مطالعہ ملفوظاتِ خواجگانِ چشت کے مبادیات (خواجگانِ چشت کے ملفوظات کی روشنی میں)

اساطیر الاولین :- قرآن پاک میں جو قصّے انبیائے سے سابقین کے منقول ہیں، انہیں اُس عہد کے یہود و نصاریٰ اساطیر الاولین سے تعبیر کیا کرتے تھے، قرآن پاک میں ہے۔

و اذا تتلیٰ علیھم اٰیاتُنا قالوا قد سمعنا لو نشآءُ لقنا مثل ھٰذا اِن ھٰذا الاّ اساطیرالاوّلین (سورہ انفا4)

جب اُن کے سات ہماری آیتیں پڑھی جاتی ہیں تو وہ کہتے ہیں کہ ہم نے سُن لیا، ہم چاہیں تو ہم بھی ایسے قصے بیان کر دیں، یہ تو پہلوں کی کہانیاں ہیں، جن واقعات کو قرآن پاک میں دہرا دیا گیا ہے وہ مقصدقہ ہیں، ان کے بیان کرنےمیں تو کلام ہی نہیں مگر ان کے علاوہ جو بھی ہیں وہ اساطیر الاولین ہی ہیں جو یہود و نصاریٰ کا علمی سرمایہ ہیں اگر ان میں شرک و کفر کی آمیزش نہیں ہے تو ان کے بیان میں بھی کچھ مضائقہ نہیں ہے اور ان کے ذکر و اذکار کی ممانعت بھی نہیں ہے، ایسے ہی قصص و حکایات سے بہت سی ضرب الامثال اور کہاوتیں وجود میں آئی ہیں مثلاً ہر فرعونے را موسیٰ طوفانِ نوح لحنِ داودی، صبر ایوب، گریۂ یعقوب، خرِ عیسیٰ ان سے تلمیح، اور استعارہ و کنایہ کا کام لیا جاتا ہے اور مختصر سے بیان میں بہت کچھ کہہ دیا جاتا ہے، مسلمانوں نے علمی مسائل میں کبھی تعصب و تنگ نظری سے کام نہیں لیا وہ علم و حکمت کو اپنا ہی گم گشتہ سرمایہ تصور کرتے تھے، اس باب میں ان کی سر چشمی ہر کہیں جلوہ گر ہے، لہٰذا حسبِ ضرورت اساطیر الاولین سے بھی خاطر خواہ کام لیا جاسکتا ہے، اس میں کچھ مضائقہ نہیں، بشرطیکہ اسلامی تعلیمات کے خلاف نہ ہو۔

اسرائیلیات:- ابنیاء بنی اسرائیل کے بعض حالات و واقعات اور قصص قرآن پاک میں مذکور ہیں، ان کے علاوہ کچھ حالات و واقعات اور قصص علمائے بنی اسرائیل کے علم میں تھے، ان میں بعض تو ایسے عالم تھے جو باتوں کو چھپاتے تھے بلکہ مقدس کتاب توریت میں تحریف کردیا کرتے تھے، ان کی باتوں پر اگرچہ بھروسہ نہیں کیا جاسکتا تھا لیکن انکار کے لئے بھی قوی دلیل نہ تھی، اُن کے متعلق حضور اکرم صلی اللہ علیہ وسلم کا اشار یہ ہے۔

لاتصدّقوھم ولا تکذبوھم۔

ترجمہ :- نہ تو ان کی تصدیق کرو اور نہ تکذیب کرو۔

بعض توریت مقدس کی پیشین گوئیوں پر غور کرتے اور حق کی تائید کرتےتھے، ورقہ بن نوفل اور عبداللہ بن سلام ایسے ہی حق پرستوں میں سے تھے، ایسے علمائے بنی اسرائیل کے متعلق حضور اکرم صلی اللہ علیہ وسلم کا یہ ارشاد ہے۔

حدّثوا عن بنی اسرئیل ولا حرج۔

ترجمہ :- بنی اسرایل سے بیانات نقل کرو اس میں حرج نہیں ہے۔

لہٰذا بعض واقعات و حالات اور قصص جو مفسرین نے علمائے بنی اسرائیل سے نقل کئے ہیں اور جنہیں اسرائیلیات کہتے ہیں، ان سے استفادہ میں کچھ مضائقہ نہیں، بشرطیکہ ان کے اندر کوئی ایسی بات نہ ہو جو انبیاء علیھم السلام کی شان اور اسلامی تعلیمات کے خلاف ہو، انہی کے متعلق حضور اکرم صلی اللہ علیہ وسلم نے لا حرج فرمایا ہے لیکن جو روایات بنی اسرائیل سے متعلق نہیں، انہیں اسرائیلیات سے تعبیر کرنا صحیح نہیں، خرقہ و گلیم، کلاہ و طاقیہ کو اسرائیلیات میں شمار کرنا یا خرافات بتانا درست نہیں ہے وہ در اصل علامات ہیں اصولِ سلوک کی پابند ہی کی، جیسا کہ عہدِ حاضر میں بیچ کی نوعیت ہے جو درویش خلافت ورزی کرتا تو اس سے یہ علامات ضبط کرلی جاتی تھیں۔

یوسف زلیخا:- حضرت یوسف علیہ السلام کے قصّے کی تصدیق قرآن پاک سے ہوتی ہے، قرآن پاک میں اس قصّے کو احسن القصص کے لقب سے ذکر کیا گیا ہے جتنا کچھ قرآن پاک میں ہے وہ جامع و مستند ہے مگر اس قصّے کی بعض روایات سے اہلِ کتاب کے علماء واقف تھے اگر چہ ان کا وہ مقام نہیں جو قرآن پاک کے بیان کا ہے تاہم اس میں شرک و کفر کی آمیزش بھی نہیں ہے، اس لئے حدثوا عن بنی اسرائیل ولا حرج کے حکم میں داخل نہیں، بعض علمائے اسلام خصوصاً مفسرین نے ان روایات کو جس طرح سنا نقل کردیا ہے، صوفیائے کرام نے بھی ان روایات سے استفادہ کیا ہے۔

حضرت داتا گنج بخش لاہوری سید علی ہجویری (المتوفیٰ 465 ہجری مطابق 1072 عیسوی) لکھتے :-

