mera rasul

kul aalam jis kī kuTiyā jis kī parchhā.īñ saverā

vo hai rasūl merā

dekh na paa.e itne pas-manzar meñ nigāh-e-suġhrā

aadam kī taḳhlīq hai jis ke naam kā pahlā tuġhra

azal meñ jis kī buniyādeñ haiñ adab meñ jis kā Derā

vo hai rasūl merā

jis kī kamlī ke saa.e meñ aañkh sahr ne kholī

jis ke lahje meñ ham tak pahuñchī qudrat kī bolī

jis ke chāroñ-samt ḳhudā ne apnā nuur bikherā

vo hai rasūl merā

jis kī sachchā.ī ne bātil ke shah-zor pachhāḌe

jis ne tez havāoñ ke siine par ḳheme gaaḌe

jis ke dariyā kī lahroñ ne kohsāroñ ko gherā

vo hai rasūl merā

aap chatā.ī par soyā bāñTī ḳhairāt meñ shāhī

chhū kar jis ke paañv ko qaa.ed kahlā.ī gumrāhī

jis kī chaukhaT par insāñ kī azmat kare baserā

vo hai rasūl merā

chāTā jis ke talvoñ ko jibrīl ke ruḳhsāroñ ne

āñkheñ bichhā.eñ jis ke istiqbāl ko sayyāroñ ne

pal-do-pal meñ lagā ke aayā jo sidrah kā pherā

vo hai rasūl merā

lākhoñ salām us par bhejūñ lākhoñ durūd bhejūñ

ruuh ko aksar us ke rauze par be-vajūd bhejūñ

jis kī rahmat kā ehsān 'muzaffar' par baheterā

vo hai rasūl merā

kul aalam jis ki kuTiya jis ki parchhain sawera

wo hai rasul mera

dekh na pae itne pas-manzar mein nigah-e-sughra

aadam ki taKHliq hai jis ke nam ka pahla tughra

azal mein jis ki buniyaaden hain adab mein jis ka Dera

wo hai rasul mera

jis ki kamli ke sae mein aankh sahr ne kholi

jis ke lahje mein hum tak pahunchi qudrat ki boli

jis ke chaaron-samt KHuda ne apna nur bikhera

wo hai rasul mera

jis ki sachchai ne baatil ke shah-zor pachhaDe

jis ne tez hawaon ke sine par KHeme gaDe

jis ke dariya ki lahron ne kohsaron ko ghera

wo hai rasul mera

aap chatai par soya banTi KHairaat mein shahi

chhu kar jis ke panw ko qaed kahlai gumrahi

jis ki chaukhaT par insan ki azmat kare basera

wo hai rasul mera

chaTa jis ke talwon ko jibril ke ruKHsaron ne

aankhen bichhaen jis ke istiqbaal ko sayyaron ne

pal-do-pal mein laga ke aaya jo sidrah ka phera

wo hai rasul mera

lakhon salam us par bhejun lakhon durud bhejun

ruh ko aksar us ke rauze par be-wajud bhejun

jis ki rahmat ka ehsan 'muzaffar' par bahetera

wo hai rasul mera