हीर वारिस शाह

1. हमद

अव्वल हमद ख़ुदाय दा विरद कीजे, इशक कीता सू जग्ग दा मूल मियां ।

पहले आप है रब ने इशक कीता, माशूक है नबी रसूल मियां ।

इशक पीर फ़कीर दा मरतबा है, मरद इशक दा भला रंजूल मियां ।

खिले तिन्हां दे बाग़ कलूब अन्दर, जिन्हां कीता है इशक कबूल मियां ।

2. रसूल दी सिफ़त

दूई नाअत रसूल मकबूल वाली, जैंदे हक्क नज़ूल लौलाक कीता ।

ख़ाकी आख के मरतबा वडा दित्ता, सभ ख़लक दे ऐब थीं पाक कीता ।

सरवर होइके औलियां अम्बियां दा, अग्गे हक्क दे आप नूं ख़ाक कीता ।

करे उम्मती उम्मती रोज़ क्यामत, खुशी छड्ड के जीउ ग़मनाक कीता ।

3. रसूल दे चौहां साथियां दी सिफ़त

चारे यार रसूल दे चार गौहर, सभ्भे इक्क थीं इक्क चड़्हन्दड़े ने ।

अबू बकर ते उमर, उसमान, अली, आपो आपने गुणीं सोहन्दड़े ने ।

जिन्हां सिदक यकीन तहकीक कीता, राह रब दे सीस विकन्दड़े ने ।

ज़ौक छड्ड के जिनां ने ज़ुहद कीता, वाह वाह उह रब्ब दे बन्दड़े ने ।

4. पीर दी सिफ़त

मदह पीर दी हुब दे नाल कीचै, जैंदे ख़ादमां दे विच्च पीरियां नी ।

बाझ ओस जनाब दे पार नाहीं, लख ढूंडदे फिरन फ़कीरियां नी ।

जेहड़े पीर दी मेहर मनज़ूर होए, घर तिन्हां दे पीरिया मीरियां नी ।

रोज़ हशर दे पीर दे तालिबां नूं, हत्थ सजड़े मिलणगियां चीरियां नी ।

5. बाबा फरीद शकर गंज दी सिफ़त

मौदूद दा लाडला पीर चिशती, शकर-गंज मसउद भरपूर है जी ।

ख़ानदान विच्च चिशत दे कामलियत, शहर फकर दा पटन मामूर है जी ।

बाहियां कुतबां विच्च है पीर कामल, जैंदी आजज़ी ज़ुहद मनज़ूर है जी ।

शकर गंज ने आण मुकाम कीता, दुख दरद पंजाब दा दूर है जी ।

6. किस्सा हीर रांझा लिखन बारे

यारां असां नूं आण सवाल कीता, किस्सा हीर दा नवां बणाईए जी ।

एस प्रेम दी झोक दा सभ किस्सा, जीभ सुहनी नाल सुणाईए जी ।

नाल अजब बहार दे शियर कह के, रांझे हीर दा मेल कराईए जी ।

यारां नाल बह के विच मजलिसां, मज़ा हीर दे इशक दा पाईए जी ।

7. वाक कवी

हुकम मन्न के सज्जणां प्यार्यां दा, किस्सा अजब बहार दा जोड़्या ए ।

फ़िकरा जोड़ के ख़ूब दरुसत कीता, नवां फुल गुलाब दा तोड़्या ए ।

बहुत जीउ दे विच्च तदबीर करके, फ़रहाद पहाड़ नूं तोड़्या ए ।

सभ्भा वीन के ज़ेब बणाय दित्ता, जेहा इतर गुलाब नचोड़्या ए ।

8. किस्से दा आरंभ, तख़त हज़ारा अते रांझे बारे

केही तख़त हज़ारे दी सिफ़त कीजे, जित्थे रांझ्यां रंग मचायआ ए ।

छैल गभ्भरू, मसत अलबेलड़े नी, सुन्दर हिक्क थीं हिक्क सवायआ ए ।

वाले कोकले, मुन्दरे, मझ लुंङी, नवां ठाठ ते ठाठ चड़्हायआ ए ।

केही सिफ़त हज़ारे दी आख सकां, गोया बहशत ज़मीन ते आया ए ।

9. रांझे दा बाप

मौजू चौधरी पिंड दी पांध वाला, चंगा भाईआं दा सरदार आहा ।

अट्ठ पुत्तर दो बेटियां तिस दियां सन, वड्ड-टब्बरा ते शाहूकार आहा ।

भली भाईआं विच्च परतीत उसदी, मन्न्या चौंतरे 'ते सरकार आहा ।

वारिस शाह इह कुदरतां रब दियां नी, धीदो नाल उस बहुत प्यार आहा ।

10. रांझे नाल भाईआं दा साड़ा

बाप करे प्यार ते वैर भाई, डर बाप दे थीं पए संगदे ने ।

गुझे मेहने मार दे सप्प वांङूं, उस दे कालजे नूं पए डंगदे ने ।

कोई वस्स ना चल्ले जो कढ्ढ छडन, देंदे मेहने रंग बरंग दे ने ।

वारिस शाह इह गरज़ है बहुत प्यारी, होर साक न सैन ना अंग दे ने ।

11. मौजू दी मौत

तकदीर सेती मौजू फ़ौत होया, भाई रांझे दे नाल खहेड़दे ने ।

खाएं रज्ज के घूरदा फिरें रन्नां, कढ्ढ रिक्कतां धीदो नूं छेड़दे ने ।

नित्त सज्जरा घाउ कलेजड़े दा, गल्लां त्रिक्खियां नाल उचेड़दे ने ।

भाई भाबियां वैर दियां करन गल्लां, एहा झंझट नित्त नबेड़दे ने ।

12. भों दी वंड

हाज़िर काज़ी ते पैंच सदाय सारे, भाईआं ज़िमीं नूं कच्छ पवाई आही ।

वढ्ढी दे के ज़िमीं लै गए चंगी, बंजर ज़िमीं रंझेटे नूं आई आही ।

कच्छां मार शरीक मज़ाख करदे, भाईआं रांझे दे बाब बणाई आही ।

गल्ल भाबियां एह बणाय छड्डी, मगर जट्ट दे फक्कड़ी लाई आही ।

13. भाबियां दे मेहणे

मूंह चट्ट जो आरसी नाल वेखन, तिन्हां वाहन केहा हल वाहुना ई ।

पिंडा पाल के चोपड़े पटे जिन्हां, किसे रन्न की उन्हां तों चाहुना ई ।

जेहड़ा भुइं दे मामले करे बैठा, एस तोड़ ना मूल निबाहुना ई ।

प्या वंझली वाहे ते राग गावे, कोई रोज़ दा इह प्राहुना ई ।

14. रांझे दा हल वाह के आउणा

रांझा जोतरा वाह के थक्क रहआ, लाह अरलियां छाउं नूं आंवदा ए ।

भत्ता आण के भाबी ने कोल धर्या, हाल आपना रो सुणांवदा ए ।

छाले पए ते हत्थ ते पैर फुट्टे, सानूं वाही दा कंम ना भांवदा ए ।

भाबी आखदी लाडला बाप दा सैं, वारिस शाह प्यारा ही माउं दा ए ।

15. रांझा

रांझा आखदा भाबीउ वैरनो नी, तुसां भाईआ नालों विछोड़्या जे ।

ख़ुशी रूह नूं बहुत दिलगीर कीता, तुसां फुल्ल गुलाब दा तोड़्या जे ।

सके भाईआं नालों विछोड़ मैनूं, कंडा विच्च कलेजेड़े पोड़्या जे ।

भाई जिगर ते जान सां असीं अट्ठे, वक्खो वक्ख ही चाय निखोड़्या जे ।

नाल वैर दे रिक्कतां छेड़ भाबी, सानूं मेहना होर चिमोड़्या जे ।

जदों सफ़ां हो टुरनगियां तरफ जन्नत, वारिस शाह दी वाग ना मोड़्या जे ।

16. भाबी

करें आकड़ां खाय के दुद्ध चावल, इह रज्ज के खान दियां मसतियां ने ।

आखन देवरे नाल नेहाल होईआं, सानूं सभ शरीकणियां हस्सदियां ने ।

इह रांझे दे नाल हन घ्यु-शक्कर, पर जीउ दा भेत ना दस्सदियां ने ।