چوں یوسف بایعقوب رسید، خداند دیر اوصال یوسف کرامت کرد، زلیخا را جوان کرد، باسلام راہ نمود و بزنی یوسف داد، یوسف قصدے کرد، زلیخا از وے گریخت۔

(کشف المحجوب، صفحہ 262)

ترجمہ :- جب حضرت یوسف حضرت یعقوب کے پاس پہنچے اور اللہ پاک نے انہیں یوسف سے ملایا، زلیخا کو جوان کیا اور اسلام قبول کرنے کی توفیق دی اور حضرت یوسف کی زوجہ بنایا یوسف نے ان کا ارادہ کیا تو زلیخا نے آپ سے گریز کی۔

مولانا جامی نے مثنوی یوسف زلیخا کو اسی آب و رنگ سے رشکِ بہار بنایا ہے، فرماتے ہیں۔

چوں فرماں یافت یوسف از خداوند

کہ بند ویا زلیخا عقد پیوند

بقا نونِ خلیل و دینِ یعقوب

برآئینِ جمیل و صورتِ خوب

زلیخا را بعقدِ خود در آورد

بعقد خویش یکتا گوہر آورد

چو صدقش بود بیروں از نہایت

بآخر کرد در یوسف سرایت

شبے از چنگ یوسف شد گریزاں

خلاصی چیست از افتان وخیزاں

چو ز دوست از قفا در دامنِ او

زدستش چاک شد پیراہنِ او

زلیخا گفت اگر من برتنِ تو

دریدم پیشِ ازیں پیراہن تو

تو ہم پیراہنم اکنوں دردیدی

بپاداشِ گناہِ من رسیدی

حضرت یوسف اور حضرتِ زلیخا کے نکاح کا ذکرِ خیر ہمارے ادب تصوف اور اسلامی روایات کی زینت ہے، حضرت بابا صاحب کی زبانِ مبارک پر بھی آیا ہے، آپ نے غلباتِ شوق میں ارشاد فرمایا۔

چوں مہتر یوسف علیہ السلام پیغامبر صلٰوۃ اللہ علیہ زلیخا را بخواست و زلیخادر دین مہتر یعقوب پیغام بر در آمد بعد ازاں زلیخا بخدائے تعالیٰ مشغول شد چنانچہ می آرنداں روز کہ مہتر یوسف پیغامبر علیہ السلام و بنالۂ زلیخا کردے، داد از پیش بگریختے ودست در زدے، آں گاہ مہتر یوسف از زلیخا پرسید، گفت روزے آں بود کہ دنبالِ ما می کردی، ومن از پیش تو می گریختم، ویک روز اینست کہ دنبالِ تو می کنم و تو از من می گریزی، دریں امر حکمت چیست؟ بگو زلیخا گفت اے یوسف آں روز باخدائے تعالیٰ آشنائی نداشتم، و از پرستشِ او ودر بودم، جز تو آشنائے دیگر نمی دانستم ضرورتاً بتو آویزش داشتم، اما ازیں زماں کہ حقِ تعالیٰ را بشناختم و در پرستشِ او مشگول شدم و از مجاہدہ بشاہدۂ او تا فتم و دوستی او در دل من جائے گرفت پس اے یوسف تو و صد ہزار بہتر از تو در نظرِ من نباشد چوں مرا باحق تعالیٰ الفت شد اگر بعد ازیں باغیر او لفت گیرم مدغی دروغ زن بودم، نہ صادق در محبت (اسرارالاولیا، ص 7)

اس مختصر سے بیان میں کئی جملے ایسے ہیں جو بے ساختہ زبان سے نکل گئے ہیں جو بیان کی جان اور روحِ رواں ہیں اور ایسے ہی بزرگ کی زبان سے نکل سکتے ہیں جو توحید و حق شناسی کی نعمت سے مالا مال ہو اور وہ یہ ہیں:-

ازیں زماں کہ حق تعالیٰ را بشناختم در پرستش او مشغول شدم، از مجاہدہ بمشاہدۂ او تافتم چوں مرا باحق تعالیٰ، الفت شد اگر بعد ازیں باغیر او الفت گیرم، مدعی دروغ زن بودم

ہر کس و ناکس کی زبان سے یہ جملے نہیں نکل سکتے، ایں ایسا کیف ہے کہ یہ صاحبِ ذوق سلیم کو آج بھی متوالا بنا دیتے ہیں، ان کی کیفیت ان کی صداقت کی روشن دلیل ہے اور لائقِ تسلیم ہے مگر اس روایت کے متعلق اور اس جیسی دوسری روایات کے متعلق عہدِ حاضر کے ایک تنقید نگار کا بیان یہ ہے:-

بد احتیاطی اور کم علمی کی وجہ سے جابجا ایسی باتیں بکثرت آگئی ہیں جو اصولِ تصوف کے خلاف ہیں بلکہ اکثر تعلیمات اسلامی کے منافی ہیں اور جن کا انتخاب کسی بھی درویش سے درست نہیں ہوسکتا چہ جائیکہ انہیں حضرت بابا فرید گنج شکر علیہ الرحمۃ کی ذاتِ گرامی سے منسوب کیا جائے

(منادی دہلی بابا فرید نمبر 166۔ جلد 49 شمارہ 4،5،6)

بعد ازاں اسرارالاؤلیا سے حضرت بابا صاحب کا مذکورۂ بالا بیان نقل کر کے یہ لکھا ہے۔

حضرت یوسف کے زلیخا سے نکاح کرنے کی روایت نہ یہودی ماخذ میں ہے نہ علمائے اسلام اس کےقائل ہیں، جامع ملفوظات نے خدا جانے یہ خرافات کہاں سے نقل کی ہیں

(منادی دہلی، بابا فرید نمبر صفحہ 168 جلد 49 شمارہ 6،5،4)

یہودیوں کے علمی ذخائر میں اگر اب حضرت یوسف کے حضرت زلیخا نے نکاح کرنے کی روایت نہیں ہے تو قطع نظر اس سے کہ یہ کہنا جو کہا گیا ہے بلا دلیل ہے، کیونکہ یہ تو ان کی دیرینہ عادت ہے، قرآن و حدیث سے اس کی تائید ہوتی ہے، اسی عارف کی بدولت وہ توریت مقدس کو بھی محفوظ نہ رکھ سکے ہیں لیکن جب قدیم و مستند علمائے حق نے دونوں کے نکاح کے متعلق معتبر و مسلمان یہودی علما سے اس روایت کو نقل کیا ہے تو یہ کہہ کر اسے مسترد کیسے کیا جاسکتا ہے کہ روایت یہودی ماخذ میں نہیں ہے اور اسے خرافات سے تعبیر کیسے کیا جاسکتا ہے؟

