milad-un-nabi

mubārak ahl-e-īmāñ ko ki ḳhatm-ul-mursalīn aa.e

mubārak sad-mubārak bānī-e-dīn-e-mubīñ aa.e

mubārak ho ki duniyā meñ sah-e-duniyā-o-dīñ aa.e

charāġh-e-tūr aa.e zīnat-e-arsh-e-barīñ aa.e

ki husn-e-zāt dene ke liye zauq-e-yaqīñ aa.e

mubārak ho jahāñ ko rahmatul-lil.ālamīñ aa.e

ye roz-e-kun se bhī pahle zamāne kī kahānī hai

do-ālam meñ mohammad kā na thā saanī na saanī hai

fanā zer-e-qadam un kī baqā par hukmarānī hai

mohammad ke ġhulāmoñ tak kī hastī jāvedānī hai

sarāpā ishq-e-haq ban kar hasīnoñ ke hasīñ aa.e

mubārak ho jahāñ ko rahmatul-lil.ālamīñ aa.e

vahī hā-mīm taahā haiñ mudassir haiñ muzammil haiñ

vo karramnā banī-ādam kī tafsīr-e-mukammal haiñ

imām-ul-ambiyā haiñ nuur haiñ insān-e-kāmil haiñ

ḳhudā ḳhud mīr-e-majlis hai mohammad sham-e-mahfil haiñ

diloñ ko nuur dene ke liye nūr-e-mubīñ aa.e

mubārak ho jahāñ ko rahmatul-lil.ālamīñ aa.e

dam-e-īsā yad-e-baizā se aage hai maqām un kā

kalāmullāh kī tafsīr hai goyā kalām un kā

hayāt-e-jāvidāñ detā hai duniyā ko payām un kā

ḳhudā hī jāntā hai kis qadar pyārā hai naam un kā

gunah-gāro na ghabrāo shafī.ul-muznabīñ aa.e

mubārak ho jahāñ ko rahmatul-lil.ālamīñ aa.e

dar-o-dīvār taiba ke ḳhushī se jagmagāte haiñ

fazā.eñ raqs kartī haiñ parinde chahchahāte haiñ

malā.ek hūr-o-ġhilmāñ raah meñ āñkheñ bichhāte haiñ

ki sultān-e-zamāna dahr meñ tashrīf laate haiñ

jabīn-e-āsmāñ jhuktī huī suu.ye zamīñ aa.e

mubārak ho jahāñ ko rahmatul-lil.ālamīñ aa.e

do-ālam ke diloñ ko nuur detā hai jamāl un kā

ye jaañ un kī ye dil un kā sifat un kī kamāl un kā

ye din un kā charāġh un ke firāq un kā visāl un kā

ġhulām-e-kam-tarīñ 'vāsif'-alī ke hai ḳhayāl un kā

mohammad kī ġhulāmī meñ qulūb-ul-āshiqīñ aa.e

mubārak ho jahāñ ko rahmat-ul-lil.ālamīñ aa.e

mubarak ahl-e-iman ko ki KHatm-ul-mursalin aae

mubarak sad-mubarak bani-e-din-e-mubin aae

mubarak ho ki duniya mein sah-e-duniya-o-din aae

charagh-e-tur aae zinat-e-arsh-e-barin aae

ki husn-e-zat dene ke liye zauq-e-yaqin aae

mubarak ho jahan ko rahmatul-lilalamin aae

ye roz-e-kun se bhi pahle zamane ki kahani hai

do-alam mein mohammad ka na tha sani na sani hai

fana zer-e-qadam un ki baqa par hukmarani hai

mohammad ke ghulamon tak ki hasti jawedani hai

sarapa ishq-e-haq ban kar hasinon ke hasin aae

mubarak ho jahan ko rahmatul-lilalamin aae

wahi ha-mim taha hain mudassir hain muzammil hain

wo karramna bani-adam ki tafsir-e-mukammal hain

imam-ul-ambiya hain nur hain insan-e-kaamil hain

KHuda KHud mir-e-majlis hai mohammad sham-e-mahfil hain

dilon ko nur dene ke liye nur-e-mubin aae

mubarak ho jahan ko rahmatul-lilalamin aae

dam-e-isa yad-e-baiza se aage hai maqam un ka

kalamullah ki tafsir hai goya kalam un ka

hayat-e-jawidan deta hai duniya ko payam un ka

KHuda hi jaanta hai kis qadar pyara hai nam un ka

gunah-garo na ghabrao shafiul-muznabin aae

mubarak ho jahan ko rahmatul-lilalamin aae

dar-o-diwar taiba ke KHushi se jagmagate hain

fazaen raqs karti hain parinde chahchahate hain

malaek hur-o-ghilman rah mein aankhen bichhate hain

ki sultan-e-zamana dahr mein tashrif late hain

jabin-e-asman jhukti hui suye zamin aae

mubarak ho jahan ko rahmatul-lilalamin aae

do-alam ke dilon ko nur deta hai jamal un ka

ye jaan un ki ye dil un ka sifat un ki kamal un ka

ye din un ka charagh un ke firaq un ka visal un ka

ghulam-e-kam-tarin 'wasif'-ali ke hai KHayal un ka

mohammad ki ghulami mein qulub-ul-ashiqin aae

mubarak ho jahan ko rahmat-ul-lilalamin aae