karwan-e-hayat

kārvān-e-zindagī paiham ravāñ hai sub.h-o-shām

is fanā ke des meñ hāsil huā kis ko qayām

phuul jo khiltā hai vah ek din yahāñ murjhā.egā

ye sarā-e-fānī hai jo aa.egā vo jā.egā

apnī apnī manziloñ par haiñ sitāre gāmzan

sub.h-dam ḳhāmosh ho jaatī hai saarī anjuman

raat ke dāman se aa lagtā hai nūr-e-āftāb

shaam pahnāne chalī aatī hai sūraj ko naqāb

jagmagātī sub.h kī taqdīr kaalī shaam hai

zindagī kī dhaḌkanoñ kā maut hī anjām hai

likhne vaale ne likhā hastī kī qismat meñ zavāl

haañ magar baaqī rahegī zāt-e-rabb-e-zul-jalāl

mard kāmil hai vahī jo manzileñ tai kar gayā

zindagī us kī hai jo marne se pahle mar gayā

maut kyā hai haq se bande ko milāne kā sabab

maut se Darte nahīñ jo jāgte haiñ nīm-shab

piir paiġhambar valī darvesh mardān-e-ḳhudā

maut kī vaadī se guzre haiñ ba-taslīm-o-razā

zindagī aur maut hai apnī ḳhudā ke vāste

mard-e-momin hai faqat sabr-o-razā ke vāste

saañs kī aarī se kaT jaatā hai hastī kā shajar

zindagī meñ maut se mumkin nahīñ hargiz mafar

hashr barpā haiñ ka.ī ik jazba-e-ḳhāmosh meñ

zindagī sotī hai āḳhir maut kī āġhosh meñ

roz-e-avval se yahī hai zindagī kā silsila

maut kyā hai zindagī kā āḳhirī ek marhala

barq meñ tinke haiñ 'vāsif' yā ki hai tinkoñ meñ barq

maut aur hastī meñ kyā samjhe koī insān farq

karwan-e-zindagi paiham rawan hai subh-o-sham

is fana ke des mein hasil hua kis ko qayam

phul jo khilta hai wah ek din yahan murjhaega

ye sara-e-fani hai jo aaega wo jaega

apnī apnī manzilon par hain sitare gamzan

subh-dam KHamosh ho jati hai sari anjuman

raat ke daman se aa lagta hai nur-e-aftab

sham pahnane chali aati hai suraj ko naqab

jagmagati subh ki taqdir kali sham hai

zindagi ki dhaDkanon ka maut hi anjam hai

likhne wale ne likha hasti ki qismat mein zawal

han magar baqi rahegi zat-e-rabb-e-zul-jalal

mard kaamil hai wahi jo manzilen tai kar gaya

zindagi us ki hai jo marne se pahle mar gaya

maut kya hai haq se bande ko milane ka sabab

maut se Darte nahin jo jagte hain nim-shab

pir paighambar wali darwesh mardan-e-KHuda

maut ki wadi se guzre hain ba-taslim-o-raza

zindagi aur maut hai apnī KHuda ke waste

mard-e-momin hai faqat sabr-o-raza ke waste

sans ki aari se kaT jata hai hasti ka shajar

zindagi mein maut se mumkin nahin hargiz mafar

hashr barpa hain kai ek jazba-e-KHamosh mein

zindagi soti hai aaKHir maut ki aaghosh mein

roz-e-awwal se yahi hai zindagi ka silsila

maut kya hai zindagi ka aaKHiri ek marhala

barq mein tinke hain 'wasif' ya ki hai tinkon mein barq

maut aur hasti mein kya samjhe koi insan farq