insan

rahīn-e-be-kasī ālūda-e-idbār dekhā hai

kabhī insān ko itnā zalīl-o-ḳhvār dekhā hai

pareshāñ-hāl dekhā hai kabhī be-kār dekhā hai

bahar saa.at kabhī vaqf-e-ġham-o-āzār dekhā hai

kabhī majbūr dekhā hai kabhī lāchār dekhā hai

vufūr-e-ġham meñ marne ke liye tayyār dekhā hai

rahīn-e-be-kasī alūdā-e-idbār dekhā hai

kabhī insān ko itnā zalīl-o-ḳhvār dekhā hai

junūn-e-ishq meñ dard-o-alam meñ josh-e-vahshat meñ

shab-e-furqat ke sannāToñ meñ yā shām-e-musībat meñ

mohabbat kī ghuTan rāhoñ meñ hairānī kī sūrat meñ

batāo to zarā pahle kisī daure-hukūmat meñ

pareshāñ-hāl dil-āzār dil-afgār dekhā hai

kabhī insān ko itnā zalīl-o-ḳhvār dekhā hai

kabhī pahle bhī itnī aam thī kyā chor bāzārī

huā kartī thī har mahfil meñ kyā pahle bhī ayyārī

kabhī pahle bhī lā-tā.dād the rishvat ke byopārī

sar-e-bāzār hotī thī kabhī pahle bhī bad-kārī

batāo tum ne duniyā ko kabhī bad-kār dekhā hai

kabhī insān ko itnā zalīl-o-ḳhvār dekhā hai

bahar aalam kisī ko shikvā-e-be-rozgārī hai

bahar lahza koī apne muqaddar hī kā shākī hai

ba-majbūrī kisī ne izzat-o-nāmūs bechī hai

kisī ne bhuuk kī shiddat meñ apnī jaan de dī hai

ḳhudā shāhid ki maiñ ne ye bhī hāl-e-zār dekhā hai

kabhī insān ko itnā zalīl-o-ḳhvār dekhā hai

koī ab ashk barsātā hai aur koī ġhazal-ḳhvāñ hai

koī hirmāñ badāmāñ hai koī rāhat badāmāñ hai

koī jiine kā ḳhvāhāñ hai koī jiine se nālāñ hai

koī har vaqt shādāñ hai koī har dam pareshāñ hai

zamāne ko kabhī itnā bhī nā-hanjār dekhā hai

kabhī insān ko itnā zalīl-o-ḳhvār dekhā hai

rahin-e-be-kasi aaluda-e-idbar dekha hai

kabhi insan ko itna zalil-o-KHwar dekha hai

pareshan-haal dekha hai kabhi be-kar dekha hai

bahar saat kabhi waqf-e-gham-o-azar dekha hai

kabhi majbur dekha hai kabhi lachaar dekha hai

wufur-e-gham mein marne ke liye tayyar dekha hai

rahin-e-be-kasi aluda-e-idbar dekha hai

kabhi insan ko itna zalil-o-KHwar dekha hai

junun-e-ishq mein dard-o-alam mein josh-e-wahshat mein

shab-e-furqat ke sannaTon mein ya sham-e-musibat mein

mohabbat ki ghuTan rahon mein hairani ki surat mein

batao to zara pahle kisi daure-hukumat mein

pareshan-haal dil-azar dil-afgar dekha hai

kabhi insan ko itna zalil-o-KHwar dekha hai

kabhi pahle bhi itni aam thi kya chor bazari

hua karti thi har mahfil mein kya pahle bhi ayyari

kabhi pahle bhi la-tadad the rishwat ke byopari

sar-e-bazar hoti thi kabhi pahle bhi bad-kari

batao tum ne duniya ko kabhi bad-kar dekha hai

kabhi insan ko itna zalil-o-KHwar dekha hai

bahar aalam kisi ko shikwa-e-be-rozgari hai

bahar lahza koi apne muqaddar hi ka shaki hai

ba-majburi kisi ne izzat-o-namus bechi hai

kisi ne bhuk ki shiddat mein apni jaan de di hai

KHuda shahid ki main ne ye bhi haal-e-zar dekha hai

kabhi insan ko itna zalil-o-KHwar dekha hai

koi ab ashk barsata hai aur koi ghazal-KHwan hai

koi hirman badaman hai koi rahat badaman hai

koi jine ka KHwahan hai koi jine se nalan hai

koi har waqt shadan hai koi har dam pareshan hai

zamane ko kabhi itna bhi na-hanjar dekha hai

kabhi insan ko itna zalil-o-KHwar dekha hai