Qabr Shayari

dafn huuñ ehsās kī sadiyoñ purānī qabr meñ

zindagī ik zaḳhm hai aur zaḳhm bhī taaza nahīñ

dafn hun ehsas ki sadiyon purani qabr mein

zindagi ek zaKHm hai aur zaKHm bhi taza nahin

mil chuke ab milne vaale ḳhaak ke

qabr par jā jā ke royā kījiye

mil chuke ab milne wale KHak ke

qabr par ja ja ke roya kijiye

ba'd marne ke mai-e-ishq kī ḳhushbū mahke

Daal do ḳhaak mire qabr pe mai-e-ḳhāne kī

ba'd marne ke mai-e-ishq ki KHushbu mahke

Dal do KHak mere qabr pe mai-e-KHane ki

ye vo badlā hai sañg-e-āstāñ kī jabha-sā.ī kā

ki aa.e aur merī qabr par apnī jabīñ rakh dī

ye wo badla hai sang-e-astan ki jabha-sai ka

ki aae aur meri qabr par apni jabin rakh di

tum qabr par aa.e ho mirī phuul chaḌhāne

mujh par hai girāñ sāya-e-barg-e-gul-e-tar bhī

tum qabr par aae ho meri phul chaDhane

mujh par hai giran saya-e-barg-e-gul-e-tar bhi

ro ke farmāte haiñ vo shab ko jo ham yaad aa.e

goshā-e-qabr meñ sote haiñ jagāne vaale

ro ke farmate hain wo shab ko jo hum yaad aae

gosha-e-qabr mein sote hain jagane wale

raat ga.e yuuñ dil ko jaane sard havā.eñ aatī haiñ

ik darvesh kī qabr pe jaise raqqāsā.eñ aatī haiñ

raat gae yun dil ko jaane sard hawaen aati hain

ek darwesh ki qabr pe jaise raqqasaen aati hain

kyuuñ 'mashriqī'-e-ġham-zada kā dil na ho bechain

ab qabr kī hai jaan jo jānāna-e-dil thā

kyun 'mashriqi'-e-gham-zada ka dil na ho bechain

ab qabr ki hai jaan jo jaanana-e-dil tha

vahī ab ba.ad-e-murdan qabr par aañsū bahāte haiñ

na aayā thā jinheñ merī mohabbat kā yaqīñ barsoñ

wahi ab baad-e-murdan qabr par aansu bahate hain

na aaya tha jinhen meri mohabbat ka yaqin barson

ba-ḳhudā qabr kī ho jā.egī mushkil āsāñ

saath lāsha ke chaleñge jo vo do-chār qadam

ba-KHuda qabr ki ho jaegi mushkil aasan

sath lasha ke chalenge jo wo do-chaar qadam

maiñ vo gul huuñ na fursat dī ḳhizāñ ne jis ko hañsne kī

charāġh-e-qabr bhī jal kar na apnā gul-fishāñ hogā

main wo gul hun na fursat di KHizan ne jis ko hansne ki

charagh-e-qabr bhi jal kar na apna gul-fishan hoga

qabr par merī agar fātiha paḌhne ke liye

vo jo aa jaa.eñ to tharrā uThe turbat merī

qabr par meri agar fatiha paDhne ke liye

wo jo aa jaen to tharra uThe turbat meri

hasīn bhī huuñ ḳhush-āvāz bhī farishta-e-qabr

kaTī hai umr hasīnoñ se guftugū karte

hasin bhi hun KHush-awaz bhi farishta-e-qabr

kaTi hai umr hasinon se guftugu karte

vo log manzil-e-pīrī meñ haiñ jo aa.e hue

ḳhayāl-e-qabr meñ baiThe haiñ sar jhukā.e hue

wo log manzil-e-piri mein hain jo aae hue

KHayal-e-qabr mein baiThe hain sar jhukae hue

qabr meñ hai aaj o parda-nashīñ

le tire rusvā ne bhī pardā kiyā

qabr mein hai aaj o parda-nashin

le tere ruswa ne bhi parda kiya

pas-e-murdan to mujh ko qabr meñ rāhat se rahne do

tumhārī Thokaroñ se uḌtā hai ḳhāka qayāmat kā

pas-e-murdan to mujh ko qabr mein rahat se rahne do

tumhaari Thokaron se uDta hai KHaka qayamat ka

nāz-e-gul kā shahīd hai jo 'fanā'