रन्नां डिगदियां वेख के छैल मुंडा, जिवें शहद विच मक्खियां फसदियां ने ।

इक्क तूं कलंक हैं असां लग्गा, होर सभ सुखालियां वसदियां ने ।

घरों निकलसें ते जदों मरें भुखा, भुल जान तैनूं सभ्भे ख़रमसतियां ने ।

वारिस जिन्हां नूं आदतां भैड़ियां नी, सभ ख़लकतां उन्हां तों नसदियां ने।

17. रांझा

तुसां छत्तरे मरद बना दित्ते, सप्प रस्सियां दे करो डारीउ नी ।

राजे भोज दे मूंह लगाम दे के, चड़्ह दौड़ियां हो टूने हारीउ नी ।

कैरो पांडवां दी सफ़ा गाल सुट्टी, ज़रा गल्ल दे नाल बुर्यार्यु नी ।

रावन लंक लुटायके ग़रक होया, कारन तुसां दे ही हैंस्यारीउ नी ।

18. भाबी

भाबी आखदी गुंड्या मुंड्या वे, साडे नाल की रिक्कतां चाईआं नी ।

वली जेठ ते जिन्हां दे फ़तू देवर, डुब्ब मोईआं उह भरजाईआं नी ।

घरो घरी विचारदे लोक सारे, सानूं केहियां फाहियां पाईआं नी ।

तेरी गल्ल ना बणेगी नाल साडे, जा परना ल्या स्यालां दियां जाईआं नी ।

19. रांझा

मूंह बुरा दिसन्दड़ा भाबीए नी, सड़े होए पतंग क्युं साड़नी एं।

तेरे गोचरा कंम की प्या मेरा, सानूं बोलियां नाल क्युं मारनी एं।

कोठे चाड़्ह के पौड़ियां लाह लैंदी, केहे कलह दे महल उसारनी एं।

वारिश शाह दे नाल सरदारनी तूं, पर पेक्यां वल्लों गवारनी एं।

20. भाबी

सिद्धा होइ के रोटियां खाह जट्टा, अड़ियां कास नूं एडियां चाईआं नी ।

तेरी पनघटां दे उत्ते पेउ पेई, धुंमां त्रिंञणां दे विच्च पाईआं नी ।

घर-बार विसार के ख़वार होईआं, झोकां प्रेम दियां जिन्हां ने लाईआं नी ।

ज़ुलफां कालियां कुंढियां नाग़ काले, जोकां हिक ते आण बहाईआं नी ।

वारिस शाह एह जिन्हां दे चन्न देवर, घोल घत्तियां सभ भरजाईआं नी ।

21. भाबी

अठखेल्या अहल दीवान्यां वे, थुक्कां मोढ्यां दे उत्तों स्ट्टना एं ।

चीरा बन्न्ह के भिन्नड़े वाल चोपड़, विच्च त्रिंञणां फेरियां घत्तना एं ।

रोटी खांद्यां लून जे पवे थोड़्हा, चा अंङने विच्च पलट्टना एं ।

कंम करें नाहीं हच्छा खाएं पहनें, जड़्ह आपने आप दी पट्टना एं ।

22. रांझा

भुल गए हां वड़े हां आण वेहड़े सानूं बख़श लै डारीए वासता ई ।

हत्थों तेर्युं देस मैं छड्ड जासां, रख घर हैंस्यारीए वासता ई ।

देहें रात तैं ज़ुलम ते लक्क बद्धा, अनी रूप शिंगारीए वासता ई ।

नाल हुसन दे फिरें गुमान लद्दी, समझ मसत हंकारीए वासता ई ।

जदे जिसे दे नाल ना गल्ल करें, किबर वालीए मारीए वासता ई ।

वारिस शाह नूं मार ना भाग भरीए, अनी मुनस प्यारीए वासता ई ।

23. भाबी

साडा हुसन पसन्द ना ल्यावना एं, जा हीर स्याल व्याह ल्यावीं ।

वाह वंझली प्रेम दी घत जाली, काई नढ्ढी स्यालां दी फाह ल्यावीं ।

तैंथे वल्ल है रन्नां विलावणें दा, रानी कोकलां महल तों लाह ल्यावीं ।

दिनें बूहउं कढ्ढणीं मिले नाहीं, रातीं कंध पिछवाड़्युं ढाह ल्यावीं ।

वारिस शाह नूं नाल लै जाय के ते, जेहड़ा दाउ लग्गे सोई ला ल्यावीं ।

24. रांझा

नढ्ढी स्यालां दी व्याह ल्यावसां मैं, करो बोलियां क्युं ठठोलियां नी ।

बहे घत्त पीड़्हा वांग महरियां दे, होवन तुसां जेहियां अग्गे गोलियां नी ।

मझ्झु वाह विच्च बोड़ीए भाबियां नूं, होवन तुसां जेहियां बड़बोलियां नी ।

बस करो भाबी असीं रज्ज रहे, भर दित्तियां जे तुसां झोलियां नी ।

25. भाबी अते रांझा

केहा भेड़ मचायउ ई कच्च्या वे, मत्था डाहउ सौंकणां वांङ केहा ।

जाह सज्जरा कंम गवा नाहीं, होइ जासिया जोबना फेर बेहा ।

रांझे खा गुस्सा सिर धौल मारी, केही चम्बड़ी आण तूं वांङ लेहा ।

तुसीं देस रक्खो असीं छड्ड चल्ले, लाह झगड़ा भाबीए गल्ल एहा ।

हथ पकड़ के जुत्तियां मार बुक्कल, रांझा होइ टुर्या वारिस शाह जेहा ।

26. रांझे दे घरों जान दी भरावां नूं ख़बर मिलणी

ख़बर भाईआं नूं लोकां जाय दित्ती, धीदो रुस्स हज़ार्युं चल्या जे ।

हल वाहुना ओस तों होए नाहीं, मार बोलियां भाबियां सल्ल्या जे ।

पकड़ राह टुर्या, हंझू नैन रोवन, जिवें नदी दा नीर उछल्ल्या जे ।

वारिस शाह अग्गों वीर दे वासते भाईआं ने, अधवाट्यु राह जा मल्ल्या जे ।

27. वाक कवी

रूह छड्ड कलबूत ज्युं विदाय हुन्दा, तिवें एह दरवेश सिधार्या ई ।

अन्न पानी हज़ारे दा कसम करके, कसद झंग स्याल चितार्या ई ।

कीता रिज़क ने आण उदास रांझा, चलो चली ही जीउ पुकार्या ई ।

कच्छे वंझली मार के रवां होया, वारिस शाह ने वतन विसार्या ई ।

28. रांझे दे भरा

आख रांझ्या भा की बनी तेरे, देस आपना छड्ड सिधार नाहीं ।

वीरा अम्बड़ी जायआ जाह नाहीं, सानूं नाल फ़िराक दे मार नाहीं ।

एह बांदियां ते असीं वीर तेरे, कोई होर विचार विचार नाहीं ।

बख़श इह गुनाह तूं भाबियां नूं, कौन जंम्या जो गुनाहगार नाहीं ।

भाईआं बाझ ना मजलसां सोंहदियां ने, अते भाईआं बाझ बहार नाहीं ।

भाई मरन ते पैंदियां भज बाहां, बिनां भाईआं पर्हे परवार नाहीं ।

लक्ख ओट है कोल वसेंद्यां दी, भाईआं ग्यां जेडी कोई हार नाहीं ।

भाई ढांवदे भाई उसारदे ने, भाईआं बाझ बाहां बेली यार नाहीं ।

29. रांझा

रांझे आख्या उठ्या रिज़क मेरा, मैथों भाईयो तुसीं की मंगदे हो ।

सांभ ल्या जे बाप दा मिलख सारा, तुसीं साक ना सैन ना अंग दे हो ।

वस लग्गे तां मनसूर वांङूं, मैनूं चाय सूली उते टंगदे हो ।

विच्चों ख़ुशी हो असां दे निकलने 'ते, मूंहों आखदे गल्ल क्युं संगदे हो ।

