azal se go hasinon ki mohabbat meri fitrat thi

azal se go hasīnoñ kī mohabbat merī fitrat thī

magar fitrat abhī nā-vāqif-e-soz-e-mohabbat thī

dil-e-ma.asūm ko mere har ik kāfir se ulfat thī

na thā taklīf kā ehsās kyā achchhī tabī.at thī

mirī shirkat mo.aqqar thī har ek ma.asūm sohbat meñ

musallam merī be-lausī hasīnoñ kī jamā.at meñ

mirī ismat kī qasmeñ mo'atabar ahl-e-mohabbat meñ

mirī pur-soz aaheñ muntazir bāb-e-ijābat meñ

samajhtā thā na kuchh ma.anī maiñ duzdīda-nigāhoñ se

gumāñ kartā na thā kuchh bhī kisī kī sard-āhoñ se

na thā vāqif lagāvaT kī maiñ in pechīda rāhoñ se

na uljhā thā kisī kāfir kī mizhgānī sipāhiñ se

na dekhā thā kisī kā hañs ke zulfeñ khol kar aanā

na dekhā thā kisī kā aah bhar kar jaan se jaanā

na thā ma.alūm kyā hotā hai dil le kar mukar jaanā

na thā ma.alūm ho jaatā hai kaise koī dīvānā

na thā ma.alūm dil jaatā hai ik chashm-e-ināyat meñ

na thā ma.alūm ulfat kī sazā miltī hai furqat meñ

na thā ma.alūm dil ko aib lag jaatā hai ulfat meñ

nazar bad-nām ho jaatī hai pākīza mohabbat meñ

azal se go hasinon ki mohabbat meri fitrat thi

magar fitrat abhi na-waqif-e-soz-e-mohabbat thi

dil-e-masum ko mere har ek kafir se ulfat thi

na tha taklif ka ehsas kya achchhi tabiat thi

meri shirkat moaqqar thi har ek masum sohbat mein

musallam meri be-lausi hasinon ki jamaat mein

meri ismat ki qasmen mo'atabar ahl-e-mohabbat mein

meri pur-soz aahen muntazir bab-e-ijabat mein

samajhta tha na kuchh mani main duzdida-nigahon se

guman karta na tha kuchh bhi kisi ki sard-ahon se

na tha waqif lagawaT ki main in pechida rahon se

na uljha tha kisi kafir ki mizhgani sipahin se

na dekha tha kisi ka hans ke zulfen khol kar aana

na dekha tha kisi ka aah bhar kar jaan se jaana

na tha malum kya hota hai dil le kar mukar jaana

na tha malum ho jata hai kaise koi diwana

na tha malum dil jata hai ek chashm-e-inayat mein

na tha malum ulfat ki saza milti hai furqat mein

na tha malum dil ko aib lag jata hai ulfat mein

nazar bad-nam ho jati hai pakiza mohabbat mein