مولانا جامی وہ بزرگ عالم ہیں جن کی شرح جامی آج تک دینی مدارس کے نصابِ تعلیم میں داخل ہے، حضرت داتا گنج بخش اور مولانا جامی کی روایت کو خرافات سے تعبیر کرنا اور یہ لکھنا۔

بد احتیاطی اور کم عقلی۔۔۔ اصولِ تصوف کے خلاف۔۔۔ اکثر تعلیماتِ اسلامی کے منافی ہیں۔

بذاتِ خود کھلی خرافات جو بقولِ جناب سید صباح الدین عبدالرحمٰن صاحب اسے فساد فی العلم، فساد فی التاریخ، فساد فی الرّوایات، فساد فی الرسوخ، فساد فی العقیدہ سے تعبیر کیا جاسکتا ہے اور چونکہ اس زہر افشانی سے عوام اور کم علم گمراہ ہوتے ہیں اور عقیدت مندوں میں اشتعال پیدا ہوتی ہے جو فتنہ و فساد کا سبب بھی ہوسکتی ہے، اس لئے فساد فی الارض سے بھی تعبیر کیا جاسکتا ہے۔

علم مجلسی سے آگاہی :- ہر شائستہ قوم کے مہذب افراد علمِ مجلسی سے آگاہی رکھتے ہیں وہ جانتے ہیں کہ جو واقعہ جن الفاظ میں کسی ایک مجلس میں بیان کیا جاتا ہے، بعینہ ان الفاظ میں کسی دوسری مجلس میں بیان نہیں کیا جاسکتا، اقتضائے حال کے مطابق واقعہ کی تفصیل میں بھی کمی بیشی ہوسکتی ہے اور ہوتی ہے، مقرر متکلم کو یہ حق ہے کہ وہ واقعہ کے جس پہلو کو چاہے بیان کرے اور جس کو نہ چاہے بیان نہ کرے، پورا واقعہ بھی بیان کرسکتا ہے اور متعلقات پر بھی روشنی ڈال سکتا ہے اور اختصار سے بھی کام لے سکتا ہے۔

تحریر میں کسی واقعہ کو عموماً جامعیت کے ساتھ بیان کیا جاتا ہے اور اختصار سے بھی، بہر حال! ایجاز و اطناب سے کام لینے کا اسے پورا پورا حق ہوتا ہے، مکرر بیان کرنے اور لکھنے کی صورت میں لفاظ میں ردوبدل ہوتا ہے اور ہوسکتا ہے، یہ بھی ہوتا ہے کہ جو واقعہ کسی نے قلم بند کرلیا ہے اور مدتوں بعد اسے بیان کیا ہے تو بیان میں تحریر سے زیادہ توانائی آسکتی ہے جس کے مختلف اسباب ہوتے ہیں، یہاں تین ایسے واقعات نقل کئے جاتے ہیں جن کو بیان کرنے والے بھی ایک ہی بزرگ ہیں اور لکھنے والے بھی ایک ہی اہل قلم ہیں، دونوں بیانوں کے درمیان فصل بھی کچھ زیادہ نہیں ہے۔

یک روز ہمدرن زحمت مرا و چند باراں را گفت کہ بروید در فلاں خطیرہ بہ شب بیدار باشید و برائے صحتِ من دعا کنید ہم چناں کردیم امن و چند یار دیگر دراں خطیرہ رفتیم، آں خطیرہ بام می داشت براں بام رفتیم و طعام برابر خود بردیم شب آنجا بودیم دعا کردیم چوں و زشد، بخدمت شیخ آمدیم و باستادیم او عرض داشت کردیم کہ شب را بحکم فرماں بیدار بودیم ودعا کردیم، شیخ ساعتے تامل فرمود ہا بعد ازاں گفت از دعائے شما ہیچ اثرِ صحت پیدا نہ شد خواجہ ذکر اللہ بالخیر فرمودند کہ من در جواب متامل شدم یارے بود کہ او را علی بہادری گفتندے او از من پسترایستادہ بود، او ازاں جا گفت کہ مانا قصانیم و ذاتِ مبارک شیخ کامل دعائے ناقصاں در حقِ کاملاں کجا مستجاب شود، ہما نا کہ ایں سخن بسمع شیخ نہ رسید من ایں سخن بسمعِ شیخ نہ رسانیدم بعد ازاں روے سوئے من کردد گفت من از خداخواستہ ام کہ ہر چہ تو از خداخواہی بیابی بعد ازاں عصائے خود بمن داد۔

(فوائد الفواد صفحہ 52 مجلس 8 بست ہفتم (27) ماہ ربیع الاول سن 710)

در آنچہ شیخ الاسلام فرید الدین قدس اللہ سرّہٗ العزیز رحمت داشت مرا با چند بار بزریارت شہیداں کہ آنجا اند فرستادہ بود چوں ما بعد از زیارت بخدمت پیوستم فرمود کہ دعائے شما ہیچ اثر نہ کرد، مرا ہیچ جوابے فراہم نیاید یارے بود کہ او را علی بہاری گفتندے او دورتر استادہ بود، گفت کہ مانا قصانیم و ذات مبارک شیخ کامل دعائے ناقصاں در حق کاملاں چہ گونہ اثر کند خواجہ ذکر اللہ بالخیر فرمود کہ ایں سخن بسمع شیخ نہ رسید من عین آں بسمع مبارک رسانیدم، مرا فرمود من از خدا خواستہ ام کہ ہر چہ تو از خدائے تعالیٰ بخواہی

بیابی بعد ازاں آں روز عصا بمن داد و مرا گفت کہ تو بدرالدین اسحاق علیہ الرحمۃ بروید، و ہمداں خطیرہ مشغول شوید، من داد ہر دو رفتیم و بشب مشغول بودیم بچوں چوں بخدمت پیوستم فرمود کہ نیکو بود۔

