قبر پر اشعار

دفن ہوں احساس کی صدیوں پرانی قبر میں

زندگی اک زخم ہے اور زخم بھی تازہ نہیں

مل چکے اب ملنے والے خاک کے

قبر پر جا جا کے رویا کیجیے

بعد مرنے کے مئےعشق کی خوشبو مہکے

ڈال دو خاک مری قبر پے مے خانے کی

میں وہ گل ہوں نہ فرصت دی خزاں نے جس کو ہنسنے کی

چراغ قبر بھی جل کر نہ اپنا گل فشاں ہوگا

یہ وہ بدلا ہے سنگ آستاں کی جبہ سائی کا

کہ آئے اور میری قبر پر اپنی جبیں رکھ دی

تم قبر پر آئے ہو مری پھول چڑھانے

مجھ پر ہے گراں سایۂ برگ گل تر بھی

رو کے فرماتے ہیں وہ شب کو جو ہم یاد آئے

گوشۂ قبر میں سوتے ہیں جگانے والے

وہی اب بعد مردن قبر پر آنسو بہاتے ہیں

نہ آیا تھا جنہیں میری محبت کا یقیں برسوں

بلا ہے قبر کی شب اس سے بڑھ کے حشر کے دن

نہ آؤں ہوش میں اتنی مجھے پلا دینا

قبر پر میری اگر فاتحہ پڑھنے کے لئے

وہ جو آ جائیں تو تھرا اٹھے تربت میری

حسین بھی ہوں خوش آواز بھی فرشتۂ قبر

کٹی ہے عمر حسینوں سے گفتگو کرتے

وہ لوگ منزل پیری میں ہیں جو آئے ہوئے

خیال قبر میں بیٹھے ہیں سر جھکائے ہوئے

بخدا قبر کی ہو جائے گی مشکل آساں

ساتھ لاشہ کے چلیں گے جو وہ دو چار قدم

رات گئے یوں دل کو جانے سرد ہوائیں آتی ہیں

اک درویش کی قبر پہ جیسے رقاصائیں آتی ہیں

کیوں مشرقیؔ غم زدہ کا دل نہ ہو بے چین

اب قبر کی ہے جان جو جانانۂ دل تھا

وحشت نہ قبر میں ہو تم سامنے ہی رہنا

دست جنوں نہ میرا باہر کفن سے نکلے

قبر میں ہے آج او پردہ نشیں

لے ترے رسوا نے بھی پردا کیا

پس مردن تو مجھ کو قبر میں راحت سے رہنے دو

تمہاری ٹھوکروں سے اڑتا ہے خاکہ قیامت کا

ناز گل کا شہید ہے جو فناؔ

قبر پر گل رخوں کا میلہ ہے

رنگ لائے گا مرا سوز محبت قبر میں

استخواں ہو جائے گا شعلے کفن جل جائے گا

فاتحہ پڑھتے رہے ہنستے رہے روتے رہے

قبر پر آ کر انہوں نے قول پورا کر دیا

یہ کاہے کو آتی مری قبر میں

قیامت ہے ان کی ستائی ہوئی

عمر بھر یاد در دنداں میں میں گریاں رہا

قبر پر جز دامن شبنم کوئی چادر نا ہو

قبر پر دامن کشاں ہی آؤ آؤ تو سہی

پھر جھٹک دینا ہماری خاک دامن گیر کو

یہ دل کی تڑپ کیا لحد کو ہلاتی

تمہیں قبر پر پاؤں دھرنا نہ آیا

نیک و بد دو ہی عمل جاتے ہیں دم کے ساتھ ساتھ

قبر میں شامل میرے یہ بن کے رہبر دو گئے

ساقی نے پس مردن پیاسا نہ مجھے چھوڑا

اک ابر کے ٹکڑے سے مے قبر پہ برسا دی

پھر وہ آ جاتا کسی دن قبر پر

اک نشان بے نشانی اور ہے

جاتے جاتے عرصہ گاہ حشر تک جو حال ہو

اٹھتے اٹھتے قبر میں سو فتنۂ محشر اٹھے

چراغ خوب ہوا میرے قبر پر نا جلا

ادھر ادھر کے پتنگے غریب جل جاتے

آتش فرقت سے صادقؔ آبلہ تن ہو گیا

قبر میں رکھنا پس مردن بہ آسانی مجھے

اندھیرا قبر کا دیکھا تو پھر یاد آ گئے گیسو

میں سمجھا تھا کہ اب میں تیرے کاکل سے نکل آیا