30. भाबियां

भरजाईआं आख्या रांझ्या वे, असीं बांदियां तेरियां हुन्नियां हां ।

नाउं ल्या है जदों तूं जावने दा, असीं हंझूआं रत्त दियां रुन्नियां हां ।

जान माल कुरबान है तुध उतों, अते आप वी चोखने हुन्नियां हां ।

सानूं सबर करार ना आंवदा है, वारिस शाह थों जदों विछुन्नियां हां ।

31. रांझा

भाबी रिज़क उदास जां हो टुर्या, हुन कास नूं घेर के ठगदियां हो ।

पहलां साड़ के जीऊ निमानड़े दा, पिच्छों मल्हमां लावने लगदियां हो ।

भाई साक सन सो तुसां वक्ख कीते, तुसीं साक की साडियां लगदियां हो ।

असीं कोझड़े रूप करूप वाले, तुसीं जोबने दिया नईं वगदियां हो ।

असां आब ते तुआम हराम कीता, तुसीं ठगणियां सारड़े जग्गदियां हो ।

वारिश शाह इकल्लड़े की करना, तुसीं सत इकट्ठियां वगदियां हो ।

32. रांझे दा मसीत विच्च पुज्जणा

वाह लाय रहे भाई भाबियां भी, रांझा रुठ हज़ार्युं धायआ ए ।

भुख नंग नूं झाग के पंध करके, रातीं विच्च मसीत दे आया ए ।

हथ वंझली पकड़ के रात अद्धी, रांझे मज़ा भी ख़ूब बणायआ ए ।

रन्न मरद ना पिंड विच्च रहआ कोई, सभा गिरद मसीत दे आया ए ।

वारिस शाह मियां पंड झगड़्यां दी, पिच्छों मुल्लां मसीत दा आया ए ।

33. मसीत दी सिफ़त

मसजिद बैतुल-अतीक मिसाल आही, ख़ाना काअब्युं डौल उतार्या ने ।

गोया अकसा दे नाल दी भैन दूई, शायद सन्दली नूर उसार्या ने ।

पड़्हन फाज़िल दरस दरवेश मुफती, ख़ूब कढ्ढी इलहानि-पुरकार्या ने ।

ताअलील मीज़ान ते सरफ वाही, सरफ़ मीर भी याद पुकार्या ने ।

काज़ी कुतब ते कनज़ अनवाह चौदां, मसऊदियां जिलद सवार्या ने ।

ख़ानी नाल मजमूआ सुलतानियां दे, अते हैरतुल-फिका नवार्या ने ।

फ़तव बरहना मनज़ूम शाहां, नाल ज़बदियां हिफ़ज़ करार्या ने ।

मारज़ुल नबुवतां अते फ़लास्यां तों, रौज़े नाल इख़लास पसार्या ने ।

ज़र्रादियां दे नाल शर्हा मुल्लां, ज़िनजानियां नहव नतार्या ने ।

करन हिफज़ कुरान तफ़सीर दौरां, ग़ैर शर्हा नूं दुर्र्यां मार्या ने ।

34. बच्चे जो पड़्हदे हन

इक्क नज़म दे दरस हरकरन पड़्हदे, नाम हक्क अते ख़ालिक बारियां ने ।

गुलिसतां बोसतां नाल बहार-दानिश, तूतीनाम्युं वाहद-बारियां ने ।

मुनशात नसाब ते अब्बुलफ़ज़लां, शाहनाम्युं राज़क-बारियां ने ।

किरानुल सादैन दीवान हाफिज़, शीरीं ख़ुसरवां लिख सवारियां ने ।

35. बच्च्यां दा पड़्हना

कलमदान दफ़तैन दवात पट्टी, नावें एमली वेखदे लड़क्यां दे ।

लिखन नाल मसौदे स्याक ख़सरे, स्याे अवारज़े लिखदे वरक्यां दे ।

इक्क भुल के ऐन दा ग़ैन वाचन, मुल्लां जिन्द कढ्ढे नाल कड़क्यां दे ।

इक्क आंवदे शौक जुज़दान लै के, विच्च मकतबां दे नाल तड़क्यां दे ।

36. मुल्लां ते रांझे दे सवाल-जवाब

मुल्लां आख्या चूनियांचूंड्यां देखद्यां ई ग़ैर शर्हा तूं कौन हैं दूर हो ओए ।

एथे लुच्यां दी काई जा नाहीं ,पटे दूर कर हक्क मनज़ूर हो ओए ।

अनलहक्क कहावना किबर करके, ओड़क मरेंगा वांङ मनसूर हो ओए ।

वारिस शाह ना हिंग दी बास छुपदी, भावें रसमसी विच्च काफ़ूर हो ओए ।

37. रांझा

दाड़्ही शेख़ दी अमल शैतान वाले, केहा राण्यो जांद्यां राहियां नूं ।

अग्गे कढ कुरान ते बहे मिम्बर ,केहा अड्यो मकर दियां फाहियां नूं ।

एह पलीत ते पाक दा करो वाकिफ़, असीं जाणीएं शर्हा गवाहियां नूं ।

जेहड़े थांयों नापाक दे विच्च वड़्यों, शुकर रब दियां बेपरवाहियां नूं ।

वारिस शाह विच्च हुजर्यां फ़िअल करदे, मुल्ला जोतरे लांवदे वाहिया नूं ।

38. मुल्लां

घर रब दे मसजिदां हुन्दियां ने, एथे ग़ैर शर्हा नाहीं वाड़ीए ओए ।

कुत्ता अते फ़कीर पलीत होवे, नाल दुर्र्यां बन्न्ह के मारीए ओए ।

तारक हो सलात दा पटे रक्खे, लब्बां वाल्यां मार पछाड़ईए ओए ।

नीवां कपड़ा होवे तां पाड़ सुट्टीए, लब्बां होन दराज़ तां साड़ीए ओए ।

जेहड़ा फ़िका असूल दा नहीं वाकिफ़, उहनूं तुरत सूली उत्ते चाड़्हीए ओए ।

वारिस शाह ख़ुदा द्यां दुशमणां नूं, दूरों कुत्त्यां वांग दुरकारीए ओए ।

39. रांझा

सानूं दस्स नमाज़ है कासदी जी, कास नाल बणाय के सारिया ने ।

कन्न नक नमाज़ दे हैन कितने, मत्थे किन्हां दे धुरों इह मारिया ने ।

लम्बे कद्द चौड़ी किस हान दी है, किस चीज़ दे नाल सवारिया ने ।

वारिस किल्लियां कितनियां उस दियां ने, जिस नाल इह बन्न्ह उतारिया ने ।

40. मुल्लां

असां फ़िक्का असूल नूं सही कीता, ग़ैर शर्हा मरदूद नूं मारने आं ।

असां दस्सने कंम इबादतां दे पुल सरात तों पार उतारने आं ।

फरज़ सुन्नतां वाजबां नफल वितरां, नाल जायज़ा सच नितारने आं ।

वारिस शाह जमायत दे तारकां नूं, ताज़्यान्यां दुर्र्यां मारने आं ।

41. रांझा

बास हलव्यां दी ख़बर मुरद्यां दी नाल दुआई दे जींवदे मारदे हो ।

अन्न्हे कोड़्हआं लूल्यां वांग बैठे, कुर्हा मरन जमान दा मारदे हो ।

शर्हा चाय सरपोश बणायआ जे, रवादार वड्डे गुन्हागार दे हो ।

वारस शाह मुसाफरां आयां नूं, चल्लो चली ही पए पुकारदे हो ।

42. मुल्लां

मुल्लां आख्या नामाकूल जट्टा, फ़ज़र कट्ट के रात गुज़ार जाईं ।

फ़ज़र हुन्दी थों अग्गे ही उठ एथों, सिर कज्ज के मसजदों निकल जाईं ।

घर रब्ब दे नाल ना बन्न्ह झेड़ा, अज़ग़ैब दियां हुजत्तां ना उठाईं ।

वारिस शाह ख़ुदा दे ख़ान्यां नूं, इह मुल्ला भी चम्बड़े हैन बलाईं ।

43. रांझे दा मसीतों जाणां अते नदी ते पुज्जणा