(فوائد الفواد صفحہ 59 مجلس 5 پنجم (رجب سن 710 ہجری)

دونوں بیانات کے درمیان صرف تین ماہ سات یوم کا فصل ہے، درمیان میں چھ مجالس ہیں جن کے بیانات تقریباً دس صفحات پر مشتمل ہیں مگر بیان میں جو فرق ہے وہ مقابلہ سے واضح ہے، پہلے بیان میں خطیرہ بامِ خطیرہ ہے، کھانا ساتھ لے جانے کا ذکر ہے، دوسرے میں صرف زیارتِ شہدا ہے پھر پہلے بیان میں بعد ازاں عصائے خود بمن داد سے ایسا لگتا ہے کہ عصائے خود اسی وقت عطا فرمایا تھا، دوسرے بیان سے کہ آں روز عصا بمن داد یہ معلوم ہوتا ہے کہ دن میں کسی وقت عطا فرمایا تھا، عصائے خود میں جو تخصیص ہے وہ بھی اس میں نہیں ہے اگر اسی اختلاف سے یہ بیان افضل الفوائد میں ہوتا ہے تو اس پر سرقہ کا بھی الزام عائد ہوتا اور اسلوب بیان کی خامی کا بھی۔

حکایت خواجہ شاہی موئے تاب کہ برادر مہتر او (شیخ محمود موئے تاب) بود فرمود، چوں خلق بود روئے آورد و ہر جا کہ می رفت آنجا جمیعتے می شد و ایں خواجہ شاہی موئے تاب مردے سیہ فام بود، ہمدراں عہد درویشے بود در بدایوں او را مسعود نجاشی گفتندے چوں خواجہ شاہی را بہ آں غوغا می دید، می گفت اے سیہ گرما بہ گرم کردۂ سوختہ خواہی شد

خواجہ ذکر اللہ بالخیر فرمود کہ ہم چناں شد کہ او گفتہ بود ہم در۔

(فوائد الفواد صفحہ 172 مجلس 37 دہم ماہ ذی قعدہ سن 716 ہجری)

حکایت خواجہ شاہی در افتاد کہ او را در بدایوں رونقے پیدا شد و ہمہ خلق رو برو آورد و ہرجا کہ می رفت آنجا جمیعتے می شد و آں خواجہ شاہی مردے سیاہ فام

بود ہمدراں عہد در ویش بود او را محمود نجاشی گفتندے، وقتے خواجہ شاہی را گفت اے سیہ گرما بہ نیک گرم کردۂ سوختہ خواہی شد، ہم چناں شد کہ او گفت خواجہ ہم دراں جوانی برفت۔

(فوائد الفواد صفحہ 176 ہجری مجلس 38 یازدہم ماہ ذی الحجہ سن 706 ہجری)

دونوں بیانات کے درمیان صرف ایک ماہ کا فصل ہے، درمیان میں کوئی مجلس بھی نہیں ہے اور درمیان میں صرف ایک صفحے کا بیان ہے، موتے تاب صرف پہلے بیان میں ہے، دوسرے میں نہیں ہے، درویشے اور درویش میں امتیاز واضح ہے، پہلے بیان میں مسعود نجاشی ہے اور دوسرے میں محمود نجاشی ہے، گرم کردہ اور نیک گرم کردہ میں بھی امتیاز ہے، پہلے بیان میں بہ آں غوغا می دید می گفت ہے اور دوسرے میں صرف گفت ہے، تواتر مفقود ہے، تنقید نگار بتائیں کہ وہ ان اختلافات کی کیا تاویل فرماتے ہیں، کس کو جعلی اور کس کو اصلی بتاتے ہیں۔

حکایت فرومود کنیز کے داشت نو بروہ وزال و مواسی است، نزدیک بدایوں کہ آنرا کاں بھر گویند، مگر ازاں مواسی بودہ است روزے ایں کنیزک می گریست، مولانا علاؤالدین

پرسید کہ چرا می گرئی، گفت پسرے دارم، از او جدا شدم، مولانا گفت اگر ترا برسر حوض برم کہ یک کرد ہے از شہر است و بر سرآں حوض را کاں بھر ست ازاں جا توراہ خانہ خود بدانی، گفت بدانم مولانا وقت سحرے او را از خانہ بروں آورد، وبر سر آں خوض برد، و بگذاشت، خواجہ ذکرہ اللہ بالخیر چوں بریں حرف رسید چشم پر آب کرد، فرمود کہ علمائے ظاہر اسیں معنی را منکر باشند اما تواں دانست کہ او چہ کرد۔

(فوائد الفواد صفحہ 165 مجلس 34 پانژدہم ماہ رمضان سن 716 ہجری)

خواجہ ذکرہ اللہ بالخیرفرمود، آرے ہم چنین بود کہ او کنیزک زاے داشت نو بردہ در بدایوں سحر گاہے مولانا بیدار شد آں کنیز آرد، آس می کردد می گریست

مولانا پرسید چرا می گرئی کنیزک گفت پسرے در مواس کاں بھر گزشتہ ام از جدائی او می گریم، مولانا گفت اگر من ترا نزدیک نماز گاہ برم ازآں جا راہ خانہ خود بدانی و گفت آرے

ازاں جا راہ خانہ خود بدانم مولانا علاؤالدین نانے چند بدو داد گزاشت۔

(فوائد الفواد صفحہ 202 مجلس 53 یازدھم ماہ رمضان 718 ہجری)

ان دونوں روایتوں کے درمیان فصل زیادہ ہے، درمیان میں بارہ فصلیں ہیں جو 35 صفحات پر مشتمل ہیں، بیان میں بھی ممیز فرق ہے اگر یہی فرق کسی دوسرے مجموعۂ ملفوظات میں ہوتا تو تنقید نگاروں کو سخت اعتراض ہوتا، پہلی روایت میں رونے کا تو ذکر ہے مگر چکی پیستے ہوئے رونے کا ذکر نہیں، پہلی روایت میں حوض کا ذکر ہے جس کا فاصلہ شہر سے ایک کوس بتایا ہے، دوسری روایت میں ناز گاہ (عیدگاہ) کا ذکر ہے مگر فاصلے کا ذکر نہیں ہے، دوسری روایت میں نانے چند بدو داد ہے پہلی میں اس کا کوئی ذکر نہیں ہے، پہلی روایت میں نتیجتاً جو کچھ فرمایا ہے دوسری میں وہ نہیں ہے، ان اختلافات سے روایات میں بہم سخت اختلاف پیدا ہوگیا ہے، اگر ایسے ہی اختلافات کسی کتاب کے جعلی ہونے کے دلائل ہیں تو تنقید نگار بتائیں کہ فوائدالفواد سب سے زیادہ جعلی کتاب کیوں نہیں ہے جس میں ایک ہی واقعہ کو مختلف اسلوب میں بیان کیا گیا ہے تنقید نگار کا بیان ہے۔

