KHwaja-ji

ḳhvāja milan kī pyaas hai dil meñ nainoñ meñ barsāteñ haiñ

tanhā.ī ke chup āñgan meñ merī us se bāteñ haiñ

ḳhvāja mire kā raaz nirālā ḳhvāja mile to rain ujālā

daras banā jag ghor añdherā din apne bhī rāteñ haiñ

jagat-guru kī aañkh kā taarā ḳhvāja-muīnuddīn hamārā

dūlhā hai ajmer nagar kā ghar ghar meñ bārāteñ haiñ

vahdat kasrat ain tarīqat har chehre meñ ek haqīqat

qutub farīd nizām or sābir ek sifat kī zāteñ haiñ

chisht-nagar meñ nis din mele ishq yahāñ mahfil meñ khele

aañkh meñ aañsū lab pe tarāne ye chishtī sauġhāteñ haiñ

rahnā hai har haal meñ raazī ḳhvāja sañg hai jīvan-bāzī

ḳhvāja-jī kī jiit hamesha mujh pāpan kī māteñ haiñ

aañkh se ojhal dil meñ baserā man-mohan hai ḳhvāja merā

'vāsif' us kī priit nirālī us kī anokhī ghāteñ haiñ

KHwaja milan ki pyas hai dil mein nainon mein barsaten hain

tanhai ke chup aangan mein meri us se baaten hain

KHwaja mere ka raaz nirala KHwaja mile to rain ujala

daras bana jag ghor andhera din apne bhi raaten hain

jagat-guru ki aankh ka tara KHwaja-muinuddin hamara

dulha hai ajmer nagar ka ghar ghar mein baraaten hain

wahdat kasrat ain tariqat har chehre mein ek haqiqat

qutub farid nizam or sabir ek sifat ki zaten hain

chisht-nagar mein nis din mele ishq yahan mahfil mein khele

aankh mein aansu lab pe tarane ye chishti saughaten hain

rahna hai har haal mein raazi KHwaja sang hai jiwan-bazi

KHwaja-ji ki jit hamesha mujh papan ki maten hain

aankh se ojhal dil mein basera man-mohan hai KHwaja mera

'wasif' us ki prit nirali us ki anokhi ghaten hain