زائر و عرض کرو جب شہِ ذیشاں کو سلام

زائر و عرض کرو جب شہِ ذیشاں کو سلام

ہم غریبوں کا بھی سلطانِ غریباں کو سلام

پیش کرنا بہ کمالِ ادب و شوقِ نیاز

قبلۂ اہل وفا، کعبۂ ایماں کو سلام

یاد رکھنا حرم پاک کے جانے والو

اس گنہگار کا بھی رحمتِ یزداں کو سلام

بھول جانا نہ کہیں وقتِ تلاوت لللہ

مہبطِ روحِ امیں حامل قرآں کو سلام

خوابگاہِ شہِ کونین پہ ہر لحظہ درود

سحر و شام مرے حاصلِ ایماں کو سلام

گوشہ گوشہ پہ شبستانِ رسالت کے درود

روضہ و منبر و محرابِ درخشاں کو سلام

قبۂ نور پہ ہوتے ہیں جو قرباں ہمہ شب

ان ستاروں کو سلام اس مہ تاباں کو سلام

جس سے ہوتی ہیں مری ہجر کی راتیں روشن

حرم قدس کی اس شعِ شبستاں کو سلام

فرشِ پا رہتی ہے جو صحنِ حرم میں ہر سو

اس شبِ ماہ کو اس صبح درخشاں کو سلام

جس سے روشن ہوئے دل ہم سے سیہ کاروں کے

اس درِ پاک کی قندیلِ فروزاں کو سلام

گنبدِ سبز کا ہر روز جو کرتی ہیں طواف

ان شعاعوں کو اور اُس مہرِ درخشاں کو سلام

روضۂ خلد میں جو محوِ عبادت ہوں گے

ان کے حسن نظر و چہرۂ تاباں کو سلام

درِ اقدس پہ جو مصروفِ گہر باری ہو

نگہِ شوق کا اس دیدۂ گریاں کو سلام

وہ جو احساسِ ندامت سے ہو طوفاں بہ کنار

ڈبڈبائی ہوئی اس چشمِ پشیماں کو سلام

گم جو ہو جلوۂ بے رنگ کے نظارے میں

دلِ مشتاق کا اس دیدۂ حیراں کو سلام

باصد اخلاص و بہ اندازِ غلامی کہنا

حرم پاک کے ہر خادم و درباں کو سلام

دل کو دل چشمِ توجہ سے بنایا جس نے

دل سے اس راہبرِ منزلِ عرفاں کو سلام

جن کو حاصل ہے شرف آپ کی پابوسی کا

ان گلی کوچوں کے ذراتِ درخشاں کو سلام

جو پھرا کرتے ہیں مستوں کی طرح گلیوں میں

ان سگانِ بلدِ شاہِ رسولاں کو سلام

نگہِ سرورِ کونین پڑی ہے جس پر

اس رہ و منزل و کہسار و بیاباں کو سلام

اک نظر کوہِ احد پر مری خاطر پہلے

پھر اسی وادیِ فردوس بداماں کو سلام

محوِ آرام ہیں جس خاک پہ اصحابِ احد

ایک مہجور کا اس گنجِ شہیداں کو سلام

کیف و مستی میں فراموش نہ ہوں اہلِ بقیع

جملہ اصحابِ شہنشاہِ رسولاں کو سلام

جس میں ہر لحظہ مہکتی ہے نسیمِ رحمت

اس گلستاں کو سلام اہلِ گلستاں کو سلام

رنگ و نکہت پہ شمیمِ چمنِ خلد نثار

غنچہ و لالہ و گل سنبل و ریحاں کو سلام

جس میں ہے خلد در آغوش قبا کی مسجد

اس خیاباں کو سلام اس چمنستاں کو سلام

سازِ دل گونج اٹھا کیفِ نواسنجی سے

چمنِ طیبہ کے مرغانِ خوش الحاں کو سلام

جن کے صدقے میں خلش ہوتی ہے اب تک دل میں

سنگریزوں کو اور ان خارِ مغیلاں کو سلام

جذبۂ شوق کے عالم میں ذرا یاد رہے

قافلے والوں کو اور ان کے حدی خواں کو سلام

مست و سرشار نظر آئیں جو کچھ ناقہ سوار

ان کے بکھرے ہوئے گیسوئے پریشاں کو سلام

جس جگہ کرتے ہیں حجاج پہنچ کر منزل

ان مقامات کو ان کوہ و بیاباں کو سلام

پاپیا دہ جو ملے راہ میں دیوانۂ شوق

اس غریب الوطن و بے سر و ساماں کو سلام

غازۂ خاکِ رہِ شوق ہو جس کے رخ پر

اس کے ذوقِ طلب و رنگِ پریشاں کو سلام

نعت پڑھتا ہوا مل جائے جو کوئی یمنی

غائبانہ مرا اس مست و غزل خواں کو سلام

رحمتِ حق سے میسر ہوں وہ دن کاش حمیدؔ

خود کریں عرض شہنشاہِ رسولاں کو سلام