حضرت امیر حسن دہلوی کے مرتب کردہ حضرت نظام الدین اولیا کے ملفوظات فوائدالفود امیر خورد کرنامی کی تالیف سیرالاولیا اور حمید قلندر کے جمع کئے ہوئے حضرت نصیرالدین چراغ دہلوی کے ملفوظات خیر المجالس نہایت درجہ مستند ہیں

(منادی دہلی سن 1977ء بابا فرید نمبر جلد 49 شمارہ 6،5،4 صفحہ 12)

اگر اس قدر اختلاف کے باوجود فوائد الفواد نہایت درجہ مستند ہے تو ایسے ہی اختلافات کی بنا پر دیگر ملفوظات جعلی کیسے ہوسکتے ہیں وہ بھی نہایت درجہ مستند ہونے چاہئیں حالانکہ اُن کے متن میں اختلاف نہیں ہے اسِ کے متن میں اختلاف ہے۔۔۔ کسی دوسری کتاب کے بیان سے اختلاف ہونا زیادہ قرین قیاس ہے، اس کے باوجود کہا جاتا ہے کہ

یہ کس طرح ممکن ہے کہ خود حضرت نظام الدین اپنی مجلس میں ایک واقعہ بیان کریں اور اسی واقعہ کو اپنے قلم سے کتاب میں لکھیں اور دونوں میں اتنا اختلاف ہو

(منادی دہلی، بابا فریند نمبر ص 149 جلد 49، شمارہ ، 6،5،4 سن 1974 عیسوی)

یہ اختلاف اسی طرح ممکن ہے جس طرح فوائدالفواد میں ہے بلکہ اس سے بھی زیادہ امکان رکھتا ہے جس طرح مختلف مجالس میں ایک ہی واقعہ کے بیان میں اختلاف ہے، اہلِ علم اس نکتے سے واقف ہیں کہ ایسے اختلافات ہوتے ہی ہیں اگر نہ ہوں تو حیرت کی بات ہے جو فنِ انشا پردازی اور فنِ تقریر سے واقف ہیں وہ جانتے ہیں کہ تحریر و تقریر میں زمین آسمان کا فرق ہوتا ہے کوئی مقرر لفظ بہ لفظ وہ بیان ہی نہیں کرسکتا جو تحریر میں ہوتا ہے اس کو پیشِ نظر رکھا جائے تو واضح ہوجائے گا کہ ملفوظات میں جو اختلاف ہے وہ ملفوظ نگار کی بداحتیاطی کم عقلی، اصولِ تصّوف اور اسلامی شریعت سے عدم واقفیت کا نتیجہ نہیں ہے، لطیفہ یہ ہے کہ تنقیدنگار نے جن دو بیانوں کے درمیان فرق کرنا ممکن تصور کیا ہے، ان کے درمیان چالیس سال سے زیادہ کا فصل ہے، لکھنے والے بھی مختلف ہیں اور بیان کرنے والے بھی مختلف ہیں مگر فوائدالفواد میں یہ صورت نہیں ہے، نہ بیانات کی مدت میں اتنا فصل ہے نہ بیان کرنے والے مختلف ہیں اور نہ لکھنے والے مختلف ہیں پھر کیا وجہ ہوسکتی ہے کہ ایک کتاب اسی دلیل سے جعلی قرار پائے اور دوسری مستند مانی جائے۔

اعزازی کلمات:- کلمات و الفاظ کے بعض جگ ایسےہیں جو اعزازی طور پر بزرگوں اور قابلِ احترام اشخاص کے ناموں کے ساتھ بولے اور لکھے جاتے ہیں مثلاً رحمۃ اللہ، علیہ الرحمۃ، رضی اللہ عنہ، انار اللہ برہانہ، ذکرہ اللہ بالخیر، قدس اللہ سرّہ العزیز وغیرہ یہ عربی مرکبات ہیں، یہ ان بزرگوں کے ناموں کے ساتھ بھی استعمال کئے جاتے ہیں جو بقیدِ حیات ہیں اور ان کے لئے بھی جو وفات پا چکے ہیں، انہیں اصطلاح اموت جیسے غیر معروف مرکب سے نامزد کرنا اور یہ سمجھنا اور لکھنا کہ یہ صرف ان ہی اشخصاص کے لئے مخصوص ہیں جو فوت ہوچکے ہیں اور عالمِ فانی سے رحلت فرما چکے ہیں، صحیح نہیں ہے اور نہ اصطلاحات کی کسی کتاب سے یہ ثبوت فراہم کیا جاسکتا ہے کہ ان کلمات و مرکبات پر اصطلاحِ اموات کا اطلاق ہوتا ہے۔

اصطلاح سے مراد یہ ہے کہ علمائے فن کے کسی گروہ نے کسی لفظ کو اس کے اصلی و لغوی معنی کے علاوہ کسی اور معنی کے لئے مخصوص کرلیا ہے جیسے منطق و فلسفہ، صرف و نحو، حدیث و فقہ کی اصطلاحات ہیں، اسی طرح پیشہ وروں کی اصطلاحیں بھی ہیں جو ان فنون کی کتابوں یں مدّن ہیں، اصطلاحات پر مخصوص کتابیں بھی لکھیں گئیں ہیں جو ان جگوں کو اصطلاحِ اموات سے تعبیر کرتے ہیں، ان کا ثبوت فراہم کرنا ان کی ذمہ داری ہے جو بزرگ رحلت پا چکے ہیں ان کے ناموں کے ساتھ ان جگوں کا استعمال عام ہے، اس کے برعکس ان اشخصاص کے لئے بھی ان جگوں کا استعمال ملتا ہے جو بقیدِ حیات ہوتے ہیں، آج نہ سہی مگر کل تک یہی تھا۔