qabr per gulruḳhoñ kā melā hai

naz-e-gul ka shahid hai jo 'fana'

qabr per gulruKHon ka mela hai

rañg lā.egā mirā soz-e-mohabbat qabr meñ

ustuḳhvāñ ho jā.egā sho.ale kafan jal jā.egā

rang laega mera soz-e-mohabbat qabr mein

ustuKHwan ho jaega shoale kafan jal jaega

fātiha paḌhte rahe hañste rahe rote rahe

qabr par aa kar unhoñne qaul puurā kar diyā

fatiha paDhte rahe hanste rahe rote rahe

qabr par aa kar unhonne qaul pura kar diya

ye kaahe ko aatī mirī qabr meñ

qayāmat hai un kī satā.ī huī

ye kahe ko aati meri qabr mein

qayamat hai un ki satai hui

balā hai qabr kī shab is se baḌh ke hashr ke din

na aa.uuñ hosh meñ itnī mujhe pilā denā

bala hai qabr ki shab is se baDh ke hashr ke din

na aaun hosh mein itni mujhe pila dena

saaqī ne pas-e-murdan pyāsā na mujhe chhoḌā

ik abr ke TukḌe se mai qabr pe barsā dī

saqi ne pas-e-murdan pyasa na mujhe chhoDa

ek abr ke TukDe se mai qabr pe barsa di

phir vo aa jaatā kisī din qabr par

ik nishān-e-be-nishānī aur hai

phir wo aa jata kisi din qabr par

ek nishan-e-be-nishani aur hai

vahshat na qabr meñ ho tum sāmne hī rahnā

dast-e-junūñ na merā bāhar kafan se nikle

wahshat na qabr mein ho tum samne hi rahna

dast-e-junun na mera bahar kafan se nikle

qabr par dāman-kashāñ hī aao aao to sahī

phir jhaTak denā hamārī ḳhāk-e-dāman-gīr ko

qabr par daman-kashan hi aao aao to sahi

phir jhaTak dena hamari KHak-e-daman-gir ko

u'mar-bhar yād-e-durr-e-dandāñ meñ maiñ giryāñ rahā

qabr per juz dāman-e-shabnam koī chādar na ho

u'mar-bhar yaad-e-durr-e-dandan mein main giryan raha

qabr per juz daman-e-shabnam koi chadar na ho

ye dil kī taḌap kyā lahad ko hilātī

tumheñ qabr par paañv dharnā na aayā

ye dil ki taDap kya lahad ko hilati

tumhein qabr par panw dharna na aaya

nek-o-bad do hī amal jaate haiñ dam ke saath saath

qabr meñ shāmil mere ye ban ke rahbar do ga.e

nek-o-bad do hi amal jate hain dam ke sath sath

qabr mein shamil mere ye ban ke rahbar do gae

jaate jaate arsa-gāh-e-hashr tak jo haal ho

uThte uThte qabr meñ sau fitna-e-mahshar uThe

jate jate arsa-gah-e-hashr tak jo haal ho

uThte uThte qabr mein sau fitna-e-mahshar uThe

charāġh ḳhuub huā mere qabr pe na jalā

idhar udhar ke patañge ġharīb jal jaate

charagh KHub hua mere qabr pe na jala

idhar udhar ke patange gharib jal jate

ātish-e-furqat se 'sādiq' āblā-tan hogā

qabr meñ rakhnā pas-e-murdan b-āsānī mujhe

aatish-e-furqat se 'sadiq' aabla-tan hoga

qabr mein rakhna pas-e-murdan b-asani mujhe

añdherā qabr kā dekhā to phir yaad aa ga.e gesū

maiñ samjhā thā ki ab maiñ tere kākul se nikal aayā

andhera qabr ka dekha to phir yaad aa gae gesu

main samjha tha ki ab main tere kakul se nikal aaya