चिड़ी चूहकदी नाल जां टुरे पांधी, पईआं दुध दे विच्च मधाणियां नी ।

उठ ग़ुसल दे वासते जा पहुते, सेजां रात नूं जिन्हां ने माणियां नी ।

रांझे कूच कीता आया नदी उते, साथ लद्द्या पार मुहाण्यां ने ।

44. रांझा मलाह दे तरले करदा है

रांझे आख्या पर लंघा मियां, मैनूं चाड़्ह लै रब्ब दे वासते ते ।

हथ जोड़ के मिन्नता करे रांझा, तरला करां मैं झब्ब दे वासते ते ।

तुसीं चाड़्ह लवो मैनूं विच बेड़ी, चप्पू धिकसां दब्ब दे वासते ते ।

रुस्स आया हां नाल भाबियां दे, मिन्नतां करां सबब्ब दे वासते ते ।

45. मलाह

पैसा खोल्ह के हत्थ जो धरे मेरे, गोदी चाय के पार उतारना हां ।

अते ढेक्या ! मुफ़त जे कन्न खाएं, चाय बेड़ीउं ज़िमीं ते मारना हां ।

जेहड़ा कप्पड़ा दए ते नकद मैनूं, सभ्भो ओस दे कंम सवारना हां ।

ज़ोरावरी जो आण के चड़्हे बेड़ी, अधवाटड़े डोब के मारना हां ।

डूमां अते फ़कीरां ते मुफ़तख़ोरां, दूरों कुत्त्यां वांग दुरकारना हां ।

वारिस शाह जेहआं पीर ज़ाद्यां नूं, मुढ्ढों बेड़ी दे विच्च ना वाड़ना हां ।

46. वाक कवी

रांझा मिन्नतां करके थक्क रहआ, अंत हो कंधी पर्हां जाय बैठा ।

छड अग्ग बेगानड़ी हो गोशे, प्रेम ढांडड़ी वक्ख जगाय बैठा ।

गावे सद्द फ़िराक दे नाल रोवे, उते वंझली शबद वजाय बैठा ।

जो को आदमी त्रीमतां मरद है सन, पत्तन छड्ड के ओस थे जाय बैठा ।

रन्नां लुड्डन झबेल दियां भरन मुट्ठी, पैर दोहां दी हिक टिकाय बैठा ।

गुस्सा खायके लए झबेल झईआं, अते दोहां नूं हाक बुलाय बैठा ।

पिंडा ! बाहुड़ीं जट लै जाग रन्नां, केहा शुगल है आण जगाय बैठा ।

वारिस शाह इस मोहियां मरद रन्नां, नहीं जाणदे कौन बलाय बैठा ।

47. लुड्डन मलाह दा हाल पाहर्या

लुड्डन करे बकवास ज्युं आदमी नूं, यारो वसवसा आण शैतान कीता ।

देख शोर फसाद झबेल सन्दा, मीएं रांझे ने जीउ हैरान कीता ।

बन्ह सिरे ते वाल त्यार होया, तुर ठिल्ल्हने दा सम्यान कीता ।

रन्नां लुड्डन दियां देख रहम कीता, जो कुझ्झ नबी ने नाल महमान कीता ।

इहो जेहे जे आदमी हत्थ आवन, जान माल परवार कुरबान कीता ।

आउ करां हैं एस दी मिन्नत ज़ारी, वारिस कास थों दिल परेशान कीता ।

48. मलाह दियां रन्ना दा रांझे नूं तसल्ली देणा

सैईं वंझीं झनाउं दा अंत नाहीं, डुब मरेंगा ठिल्ह ना सज्जना वो ।

चाड़्ह मोढ्यां ते तैनूं असीं ठिल्ल्हां, कोई जान तों ढिल ना सज्जना वो ।

साडा अकल शऊर तूं खस्स लीता, रेहआ कुखड़ा हिल ना सज्जना वो ।

साडियां अक्खियां दे विच्च वांग धीरी, डेरा घत बहु हिल ना सज्जना वो ।

वारस शाह मियां तेरे चौखने हां, साडा कालजा सल्ल ना सज्जना वो ।

49. मलाह दियां रन्नां ने रांझे नूं किशती विच्च चाड़्हना

दोहां बाहां तों पकड़ रंझेटड़े नूं, मुड़ आण बेड़ी विच्च चाड़्हआ ने ।

तकसीर मुआफ कर आदमे दी, मुड़ आण बहशत विच्च वाड़्या ने ।

गोया ख़ाब दे विच्च अज़ाज़ील ढट्ठा, हेठों फेर मुड़ अरश ते चाड़्हआ ने ।

वारिस शाह नूं तुरत नुहायके ते, बीवी हीर दे पलंघ ते चाड़्हआ ने ।

50. रांझे दा पलंघ बारे पुच्छणा

यारो पलंघ केहा सुंञी सेज आही, लोकां आख्या हीर जटेटड़ी दा ।

बादशाह स्यालां दे त्रिंञणां दी, महर चूचके ख़ान दी बेटड़ी दा ।

शाह-परी पनाह नित लए जिस थों, एह थाउं उस मुशक लपेटड़ी दा ।

असीं सभ झबेल ते घाट पत्तन, सभ्भा हुकम है ओस सलेटड़ी दा ।

51. मलाह दा गुस्सा अते बेकरारी

बेड़ी नहीं इह जंञ दी बनी बैठक, जो को आंवदा सद्द बहावन्दा है ।

गडा-वड अमीर फ़कीर बैठे, कौन पुछदा केहड़े थांव दा है ।

जिवें शम्हां ते डिगन पतंग धड़ धड़, लंघ नईं मुहायना आवन्दा है ।

ख़वाजा ख़िजर दा बालका आण लत्था, जना खना शरीनियां ल्यांवदा है ।

लुड्डन ना लंघायआ पार उस नूं, ओस वेलड़े नूं पच्छोतांवदा है ।

यारो झूठ ना करे ख़ुदाय सच्चा, रन्नां मेरियां इह खिसकांवदा है ।

इक्क सद्द दे नाल इह जिन्द लैंदा, पंखी डेगदा मिरग फहांवदा है ।

ठग सुने थानेसरों आंवदे ने, इह तां ज़ाहरा ठग झनांवदा है ।

वारिस शाह मियां वली ज़ाहरा है, वेख हुने झबेल कुटांवदा है ।

52. रांझे दे आउन दी ख़बर

जाय माहियां पिंड विच्च गल्ल टोरी, इक्क सुघड़ बेड़ी विच्च गांवदा है ।

उहदे बोल्यां मुख थीं फुल्ल किरदे, लक्ख लक्ख दा सद्द उह लांवदा है ।

सने लुड्डन झबेल दियां दोवें रन्नां, सेज हीर दी ते अंग लांवदा है ।

वारिस शाह कवारियां आफ़तां ने, वेख केहा फ़तूर हुन पांवदा है ।

53. लोकां दा रांझे नूं पुच्छणा

लोकां पुच्छ्या मियां तूं कौन हुन्दा, अन्न किसे ने आण खवाल्या ई ।

तेरी सूरत ते बहुत मलूक दिस्से, एड जफ़र तूं कास ते जाल्या ई ।

अंग साक क्युं छड के नस्स आइउं, बुढ्ढी मां ते बाप नूं गाल्या ई ।

ओहले अक्खियां दे तैनूं किवें कीता, किन्हां दूतियां दा कौल पाल्या ई ।

54. रांझे दा हीर दे पलंघ ते बैठणा

हस्स खेड के रात गुज़ारिया सू, सुब्हा उठ के जीउ उदास कीता ।

राह जांदड़े नूं नदी नज़र आई, डेरा जाय मलाहां दे पास कीता ।

अग्गे पलंघ बेड़ी विच्च विछ्या सी, उते ख़ूब विछावना रास कीता ।

बेड़ी विच्च वजाय के वंझली नूं, जा पलंघ उते आम ख़ास कीता ।

वारिस शाह जा हीर नूं ख़बर होई, तेरी सेज दा जट्ट ने नास कीता ।

55. हीर दा आउना ते गुस्सा

लै के स्ट्ठ सहेलियां नाल आई, हीर मत्तड़ी रूप गुमान दी जी ।