1. حضرت داتا گنج بخش لاہوری سید علی ہجویری (المتوفیٰ سن 465 ہجری) نے جابجا اپنے لئے ان جگوں کو لکھا ہے:-

من کہ علی بن عثمان جلابی ام رضی اللہ عنہ (کشف المحجوب323-262)

2. اجودھن (پاکپٹن) کے قاضی ابوالفضل عبداللہ حضرت بابا صاحب کے بڑے مخالف تھے وہ سماع کے خلاف فتویٰ حاصل کرنے کے لئے ملتان گئے جہاں مشہور مشہور علما تھے، انہوں نے علمائے ملتان سے کہا کہ یہ کہاں جائز ہے کہ کوئی شخص مسجد میں سماع سنے اور رقص کرے، انہوں نے دریافت کیا، ایسا کون شخص ہے تو انہوں نے کہا :-

شیخ فرید الدین قدس سرّہ العزیز (است) (فوائد الفواد صفحہ 96)

یہ واقعہ حضرت بابا صاحب کی حیات کا ہےکہ آپ کے مبارک نام کے ساتھ قدس سرہٗ العزیز بولا گیا ہے۔

3۔ حضرت محبوبِ الٰہی کا ارشاد ہے کہ ایک بار حضرت بابا صاحب نے مجھے اور کئی دوستوں کو شہداء کے مزارات پر دعا کے لئے بھیجا تھا جب ہم واپس آئے اور حاضرِ خدمت ہوئے تو آپ نے فرمایا دعائے شما ہیچ اثر نہ کرد القصہ پھر مجھے اور مولانا بدرالدین اسحاق کو بھیجا، حضرت محبوبِ الٰہی کے مبارک لفظ ہیں :-

مرگفت کہ تو و بدرالدین اسحاق علیہ الرحمۃ بردید و ہمدرداں خطیرہ مشغول شوید (فوائد الفواد صفحہ 59)

یہ بیان ہر اعتبار سے معتبر ہے کہ یہ حضرت بابا صاحب کا بیان ہے پھر اس کا اعادہ فرمایا ہے، حضرت محبوبِ الٰہی کے نتقید نگاروں کے لئے سب سے زیادہ اہم اس لئے ہے کہ فوائدالفواد میں ہے جو ان کے کہنے کے مطابق نہایت درجہ مستند ہے جس کے بعد مزید کسی شہادت کی ضرورت نہیں رہتی۔

یہ بحث ذرا طویل ہورہی ہے لیکن یہ موضوع کچھ ایسا اہم ہے کہ بعض تنقیدنگاروں کی بیجا تنقیدوں سے جو غلط فہمیاں پیدا ہورہی ہیں اس کا تقاضہ یہ ہے کہ ہر پہلو سے اس کا جائزہ لیا جائے، ناظرین سے اس بحث کی طوالت کے لئے معذرت خواہ ہیں۔

خوارق عادات:- انسان اگر غور و فکر سے کام لے تو یہ حقیقت پوشیدہ نہیں رہتی کی دنیا کی ہر شے عجائبات کا مرقع ہے بلکہ وہ خود عجائبات کا مجموعہ ہے، بہرحال ایسے واقعات جو عام حالات سے مختلف، حیرت انگیز اور عقل و فہم سے بالا تر ہوتے اور گاہِ بگاہ ظہور میں آتے ہیں، انہیں خوارق عادات سے تعبیر کیا جاتا ہے، انِجن کی ایجاد پر جارج اسٹفنس کی خلافت مذہبی پیشواؤں نے جو فتوے دیتے تھے، تاریخ آج بھی انہیں دہرارہی ہے، بجلی، ٹیلیفون، وائرلیس، ریڈیو، ٹیلی ویزن سب ہی حیرت انگیز ہیں لیکن رواج عام نے ان کی حیرت و استعجاب کو زائل کردیا ہے اور وہ تمدن کا لازمہ بن گئے ہیں اور روز مرّہ کی چیزوں میں شمار ہونے لگے ہیں ورنہ غیر شائستہ اذہان نے کیا کچھ نہیں کیا ہے۔

اسلامی اذہان نے خوارقِ عادات کی تین نوعتیں قرار دی ہیں۔

(1) جو محیر العقول واقعات انبیاء علیم السلام سے صادر ہوتے ہیں، انہیں معجزہ کہتے۔

(2) جو مافوق الفطرت امور ارادۃ یا بلا ارادہ اؤلیااللہ سے ظہور میں آتے ہیں، انہیں کرامت سے تعبیر کرتے ہیں۔

(3) جوان اشخصاص سے ظہور میں آتے ہیں جو کسی مذہب س رابطہ رکھتے ہی نہیں یا برائے نام رکھتے ہیں یا جن پر دین ہونے کا اطلاق ہوسکتا ہے، اسے استدارج کہتے ہیں۔

حضرت محبوبِ الٰہی کا ارشاد ہے۔

آنچہ در و عقل را گنجائش نباشد آں کرامت است

ترجمہ:- جس میں عقل کو دخل نہیں وہ کرامت ہے۔

(فوائدالفواد صفحہ 7)

یہ اسی روایت سے متعلق ہے جو لفظی اختلاف کے ساتھ فوائدالسّالکین (صفحہ 12)میں ہے لفظی اختلاف کی امثلہ علم مجلسی سی آگاہی کے زیر عنوان گذر چکی ہیں، اس روایت سے متعلق اردو میں عہدِ حاضر کے ایک تنقید نگار نے لکھا ہے:-

ایسے واقعات کی بھرمار ہے جو چشتی صوفیہ کے عقائد اور تعلیمات کے سراسر خلاف ہیں، فوق العادۃ عنصر کی بھی کمی نہیں اور خوارق کے بیان میں مبالغہ ہے

(منادی دہلی صفحہ 186 بابا فرید نمبر جلد 49 شمارہ 6،5،4، سن 1974)

کیا تنقیدنگار کو چشتی صوفیہ کے عقائد اور تعلیمات سے آگاہی کے باب میں حضرت محبوبِ الٰہی پر فوقیت ہے جو کمالِ علم و عمل کے باوجود اس سے آگاہ نہ تھے کہ روایت چشتی صوفیہ کے عقائد اور تعلیمات کے سراسر خلاف ہے، حضرت محبوبِ الٰہی نے یہ بھی فرمایا ہے:-

