وہ ریت کے ٹیلے چمکیلے ایمان کے روشن جلوے ہیں

وہ ریت کے ٹیلے چمکیلے ایمان کے روشن جلوے ہیں

وہ ڈھیر ہیں جنس ایماں کے جو اونچے اونچے تودے ہیں

ان خشک پہاڑوں کے آگے سب دریا پانی بھرتے ہیں

پژمردہ دلوں کی کھیتی کو سرسبز وہ پتھر کرتے ہیں

واں لا الہ الا اللہ ہر ذرہ ذرہ کہتا ہے

خورشید بھی سچی الفت سے آغوش میں ان کو لیتا ہے

وہ ارض مقدس ملک عرب در عین حقیقت جلوۂ رب

قربان ہیں اس پہ ساتوں فلک وہ فرش زمیں پر عرش لقب

واں دونوں جہاں کی رحمت والے آخری جلوے پنہاں ہیں

اس بنجر ویراں خطے پر سب باغ جہاں کے قرباں ہیں

وہ آنکھ کہاں وہ قلب کہاں حیرتؔ کی زباں سے کیا ہو بیاں

بس دیکھ لو جا کے کیا ہے وہاں اک ذرہ ہے سو جلوے میں عیاں