madara-e-hawas

kiye jā jo tirā jī chāhe merā kyā hai duniyā meñ

mujhe jaanā hai duniyā se tujhe rahnā hai duniyā meñ

haqīqat kā maiñ juuyā aur tū munkir haqīqat kā

jo ḳhud dushman ho apnā us se kyā mauqa shikāyat kā

jo pāband-e-havas ho raaz kyā samjhe mohabbat kā

hai qaid-e-jism se me.aar baalā apnī ulfat kā

tirī hadd-e-nazar shāhid-faroshī kī dukāñ tak hai

mirī parvāz kī vus.at makāñ se lā-makāñ tak hai

maiñ huuñ parde ke andar aur tū parde ko taktā hai

hai lailā merā maqsad aur tujhe mahmil pe saktā hai

jo shāhid haiñ zamāne ke mirī ismat ke shāhid haiñ

jo masjūd-e-zamāna haiñ vo mere dar pe sājid haiñ

sitāroñ tak nazar terī maiñ ḳhud ḳhurshīd-e-ḳhāvar huuñ

agar tere barābar huuñ to kāfir ke barābar huuñ

mirī bad-nāmiyoñ meñ haiñ mirī āzādiyāñ pinhāñ

mirī nākāmiyoñ meñ haiñ mirī ḳhuddāriyāñ pinhāñ

tirī me.rāj-e-bad-goī mirī tamkīn-e-ḳhāmoshī

hai terā iftirā sheva mirī aadat ḳhatā-poshī

ilaaj apnī burā.ī kā samajhtā hai tū bad-goī

bhalā tū kab huā gar ho gayā sābit burā koī

tere fiqre hue bād-e-shutar bāzār-e-tiflāñ meñ

tajallī ban ke utrī nazm-e-'maikash' qalb-e-pākāñ meñ

kiye ja jo tera ji chahe mera kya hai duniya mein

mujhe jaana hai duniya se tujhe rahna hai duniya mein

haqiqat ka main juya aur tu munkir haqiqat ka

jo KHud dushman ho apna us se kya mauqa shikayat ka

jo paband-e-hawas ho raaz kya samjhe mohabbat ka

hai qaid-e-jism se mear baala apnī ulfat ka

teri hadd-e-nazar shahid-faroshi ki dukan tak hai

meri parwaz ki wusat makan se la-makan tak hai

main hun parde ke andar aur tu parde ko takta hai

hai laila mera maqsad aur tujhe mahmil pe sakta hai

jo shahid hain zamane ke meri ismat ke shahid hain

jo masjud-e-zamana hain wo mere dar pe sajid hain

sitaron tak nazar teri main KHud KHurshid-e-KHawar hun

agar tere barabar hun to kafir ke barabar hun

meri bad-namiyon mein hain meri aazadiyan pinhan

meri nakaamiyon mein hain meri KHuddariyan pinhan

teri meraj-e-bad-goi meri tamkin-e-KHamoshi

hai tera iftira shewa meri aadat KHata-poshi

ilaj apnī burai ka samajhta hai tu bad-goi

bhala tu kab hua gar ho gaya sabit bura koi

tere fiqre hue baad-e-shutar bazar-e-tiflan mein

tajalli ban ke utri nazm-e-'maikash' qalb-e-pakan mein