سلوک را صد مرتبہ نہاد ندہفتہ ہم مرتبہ کشف و کرامت اس اگر سالک ہمدریں مرتبہ بماند ہشتاد و سہ دیگر کے برسد

ترجمہ :- سلوک کے لئے سو درجات رکھتے ہیں ستر ہواں درجہ کرامت کا ہے اگر سالک اسی درجہ میں رہے گا تو وہ دیگر تراسی درجات کو کیسے پہنچے گا۔

(فوائدالفواد صفحہ 117)

بیان کا اسلوب منہ سے پڑا بول رہا ہے کہ جب تک مدارج سلوک کی تکمیل نہ ہوجائے، اظہار کشف و کرامت میں محتاط رہنا چاہئے، البتہ تکمیل کے بعد ضرورۃ و ارادۃ کشف و کرامت سے کام لیا جاسکتا ہے، حضرت خواجہ قطب الدین بختیار اوشی کا ارشاد ہے:-

چوں صد مرتبہ ہم طے کند آں گاہ ہر چہ خواہد کشف کند مرد کامل آنست کہ خود را تا آں زماں کشف نہ کند تا تمام حاصل نہ کند

ترجمہ:- جب سواں مرتبہ بھی طے کر لے پھر جو چاہے ظاہر کے مرد کامل وہی ہے جو اس وقت تک اپنے کو ظاہر نہ کرے جب تک تکمیل نہ کرے۔

(فوائدالسّالکین، صفحہ 20)

فوائدالفواد ہو یا دیگر مجموعۂ ملفوظات ان سب میں ان ہی بزرگوں کی کرامات کا ذکر ہے جو درجۂ کمال کو پہنچ چکے تھے اور اگر چہ فوائدالفواد میں بھی خوارقِ عادات اور کرامات کا ذکر ہے اور بکثرت ہے لیکن اسرارالاولیا اور راحت القلوب کے جامعین کو منصبِ سجادگی تفویض ہونا تھا اس لئے اُن کی ترتیب میں منصب کی رعایت کو بھی دخل ہے، اس اعتبار سے ان تینوں کتابوں میں وہ امتیاز ہے جو ہو سکتا ہے۔

تاریخ شاہد ہے کہ عہدِ وسطیٰ میں ہندوستانی اذہان جوگیوں اور سنّیاسیوں کے دامِ فریب میں پھنسے ہوئے تھے اور حضرت محبوبِ الٰہی کے عہد شیخوخت میں وہ کیفیت نہیں رہی تھی اس لئے جو کچھ ان دونوں حضرات کی تربیت کے لئے درکار تھا وہ ہرگز کسی اعتبار سے بھی خواجہ امیر حسن علا سنجری کی تربیت کے لئے نہ تو درکار تھا اور نہ ہوسکتا تھا، فوائدالفواد میں وہ کچھ تلاش کرنا جو اسرارالاؤلیا اور راحت القلوب میں ہے، تلاشِ بے محل اور سعیٔ لا حاصل ہے۔

بہر حال! جس نفوسِ زکیہ کو اصلاحِ قوم کی خدمت تفویض کرنی ہوتی ہے، ان کی تربیت عام تربیت سے ممیز ہوتی اور ہو سکتی ہے، حضرت امیر خسرو اور قاضی محی الدین کاشانی کی تربیت کا امیتاز اس کی روشن دلیل ہے، لہٰذا ان نفوسِ زکیہ کو ماحولی کیفیت سے اور منزل کے نشیب و فراز سے آگاہی بخشنا تربیت کا لازمہ ہے اور اگرچہ ان ملفوظات میں آپ بیتی کے ابھرتے ہوئے نقوش شاذ و نادر ہی ملتے ہیں تاہم آپ بیتی کے مؤثر انداز میں واقعات کو دل نشیں کرنا مناسب ہوتا ہے جس سے استعدادِ عمل کو مہمیز ہوتی ہے اور دل و دماغ آمادۂ عمل ہوجاتے ہیں، ماحول کی کیفیات کو نظر انداز کر کے جو بھی جائزہ لیا جائے گا غلط ہوگا، خواجہ حالی نے لکھا ہے۔

سو نیچرل یعنی مافوق العادۃ باتیں اور عجیب و غریب قصّے۔۔۔ جن سے قدیم اور متوسط زمانے کا مغربی اور مشرقی لٹریچر بھرا ہوا ہے

(حیاتِ سعدی، صفحہ 125)

پھر ملفوظات جو عہدِ وسطیٰ ہی کا تہذیبی و روحانی سرمایہ ہے، اس میں مافوق العادۃ عنصر کا نہ ہونا ان کی خامی تو ہوسکتی ہے خوبی نہں ہوسکتی، خصوصاً اس لئے کہ ان بزرگوں کوان سے دو چار رہنا بھی پڑتا تھا اور اگرچہ کتب ملفوظات ہم تک کامل صحت کے ساتھ نہیں پہنچ سکی ہیں اور اکثر چند منتشر اوراق کا مجموعہ رہ گئی ہیں، تاہم ان میں جو کچھ ہے وہ بہت کچھ اپنے موضوع سے متعلق ہے، علمی مسائل کا بیان اور احکام کا درس متعلق ہوتا ہے روحانی نظام سے تربیت گاہوں کا نظام اپنا مقام رکھتا ہے۔

مصرع : ہر سخن محلے و ہر نکتہ مقامے وارد

صوفیائے کرام طبیب روحانی ہوتے ہیں، قلوب کی نبض پر ان کی انگلیاں اور دل کی تہہ میں ان کی نظریں ہوتی ہیں وہ جو کچھ مناسب سمجھتے ہیں تجویز کرتے ہیں، کلا سنا اشارۃ سمجھنے لئے اہلیت درکار ہے جو آج عنقا ہے پھر یہ کہنا کیا ہے:-

اکثر بزرگوں کے فوق الفطرۃ تصرفات اور خوارق عادات کا مبالغہ آمیز بیان ہے، سب سے زیادہ شبیہ پیدا کرنے والا حصہ وہ ہے جس میں صاحبِ ملفوظ خود اپنی کرامت بیان کرتا ہے