बुक मोतियां दे कन्नीं झुमकदे सन, कोई हूर ते परी दी शान दी जी ।

कुड़ती सूही दी हिक्क दे नाल फब्बी, होश रही ना ज़िमीं असमान दी जी ।

जिस दे नक्क बुलाक ज्युं कुतब तारा, जोबन भिन्नड़ी कहर तूफान दी जी ।

आ बुन्द्यां वालीए टलीं मोईए, अग्गे गई केती तम्बू ताणदी जी ।

वारिस शाह मियां जट्टी लोड़्ह लुट्टी, परी किबर हंकार ते मान दी जी ।

56. हीर दे रूप दी तारीफ़

केही हीर दी करे तारीफ शायर, मत्थे चमकदा हुसन महताब दा जी ।

ख़ूनी चूंडियां रात ज्यु चन्न गिरदे, सुरख रंग ज्युं रंग शहाब दा जी ।

नैन नरगसी मिरग ममोलड़े दे, गल्ल्हां टहकियां फुल्ल गुलाब दा जी ।

भवां वांङ कमान लाहौर दे सन, कोई हुसन ना अंत हिसाब दा जी ।

सुरमा नैणां दी धार विच्च फब रहआ, चड़्हआ हिन्द ते कटक पंजाब दा जी ।

खुल्ल्ही त्रिंञणां विच्च लटकदी है, हाथी मसत ज्युं फिरे नवाब दा जी ।

चेहरे सुहने ते ख़त ख़ाल बणदे, ख़ुश ख़त ज्युं हरफ किताब दा जी ।

जेहड़े वेखने दे रीझवान आहे, वड्डा फ़ायदा तिन्हां दे बाब दा जी ।

चलो लैलातुलकदर दी करो ज़्यारत, वारिस शाह इह कंम सवाब दा जी ।

57. तथा

होठ सुरख़ याकूत ज्युं लाल चमकन, ठोडी सेउ विलायती सार विच्चों ।

नक्क अलिफ़ हुसैनी दा पिपला सी, ज़ुलफ़ नाग़ ख़ज़ाने दी बार विच्चों ।

दन्द चम्बे दी लड़ी कि हंस मोती, दाने निकले हुसन अनार विच्चों ।

लिखी चीन कशमीर तसवीर जट्टी, कद सरू बहशत गुलज़ार विच्चों ।

गरदन कूंज दी उंगलियां रव्हां फलियां, हत्थ कूलड़े बरग चनार विच्चों ।

बाहां वेलने वेलियां गुन्न्ह मक्खन, छाती संग मर मर गंग धार विच्चों ।

छाती ठाठ दी उभरी पट खेनूं, स्यु बलख़ दे चुने अम्बार विच्चों ।

धुन्नी बहशित दे हौज़ दा मुशक कुब्बा, पेटू मख़मली ख़ास सरकार विच्चों ।

काफ़ूर शहनां सरीन बांके, साक हुसन सतून मीनार विच्चों ।

सुरख़ी होठां दी लोड़्ह दन्दासड़े दा, खोजे ख़तरी कतल बाज़ार विच्चों ।

शाह परी दी भैन पंज फूल राणी, गुझी रहे ना हीर हज़ार विच्चों ।

सई्ईआं नाल लटकदी मान मत्ती, जिवें हरनियां तुट्ठियां बार विच्चों ।

अपराध अवध दलत मिसरी, चमक निकली तेग़ दी धार विच्चों ।

फिरे छणकदी चाउ दे नाल जट्टी, चड़्हआ ग़ज़ब दा कटक कंधार विच्चों ।

लंक बाग़ दी परी कि इन्दराणी, हूर निकली चन्द परवार विच्चों ।

पुतली पेखने दी नकश रूम दा है, लद्धा परी ने चन्द उजाड़ विच्चों ।

एवें सरकदी आंवदी लोड़्ह लुट्टी, जिवें कूंज टुर निकली डार विच्चों ।

मत्थे आण लग्गन जेहड़े भौर आशक, निक्कल जान तलवार दी धार विच्चों ।

इशक बोलदा नढी दे थांउं थांईं, राग निकले ज़ील दी तार विच्चों ।

कज़लबाश असवार जल्लाद ख़ूनी, निक्कल ग्या ए उड़द बाज़ार विच्चों ।

वारिस शाह जां नैणां दा दाउ लग्गे, कोई बचे ना जूए दी हार विच्चों ।

58. हीर दी मलाहां ते सखती ते उन्हां दा उत्तर

पकड़ लए झबेल ते बन्न्ह मुशकां, मार छमकां लहू लुहान कीते ।

आन पलंघ ते कौन सवाल्या जे, मेरे वैर ते तुसां सामान कीते ।

कुड़ीए मार ना असां बेदोस्यां, नूं कोई असां ना इह महमान कीते ।

चैंचर-हारीए रब तों ड्रीं मोईए, अग्गे किसे ना एड तूफ़ान कीते ।

एस इशक दे नशे ने नढ्ढीए नी, वारिस शाह होरीं परेशान कीते ।

59. हीर

जवानी कमली राज एे चूचके दा, ऐवें किसे दी की परवाह मैनूं ।

मैं तां धरूह के पलंघ तों चाय सुट्टां, आयां किधरों इह बादशाह मैनूं ।

नाढू शाह दा पुत्त कि शेर हाथी, पास ढुक्क्यां लएगा ढाह मैनूं ।

नाहीं पलंघ ते एस नूं टिकन देणा, लाय रहेगा लख जे वाह मैनूं ।

इह बोदला पीर बग़दाद गुग्गा, मेले आइ बैठा वारिस शाह मैनूं ।

60. हीर रांझे नूं जगाउंदी है

उठीं सुत्त्या सेज असाडड़ी तों, लंमा सुस्सरी वांङ की प्या हैं वे ।

रातीं किते उनींदरा कट्ट्योई, ऐडी नींद वाला लुड़्ह ग्या हैं वे ।

सुंञी वेख नखसमड़ी सेज मेरी, कोई आहलकी आण ढह प्या हैं वे ।

कोई ताप कि भूत कि जिन्न लग्गा, इक्के डायन किसे भख ल्या हैं वे ।

वारिस शाह तूं ज्युंदा घूक सुतों, इक्के मौत आई मर ग्या हैं वे ।

61. हीर दा मेहरवान होणा

कूके मार ही मार ते पकड़ छमकां, परी आदमी ते कहरवान होई ।

रांझे उठ के आख्या 'वाह सज्जण', हीर हस्स के ते मेहरबान होई ।

कच्छे वंझली कन्नां दे विच्च वाले, ज़ुलफ़ मुखड़े ते परेशान होई ।

भिन्ने वाल चूने मत्थे चन्द रांझा, नैणीं कज्जले दी घमसान होई ।

सूरत यूसफ़ दी वेख तैमूस बेटी, सने मालके बहुत हैरान होई ।

नैन मसत कलेजड़े विच्च धाणे, जिवें तिक्खड़ी नोक सनान होई ।

आइ बग़ल विच्च बैठ के करे गल्लां, जिवें विच्च किरबान कमान होई ।

भला होया मैं तैनूं ना मार बैठी, काई नहीं सी गल्ल बेशान होई ।

रूप जट्ट दा वेख के जाग लधी, हीर घोल घत्ती कुरबान होई ।

वारिस शाह ना थाउं दम मारने, दी चार चशम दी जदों घमसान होई ।

62. रांझा

रांझा आखदा इह जहान सुफ़ना, मर जावना ईं मतवालीए नी ।

तुसां जेहआं प्यार्यां इह लाज़म, आए गए मुसाफरां पालीए नी ।

एडा हुसन दा ना गुमान कीजे, इह लै पलंघ हई सने नेहालीए नी ।

असां रब्ब दा आसरा रक्ख्या ए उट्ठ जवानां ईं नैणां वालीए नी ।

वारिस शाह दे मगर ना पईं मोईए, एस भैड़े दी गल्ल नूं टालीए नी ।

63. हीर

इह हीर ते पलंघ सभ थाउं तेरा, घोल घत्तियां ज्यूड़ा वार्या ई ।

नाहीं गाल्ह कढ्ढी हत्थ जोड़नी हां, हथ लाय नाहीं तैनूं मार्या ई ।

