ملا ہے تجھ کو گو قرآن بسم اللہ کا سہرہ

ملا ہے تجھ کو گو قرآن بسم اللہ کا سہرہ

مزین ہے مرے احمد کو الا اللہ کا سہرہ

نہ سر پر باندھتے اپنے تو نیرنگی نہ یہ ہوتی

بہارِ آفرینش ہے رسول اللہ کا سہرہ

شبِ معراج کو جب وہ ریاضِ قرب میں پہنچے

گندھا کر حق سے لائے ہیں حبیب اللہ کا سہرہ

نکالا دل سے ابراہیم نے جب غیر کو اس کے

عطا حق نے کیا ان کو خلیل اللہ کا سہرہ

ملائک گر پڑے سجدہ میں فوراً روبرو اس کے

نگاہِ حق سے جب دیکھا صفی اللہ کا سہرہ

ہمیشہ شاد ہو طالب وصالِ شاہدِ حق سے

اگر تو باندھ لے سر پر فنا فی اللہ کا سہرہ

وہی سالک ہوا محرم ترے رازِ حقیقت کا

چڑھایا جس کے سر قدرت نے ھواللہ کا سہرہ

کیا ہے جان و دل قربان اس پہ میں نے اے واعظ

نظر آیا ہے جب سے ثم وجہ اللہ کا سہرہ

جو ہوکر خود سے پیدا پھر گیا دنیا سے سوئے حق

یقیناً پا لیا اس نے بقابا للہ کا سہرہ

اسدؔ اس کو اٹھادیں گر تو پھر وہ خود نہیں رہتا

تعین جس کو کہتے ہیں یہ ہے اللہ کا سہرہ