یہ نام خدا کس کا نام آرہا ہے

یہ نام خدا کس کا نام آ رہا ہے

زباں پر درود و سلام آ رہا ہے

نجات امم کا پیام آ رہا ہے

جہاں میں رسول انام آ رہا ہے

پئے تشنہ کا مان صہبائے وحدت

کوئی آج کوثر بجام آ رہا ہے

بتوں کا عمل اٹھ رہا ہے حرم سے

کہ مختار بیت الحرام آ رہا ہے

مبارک ہو فتنوں کو تا حشر سونا

کہ اب دور امن و سلام آ رہا ہے

یہ قرآن ناطق یہ آئین محکم

خدا کا مکمل نظام آ رہا ہے

لطافت کی دریا فصاحت کا کوثر

کلام بلاغت نظام آ رہا ہے

صف انبیا کیا ہے تاروں کا جھرمٹ

ستاروں میں یہ ماہ تمام آ رہا ہے

فلک جھک رہا ہے زمیں ہے مؤدب

شہ عرش اعظم خرام آ رہا ہے

محمد کی سرکار اللہ اکبر

خدا کا برابر سلام آ رہا ہے

عقیدت کے کچھ پھول دامن میں لے کر

سلامی کو تیرا غلام آ رہا ہے

اسے بھی عنایت ہو اک جام کوثر

ترا مسلمؔ تشنہ کام آ رہا ہے