असीं मिन्नतां करां ते पैर पकड़ां, तैथों घोल्या कोड़ममां सार्यां ई ।

असां हस के आण सलाम कीता, आख कास नूं मकर पसार्या ई ।

सुंञे पर्हे सन त्रिंञणीं चैन नाहीं, अल्ल्हा वाल्या तूं सानूं तार्या ई ।

वारिस शाह शरीक है कौन उस दा, जिस दा रब्ब ने कंम सवार्या ई ।

64. रांझा

मान-मत्तीए रूप गुमान भरीए, अठखेलीए रंग रंगीलीए नी ।

आशक भौर फ़कीर ते नाग काले, बाझ मंतरों मूल ना कीलीए नी ।

एह जोबना ठग बाज़ार दा ई टूणे-हारीए छैल छबीलीए नी ।

तेरे पलंघ दा रंग ना रूप घट्या, ना कर शुहद्यां नाल बख़ीलीए नी ।

वारिस शाह बिन कारदों ज़िब्हा करीए, बोल नाल ज़बान रसीलीए नी ।

65. रांझे तो हीर ने हाल पुच्छणा

घोल घोल घत्ती तैंडी वाट उत्तों, बेली दस्स खां किधरों आवना एं ।

किस मान-मत्ती घरों कढ्युं तूं, जिस वासते फेरियां पावना एं ।

कौन छड आइउं पिच्छे मेहर वाली, जिस दे वासते पच्छोतावना एं ।

कौन ज़ात ते वतन की साईआं दा, अते जद्द दा कौन सदावनां एं ।

तेरे वारने चौखने जानियां मैं, मंङू बाबले दा चार ल्यावना एं ।

मंङू बाबले दा ते तूं चाक मेरा, इह वी फंध लग्गे जे तूं लावना एं ।

वारिस शाह चहीक जे नवीं चूपें, सभे भुल जाणीं जेहड़ियां गावनां एं ।

66. रांझा

तुसां जहे माशूक जे थीन राज़ी, मंगू नैणां दी धार विच्च चारीए नी ।

नैणां तेर्यां दे असीं चाक होए, जिवें जीउ मन्ने तिवें सारीए नी ।

कित्थों गल्ल कीचै नित नाल तुसां, कोई बैठ विचार विचारीए नी ।

गल्ल घत जंजाल कंगाल मारें, जाय त्रिंञणीं वड़ें कुआरीए नी ।

67. हीर

हत्थ बद्धड़ी रहां गुलाम तेरी, सने त्रिंञणां नाल सहेलियां दे ।

होसन नित बहारां ते रंग घणे,विच्च बेलड़े दे नाल बेलियां दे ।

सानूं रब्ब ने चाक मिलाय दित्ता, भुल्ल गए प्यार अरबेलियां दे ।

दिने बेल्यां दे विच्च करीं मौजां, रातीं खेडसां विच्च हवेलियां दे ।

68. रांझा

नाल नढ्ढियां घिन्न के चरखड़े नूं, तुसां बैठना विच्च भंडार हीरे ।

असीं रुलांगे आण के विच्च वेहड़े, साडी कोई ना लएगा सार हीरे ।

टिक्की देइ के वेहड़्युं कढ छड्डें, सानूं ठग के मूल ना मार हीरे ।

साडे नाल जे तोड़ निबाहुनी एं, सच्चा देह खां कौल करार हीरे ।

69. हीर

मैनूं बाबले दी सौंह रांझना वे, मरे माउं जे तुध थीं मुख मोड़ां ।

तेरे बाझ तुआम हराम मैनूं, तुध बाझ ना नैन ना अंग जोड़ां ।

ख़ुआजा खिज़र ते बैठ के कसम खाधी, थीवां सूर जे प्रीत दी रीत तोड़ां ।

कुहड़ी हो के नैन परान जावन, तेरे बाझ जे कौंत मैं होर लोड़ां ।

70. रांझे दा हीर नूं इशक विच्च पक्का करना

चेता मुआमले पैन ते छड्ड जाएं, इशक जालना खरा दुहेलड़ा ई ।

सच आखना ई हुने आख मैनूं, एहो सच ते झूठ दा वेलड़ा ई ।

ताब इशक दी झल्लनी खरी औखी, इशक गुरू ते जग सभ चेलड़ा ई ।

एथों छड्ड ईमान जे नस्स जासें, अंत रोज़ क्यामते मेलड़ा ई ।

71. हीर दा रांझे नूं चूचक कोल लिजाणा

तेरे नाउं तों जान कुरबान कीती, माल जीउ तेरे उतों वार्या ई ।

पासा जान दा सीस दी लायी बाज़ी, तुसां जित्त्या ते असां हार्यां ई ।

रांझा जीउ दे विच्च यकीन करके, महर चूचके पास सिधार्या ई ।

अग्गे पैंचनी होइ के हीर चल्ली, कोल रांझे नूं जाय खल्हार्या ई ।

72. हीर आपने बाप नूं

हीर जाय के आखदी बाबला वे, तेरे नाउं तों घोल घुमाईआं मैं ।

जिस आपने राज दे हुकम अन्दर, विच्च सांदल-बार खिडाईआं मैं ।

लासां पट्ट दियां पाय के बाग़ काले, पींघां शौक दे नाल पींघाईआं मैं ।

मेरी जान बाबल जीवे धौल राजा, माही महीं दा ढूंड ल्याईआं मैं ।

73. हीर दा बाप चूचक ते हीर

बाप हस के पुच्छदा कौन हुन्दा, इह मुंडड़ा कित सरकार दा है ।

हत्थ लायआं पिंडे ते दाग़ पैंद, इह महीं दे नहीं दरकार दा है ।

सुघड़ चतर ते अकल दा कोट नढ्ढा, मझ्झीं बहुत संभाल के चारदा है ।

माल आपना जान के सांभ ल्यावे, कोयी कंम ना करे वगार दा है ।

हक्के नाल प्यार दी हूंग दे के, सोटा सिंग ते मूल ना मारदा है ।

दिसे नूर अल्लाह दा मुखड़े ते, मनों रब ही रब चितारदा है ।

74. हीर दे बाप दा पुच्छणा

केहड़े चौधरी दा पुत कौद ज़ातों, केहा अकल शऊर दा कोट है नी ।

कीकूं रिज़क ने आण उदास कीता, एहनूं केहड़े पीर दी ओट है नी ।

फ़ौजदार वांगूं कर कूच धाणा, मार जिवें नकारे ते चोट है नी ।

किन्हां जट्टां दा पोतरा कौन कोई, केहड़ी गल्ल दी एस नूं त्रोट है नी ।

75. हीर ने बाप नूं दस्सणा

पुत्तर तख़त हज़ारे दे चौधरी दा, रांझा ज़ात दा जट्ट असील है जी ।

उहदा बूपड़ा मुख ते नैन निम्हे, कोयी छैल जेही उहदी डील है जी ।

मत्था रांझे दा चमकदा नूर भर्या, सख़ी जीउ दा नहीं बख़ील है जी ।

गल्ल सोहनी पर्हे दे विच्च करदा, खोजी लायी ते न्यांउं वकील है जी ।

76. चूचक

केहे डोगरां जट्टां दे न्याउं जाणे, पर्हे विच्च विलावड़े लाईआं दे ।

पाड़ झीड़ कर आंवदा कित्त देसों, लड़्या कास तों नाल इह भाईआं दे ।

किस गल्ल तों रुसके उठ आया, लड़्या कास तों नाल भरजाईआं दे ।

वारिस शाह दे दिल ते शौक आया वेखन मुख स्यालां दियां जाईआं दे ।

77. हीर

लायी होइ के मामले दस्स देंदा, मुनसफ हो वढ्ढे फाहे फेड़्यां दे ।

बाहों पकड़ के कंढे दे पार लावे, हथों कढ देंदा खोज झेड़्यां दे ।

वर्ही घत के कही दे पाड़ लाए, सत्थों कढ्ढ देंदा खोज झेड़्यां दे ।

