wo ret ke Tile chamkile iman ke raushan jalwe hain

vo ret ke Tiile chamkīle īmān ke raushan jalve haiñ

vo Dher haiñ jins-e-īmāñ ke jo ūñche ūñche tode haiñ

in ḳhushk pahāḌoñ ke aage sab dariyā paanī bharte haiñ

pazhmurda diloñ kī khetī ko sarsabz vo patthar karte haiñ

vaañ lā-ilāha-illallāh har zarra zarra kahtā hai

ḳhurshed bhī sachchī ulfat se āġhosh meñ un ko letā hai

vo arz-e-muqaddas mulk-e-arab dar ain haqīqat jalva-e-rab

qurbān haiñ us pe sātoñ falak vo farsh-e-zamīñ par arsh-e-laqab

vaañ donoñ-jahāñ kī rahmat vaale āḳhirī jalve pinhāñ haiñ

is banjar vīrāñ ḳhitte par sab baaġh jahāñ ke qurbāñ haiñ

vo aañkh kahāñ vo qalb kahāñ 'hairat' kī zabāñ se kyā ho bayāñ

bas dekh lo jā ke kyā hai vahāñ ik zarra hai sau jalve meñ ayaañ

wo ret ke Tile chamkile iman ke raushan jalwe hain

wo Dher hain jins-e-iman ke jo unche unche tode hain

in KHushk pahaDon ke aage sab dariya pani bharte hain

pazhmurda dilon ki kheti ko sarsabz wo patthar karte hain

wan la-ilaha-illallah har zarra zarra kahta hai

KHurshed bhi sachchi ulfat se aaghosh mein un ko leta hai

wo arz-e-muqaddas mulk-e-arab dar ain haqiqat jalwa-e-rab

qurban hain us pe saton falak wo farsh-e-zamin par arsh-e-laqab

wan donon-jahan ki rahmat wale aaKHiri jalwe pinhan hain

is banjar viran KHitte par sab bagh jahan ke qurban hain

wo aankh kahan wo qalb kahan 'hairat' ki zaban se kya ho bayan

bas dekh lo ja ke kya hai wahan ek zarra hai sau jalwe mein ayan