram-chandr hain laxman hain aur sita hain

ki jin pe ahl-e-wafa jaan-o-dil se shaida hain

unhin ki wajh se tanwir pai jati hai

unhin ke dam se diwali manai jati hai