धाड़ा धाड़वी तों मोड़ ल्यांवदा है, ठंड पांवदा विच्च बखेड़्यां दे ।

सभ रही रहुन्नी नूं सांभ ल्यावे, अक्खीं विच्च रखे वांग हेड़्यां दे ।

वारिस शाह जवान है भला रांझा, जित्थे नित्त पौंदे लख भेड़्यां दे ।

78. चूचक दी मनज़ूरी

तेर आखना असां मनज़ूर कीता, महीं दे संभाल के सारियां नी ।

ख़बरदार रहे मझीं विच्च खड़ा, बेले विच्च मुसीबतां भारियां नी ।

रला करे नाहीं नाल खंध्यां दे, एस कदे नाहीं मझीं चारियां नी ।

मतां खेड रुझ्झे खड़ियां जान मझ्झीं, होवन पिंड दे विच्च ख़ुआरियां नी ।

79. हीर ने मां नूं ख़बर दस्सणी

पास माउं दे नढड़ी गल्ल कीती, माही मझीं दा आण के छेड़्या मैं ।

नित्त पिंड दे विच्च विचार पौंदी, एह झगड़ा चाय निबेड़्या मैं ।

सुंञा नित्त रुले मंगू विच्च बेले, माही सुघड़ है आण सहेड़्या मैं ।

माएं करम जागे साडे मंगूआं दे, साऊ असल जटेटड़ा घेर्या मैं ।

80. रांझे नूं हीर दा उत्तर

मक्खन खंड परउंठे खाह मियां, महीं छेड़ दे रब दे आसरे ते ।

हस्सन गभ्भरू रांझ्या जाल मियां, गुज़र आवसी दुध दे कासड़े ते ।

हीर आखदी रब रज़्ज़ाक तेरा, मियां जाईं ना लोकां दे हासड़े ते ।

मझीं छेड़ दे झल्ल दे विच्च मियां, आप हो बहीं इक्क पासड़े ते ।

81. पंजां पीरां नाल मुलाकात

बेले रब दा नाउं लै जाय वड़्या, होया धुप दे नाल ज़हीर मियां ।

उहदी नेक सायत रुजू आण होई, मिले राह जांदे पंज पीर मियां ।

बच्चा खाह चूरी चोइ मझ बूरी, जीऊ विच्च ना होइ दिलगीर मियां ।

कायी नढड़ी सोहनी करो बख़शिश, पूरे रब दे हो तुसीं पीर मियां ।

बख़शी हीर दरगाह थीं तुध ताईं, याद करीं सानूं पवे भीड़ मियां ।

82. पीरां दी बखशिश

खुआजा ख़िज़र ते सक्कर गंज बोज़ घोड़ी, मुलतान दा ज़करिया पीर नूरी ।

होर सईअद्द जलाल बुख़ारिया सी, अते लाल शाहबाज़ बहशत हूरी ।

तुर्रा ख़िज़र रुमाल शक्कर गंज दित्ता, अते मुन्दरी लाल शहबाज़ नूरी ।

खंजर सईअद्द जलाल बुखख़ारीए ने, खूंडी ज़करीए पीर ने हिक्क बूरी ।

तैनूं भीड़ पवें करीं याद जट्टा, वारिस शाह ना जानना पलक दूरी ।

83. हीर दा भत्ता लै के बेले नूं जाणा

हीर चाय भत्ता खंड खीर मक्खन, मियां रांझे दे पास लै धांवदी है ।

तेरे वासते जूह मैं भाल थक्की, रो रो आपना हाल सुणांवदी है ।

कैदों ढूंडदा खोज नूं फिरे भौंदा, बास चूरी दी बेल्युं आंवदी है ।

वारिस शाह मियां वेखो टंग लंगी, शैतान दी कल्हा जगांवदी है ।

84. कैदो रांझे कोल

हीर गई जां नदी वल लैन पाणी, कैदो आण के मुख विखावांदा है ।

असीं भुख ने बहुत हैरान कीते, आन सवाल ख़ुदाय दा पांवदा है ।

रांझे रुग भर के चूरी चाय दित्ती, लै के तुरत ही पिंड नूं धांवदा है ।

रांझा हीर नूं पुच्छदा इह लंङां, हीरे कौन फ़कीर किस थाउं दा है ।

वारिस शाह मियां जिवें पच्छ के ते, कोयी उप्परों लून चा लांवदा है ।

85. हीर

हीर आख्या रांझ्या बुरा कीतो, साडा कंम है नाल वैराईआं दे ।

साडे खोज नूं तक के करे चुगली, दिने रात है विच्च बुर्याईआं दे ।

मिले सिरां नूं इह विछोड़ देंदा, भंग घत्तदा विच्च कुड़माईआं दे ।

बाबाल अंमड़ी ते जाय ठिठ करसी, जा आखसी पास भरजाईआं दे ।

86. तथा

हीर आख्या रांझ्या बुरा कीतो, तैं तां पुच्छना सी दुहरायके ते ।

मैं तां जाणदा नहीं सां इह सूहां, ख़ैर मंग्या सू मैथों आइके ते ।

खैर लैंदे ही पिछांह नूं परत भन्ना, उठ वग्या कंड वलायके ते ।

नेड़े जांदा हई जाय मिल नढ्ढीए नी, जाह पुच्छ लै गल्ल समझायके ते ।

वारिस शाह मियां उस थों गल्ल पुच्छीं, दो तिन्न अड्डियां हिक विच लायके ते ।

87. हीर दा कैदो नूं टक्करना

मिली राह विच्च दौड़ दे आ नढी, पहले नाल फ़रेब दे चट्ट्या सू ।

नेड़े आण के शीहनी वांग गज्जी ,अक्खीं रोह दा नीर पलट्ट्या सू ।

सिरों लाह टोपी गलों तोड़ सेल्ही, लक्कों चायके ज़िमीं ते स्ट्ट्या सू ।

पकड़ ज़मी ते मार्या नाल गुस्से, धोबी पटड़े ते खेस नूं छट्ट्या सू ।

वारिस शाह फरिशत्यां अरश उत्तों, शैतान नूं ज़िमीं ते स्ट्ट्या सू ।

88. हीर ने कैदों नूं ड्राउणा

हीर ढाय के आख्या मियां चाचा, चूरी देह जे जीव्या लोड़ना हैं ।

नहीं मार के जिन्द गवा देसां, मैनूं किसे ना हटकना होड़ना हैं ।

बन्न्ह पैर ते हत्थ लटकाय देसां, लड़ लड़कियां नाल की जोड़ना हैं ।

चूरी देह खां नाल हया आपे, काहे असां दे नाल अजोड़ना हैं ।

89. कैदों दा पर्हआ विच्च फ़र्याद करना

अद्धी डुल्ल्ह पई अद्धी खोह लई, चुन मेल के पर्हे विच ल्यांवदा ई ।

केहा मन्नदे नहीं साउ मूल मेरा, चूरी पल्ल्युं खोल विखांवदा ई ।

नाहीं चूचके नूं कोयी मत देंदा, नढी मार के नहीं समझांवदा ई ।

चाक नाल इकल्लड़ी जाए बेले, अज्ज कल कोयी लीक लांवदा ई ।

वारिस शाह जदोकना चाक रक्ख्या, ओस वेलड़े नूं पछोतांवदा ई ।

90. चूचक

चूचक आख्या कूड़ियां करें गल्लां, हीर खेडदी नाल सहेलियां दे ।

पींघां पइके सई्ईआं दे नाल झूटे, त्रिंञन जोड़दी विच्च हवेलियां दे ।

इह चुग़ल जहान दा मगर लग्गा, फ़क्कर जाणदे हो नाल सेल्हियां दे ।

कदी नाल मदारियां भंग घोटे, कदी जाय नच्चे नाल चेलियां दे ।

नहीं चूहड़े दा पुत्त होए सईअद, घोड़े होन नाहीं पुत्त लेलियां दे ।

वारिस शाह फ़कीर भी नहीं हुन्दे, बेटे जट्टां ते मोचियां तेलियां दे ।

91. हीर दी मां कोल औरतां वल्लों चुग़ली

