ek rah-guzar par

vo jis kī diid meñ lākhoñ masarrateñ pinhāñ

vo husn jis kī tamannā meñ jannateñ pinhāñ

hazār fitne tah-e-pā-e-nāz ḳhāk-nashīñ

har ik nigāh ḳhumār-e-shabāb se rañgīñ

shabāb jis se taḳhayyul pe bijliyāñ barseñ

vaqār jis kī rafāqat ko shoḳhiyāñ tarseñ

adā-e-laġhzish-e-pā par qayāmateñ qurbāñ

bayāz-ruḳh pe sahar kī sabāhateñ qurbāñ

siyāh zulfoñ meñ vārafta nik.hatoñ kā hujūm

tavīl rātoñ kī ḳhvābīda rāhatoñ kā hujūm

vo aañkh jis ke banāv pa ḳhāliq itrā.e

zabān-e-sher ko tārīf karte sharm aa.e

vo hoñT faiz se jin ke bahār lāla-farosh

bahisht o kausar o tasnīm o salsabīl ba-dosh

gudāz jism qabā jis pe saj ke naaz kare

darāz qad jise sarv-e-sahī namāz kare

ġharaz vo husn jo mohtāj-e-vasf-o-nām nahīñ

vo hasan jis kā tasavvur bashar kā kaam nahīñ

kisī zamāne meñ is rah-guzar se guzrā thā

ba-sad ġhurūr o tajammul idhar se guzrā thā

aur ab ye rāh-guzar bhī hai dil-fareb o hasīñ

hai is kī ḳhaak meñ kaif-e-sharāb-o-sher makīñ

havā meñ shoḳhī-e-raftār kī adā.eñ haiñ

fazā meñ narmī-e-guftār kī sadā.eñ haiñ

ġharaz vo husn ab is rah kā juzv-e-manzar hai

niyāz-e-ishq ko ik sajda-gah mayassar hai

wo jis ki did mein lakhon masarraten pinhan

wo husn jis ki tamanna mein jannaten pinhan

hazar fitne tah-e-pa-e-naz KHak-nashin

har ek nigah KHumar-e-shabab se rangin

shabab jis se taKHayyul pe bijliyan barsen

waqar jis ki rafaqat ko shoKHiyan tarsen

ada-e-laghzish-e-pa par qayamaten qurban

bayaz-ruKH pe sahar ki sabahaten qurban

siyah zulfon mein warafta nikhaton ka hujum

tawil raaton ki KHwabida rahaton ka hujum

wo aankh jis ke banaw pa KHaliq itrae

zaban-e-sher ko tarif karte sharm aae

wo honT faiz se jin ke bahaar lala-farosh

bahisht o kausar o tasnim o salsabil ba-dosh

gudaz jism qaba jis pe saj ke naz kare

daraaz qad jise sarw-e-sahi namaz kare

gharaz wo husn jo mohtaj-e-wasf-o-nam nahin

wo hasan jis ka tasawwur bashar ka kaam nahin

kisi zamane mein is rah-guzar se guzra tha

ba-sad ghurur o tajammul idhar se guzra tha

aur ab ye rah-guzar bhi hai dil-fareb o hasin

hai is ki KHak mein kaif-e-sharab-o-sher makin

hawa mein shoKHi-e-raftar ki adaen hain

faza mein narmi-e-guftar ki sadaen hain

gharaz wo husn ab is rah ka juzw-e-manzar hai

niyaz-e-ishq ko ek sajda-gah mayassar hai