मां हीर दी थे लोक करन चुग़ली, महरी मलकीए धी ख़राब है नी ।

असीं मासियां फुफियां लज मोईआं, साडा अन्दरों जीउ कबाब है नी ।

शमसुद्दीन काज़ी नित करे मसले, शोख़ धी दा व्याह सवाब है नी ।

चाक नाल इकल्लियां जान धियां, होया माप्यां धुरों जवाब है नी ।

तेरी धी दा मग़ज़ है बेग़मां दा, वेखो चाक ज्युं फिरे नवाब है नी ।

वारिस शाह मूंह उंगलां लोक घत्तन, धी मलकी दी पुज्ज ख़राब है नी ।

92. कैदो दी हीर दी मां कोल चुग़ली

कैदो आखदा धी व्याह मलकी, धरोही रब दी मन्न लै डायने नी ।

इक्के मार के वढ्ढ के करसु बेरे, मूंह सिर भन्न चोआं साड़ सायने नी ।

वेख धी दा लाड की दन्द कढ्ढें, बहुत झूरसें रन्ने कसायने नी ।

इक्के बन्न्ह के भोहरे चा घत्तो, लिम्ब वांग भड़ोले दे आयने नी ।

93. मलकी दा ग़ुस्सा

ग़ुस्से नाल मलकी तप लाल होई, झब्ब दौड़ तूं मिट्ठीए नायने नी ।

सद ल्या तूं हीर नूं ढूंड के ते, तैनूं माउं सदेंदी है डायने नी ।

नी खड़दुम्बीए मूने पाड़्हीए नी, मुशटंडीए बार दीए वायने नी ।

वारिस शाह वांगूं किते डुब मोएं, घर आ स्यापे दीए नायने नी ।

94. हीर दा मां कोल आउणा

हीर आइ के आखदी हस्स के ते, अनी झात नी अम्बड़ीए मेरीए नी ।

तैनूं डूंघड़े खूह विच्च चाय बोड़ां, कुल्ल पट्टीउ बचड़ीए मेरीए नी ।

धी जवान जे किसे दी बुरी होवे, चुप कीतड़े चा नबेड़ीए नी ।

तैनूं वड्डा उदमाद आ जाग्या ए तेरे वासते मुनस सहेड़ीए नी ।

धी जवान जे निकले घरों बाहर, लग्गे वस्स तां खूह नघेरीए नी ।

वारिस ज्युंदे होन जे भैन भाई, चाक चोबरां नांह सहेड़ीए नी ।

95. मां ने हीर नूं ड्राउणा

तेरे वीर सुलतान नूं ख़बर होवे, करे फिकर उह तेरे मुकावने दा ।

चूचक बाप दे राज नूं लीक लाईआ, केहा फ़ायदा माप्यां तावने दा ।

नक वढ्ढ के कोड़मां गाल्यु ई होया फ़ायदा लाड लडावने दा ।

रातीं चाक नूं चाय जवाब देसां, नहीं शौक ए महीं चरवाने दा ।

आ मिट्ठीए लाह नी सभ गहणे, गुन की है गहण्यां पावने दा ।

वारिस शाह मियां छोहरी दा, जीउ होया ई लिंग कुटावने दा ।

96. हीर दा उत्तर

माए रब्ब ने चाक घर घल्ल्या सी, तेरे होन नसीब जे धुरों चंगे ।

इहो जहे जे आदमी हत्थ आवन, सारा मुलक ही रब थीं दुआ मंगे ।

जेहड़े रब कीते कंम होइ रहे, सानूं मांयों क्युं ग़ैब दे दएं पंगे ।

कुल्ल स्याण्यां मलक नूं मत्त दित्ती, तेग़ महरियां इशक ना करो नंगे ।

नहीं छेड़ीए रब्ब द्यां पूर्यां नूं, जिन्हां कप्पड़े ख़ाक दे विच्च रंगे ।

जिन्हां इशक दे मामले सिरीं चाए, वारिस शाह ना किसे थों रहन संगे ।

97. हीर दे मां प्यु दी सलाह

मलकी आख़दी चूचका बनी औखी, सानूं हीर द्यां मेहण्यां ख़ुआर कीता ।

ताहने देन शरीक ते लोक सारे, चौतरफ्युं खुआर संसार कीता ।

वेखो लज्ज स्यालां दी लाह सुट्टी, नढी हीर ने चाक नूं यार कीता ।

जां मैं मत्त दित्ती अग्गों लड़न लग्गी, लज्ज लाह के चशम नूं चार कीता ।

कढ्ढ चाक नूं खोह लै महीं सभ्भे, असां चाक थों जीउ बेज़ार कीता ।

इक्के धी नूं चाघड़े डोब करीए, जाणों रब ने चा गुन्हागार कीता ।

झब्ब व्याह कर धी नूं कढ्ढ देसों, सानूं ठिठ है एस मुरदार कीता ।

वारिस शाह नूं हीर फ़ुआर कीता, नहीं रब्ब सी साहब सरदार कीता ।

98. चूचक

चूचक आखदा मलकीए जंमदी नूं, गल घुटके काहे ना मार्यु ई ।

घुट्टी अक्क दी घोल ना दित्तिया ई उह अज्ज सवाब नितार्यु ई ।

मंझ डूंघड़े वहन ना बोड़्या ई वढ्ढ बोड़ के मूल ना मार्यु ई ।

वारिस शाह ख़ुदा दा ख़ौफ़ कीतो, कारूं वांग ना ज़िमीं निघार्यु ई ।

99. चूचक रांझे नूं

रातीं रांझे ने महीं जां आण ढोईआं, चूचक स्याल मत्थे वट्ट पायआ ई ।

भायी छड्ड महीं उठ जा घर नूं, तेरा तौर बुरा नज़र आया ई ।

स्याल कहे भायी साडे कंम नाहीं, जाए उधरे जिधरों आया ई ।

असां सान्ह ना रख्या नढ्ढियां दा, धियां चारनियां किस बतायआ ई ।

'इत्तकव्वा मवाज़ि अतुहम', वारिस शाह इह धुरों फ़ुरमायआ ई ।

100. चूचक ते रांझा

'वल्लो बसत अलहु रिज़क लइबादह', रज्ज खायके मसतियां चाईआं नी ।

'कुलू वशरबू' रब्ब ने हुकम दित्ता, नहीं मसतियां लिखियां आईआं नी ।

कित्थों पचन इहनां मुशटंड्यां नूं, नित्त खाणियां दुध मलाईआं नी ।

'वमा मिन दआबत्तनि फ़िल अरज़', इह आइतां धुरों फ़ुरमाईआं नी ।

वारिस शाह मियां रिज़क रब्ब देसी, इह लै सांभ मझ्झीं घर आईआं नी ।

101. रांझे ने चूचक दे घरों चले जाणा

रांझा स्ट्ट खूंडी उतों लाह भूरा, छड्ड चल्या सभ मंगवाड़ मियां ।

जेहा चोर नूं थड़े दा खड़क पहुंचे छड्ड टुरे है सन्न्ह दा पाड़ मियां ।

दिल चायआ देस ते मुलक उतों, उहदे भाय दा बोल्या हाड़ मियां ।

तेरियां खोलियां चोरां दे मिलन सभे, खड़े कट्टियां नूं कायी धाड़ मियां ।

मैनूं मझीं दी कुझ्झ परवाह नाहीं, नढ्ढी पई सी इत्त रेहाड़ मियां ।

तेरी धी नूं असीं की जाणने हां, तैनूं आउंदी नज़र पहाड़ मियां ।

तेरियां मझ्झां दे कारने रात अद्धी, फिरां भन्नदा कहर दे झाड़ मियां ।

मंगू मगर मेरे सभो आंवदा ई मझीं आपणियां महर जी ताड़ मियां ।

घुट बहें चरायी तूं माहियां दी, सही कीतो ई कोयी किराड़ मियां ।

महीं चारदे नूं हो गए माह बारां, अज्ज उठ्या अन्दरों साड़ मियां ।

वही खतरी दी रही खतरी ते, लेखा ग्या ई होइ पहाड़ मियां ।

तेरी धी रही तेरे घरे बैठी, झाड़ा मुफ़त दा ल्या ई झाड़ मियां ।