(منادی دہلی صفحہ 163 جلد 49، شمارہ 6،5،4، سن 1974 عیسوی)

اؤلیااللہ جن کی زندگیاں اوصافِ حمیدہ سے متجلی اور رذائل سے متبرّا ہوتی ہیں اگر ضرورۃ شاذ و نادر آپ بیتی اُن کی زبان پر آگئی ہے تو وہ خود ستائی اور خود نمائی نہیں، حالات کا اقتضا ہے، خواجہ حالی نے سو پر نیچرل کی منگ بڑھائی تھی، انہوں نے اپنےعہد کے خیالات کی وادیوں میں بھٹکنے والے شاعروں کو متنبہ کیا تھا اور عملی زندگی کی ترجمانی کی ترغیب دی تھی جس کی ضرورت تھی، ان کی تحریک سے اردو شاعری نے کروٹ بدلی اور قومی و ملّی باکمال شاعر منصۂ شہود پر آئے مگر سات آٹھ برس قدیم صوفیا نہ ادب کو ہدفِ ملامت بنانے کا کیا محل ہے اور اس سے کون سی منفعت مقصود ہے، بلا شبہ ہندوستان کے اکابر چشتیہ کے ملفوظات میں محیرالعقول اور مافوق العادۃ عناصر کی آمیزش ہے جو اس عہد کا تمغائے امتیاز ہے، صوفیانہ ادب اس سے خالی نہ ہونا چاہئے جو کچھ اس میں ہے وہ ہدایت و رشد کے روشن مینارے ہیں جن کی تابانی آج بھی جلوہ ریز ہے انہیں ہدفِ تنقید بنانا درست نہیں ہے۔

عجائب الاسفار:- عہدِ ماضی میں جن سیاحوں نے بری وبحری سفر کئے ہیں ان کے سفرنامے شاہد ہیں کہ انہیں عجائباتِ روزگار سے دوچار ہونا پڑا ہے، مشہور مغربی سیاح ابن بطوطہ نے اپنے سفر نامے کا نام ہی عجائب الاسفار رکھا ہے، اس کی ملاقات متعدد ایسے اشخصاص ہوئی تھی جو حیرت انگیز شخصیتوں کے مالک تھے اور حوارق العادۃ اُن سے ظہور میں آتے تھے، ابنِ بطوطہ اس عہد میں ہندوستان آیا تھا جب خوارق کا زور ٹوٹ چکا تھا اور برائے نام ان کا وجود رہ گیا تھا تاہم ابنِ بطوطہ کے سفرنامہ کے اس حصہ میں جو سفر ہندوستان سے متعلق ہے، متعدد و محیرالعقول واقعات ملتے ہیں مگر اس بنا پر آج تک نہ کسی نے اس کو غیر اہم قرار دیا اور نہ جعلی بتایا۔

صوفیائے کرام جو بذاتِ خود محیرالعقول اوصاف کے مالک ہوتے ہیں اور اصلاحِ حال کے پیش نظر ہر رکاوٹ کو ٹھکرا دینے کا منصب رکھتے ہیں اور انسان کو انسانیت کے وصف سے متصف کرنے میں لتے رہتے ہیں اگر ماحول کی ضرورت سے خرق عادت سے کام لیتے ہیں تو اس میں کیا مضائقہ ہے، یہ اس عہد کا لازمہ ہے جس کو عہد ماضی کے تمند کا مؤرخ نظر انداز نہیں کرسکتا، عہد حاضر میں تنقیدی جائزے جو ملفوظات سے متعلق شائع ہوئے ہیں اور میرے مطالعہ میں آئے ہیں وہ صحیح نہیں ہیں، اس اجمال کی تفصیل ان مضامین میں ملے گی جو کتب ملفوظات میں لکھے گئے ہیں اور لکھے جائیں گے۔

کتابیات:- کتب ملفوظات میں اس عہد کی متعدد کتابوں کے نام آئے ہیں جن میں سے بہت سی اب ناپید ہیں، شمائل الاتقیا و دلائل الاتقیاء میں مآخذ کی طویل فہرست درج ہے، اس میں ایسی کتابوں اور رسالوں کے نام بھی ہیں جو اس عہد کے اہلِ قلم نے شاید ہی دیکھے اور سنے ہوں، یہ فہرست ڈیڑھ پونے دو سو کتب و رسائل کے اسماء پر مشتمل ہے، کتب ملفوظات جو ہدفِ تنقید ہیں، ان میں سے جس کتاب میں سب سے زیادہ تعداد ہے وہ چونتیس ہے، تعجب ہے کہ تنقیدنگار اس مختصر تعداد کے بارے میں بھی یہ رائے رکھتے ہیں کہ:-

انتی کتابوں سے جامع نے شاید ہی استفادہ کیا ہوا ان میں سے اکثر فرضی ہیں

(منادی دہلی صفحہ 166 بابا فرید نمبر جلد 49 شمارہ 6،5،4 سن 1974 )

یہ دو ہی جملے ہیں جو باہم متضاد ہیں حالانکہ جامع ملفوظات کا کام صرف ملفوظات کا جمع کرنا ہے اس کے لئے ان کتابوں سے استفادہ ضروری نہیں جن کا ذکر ملفوظات میں آیا ہے خواہ اس کا مطالعہ کیسا ہے وسیع کیوں نہ ہو جن کتابوں کے نام کتب ملفوظات کی زینت ہیں وہ فرضی نہیں واقعی ہیں جن کا مطالعہ وسیع ہے وہ جانتے ہیں کہ ان میں سے اکثر کےنام کتبِ قدیمہ ملتے ہیں، ان کو فرضی تصور کرنا اپنی لا علمی کا ثبوت ہے۔

تاریخی قدریں :- کسی واقعہ کا تاریخ سے وابستہ ہونا اور تاریخی اندراج کا صحیح ہونا با شبہ واقعہ کو تقویت بخشتا ہے، اہلِ علم انہیں قدر کی نگاہ سے دیکھتے ہیں، قطع نظر اس سے کہ تاریخ میں متعدد واقعات مختلف فیہ ہوتے ہیں اور تاریخی اندراجات بھی مختلف ہوتے ہیں لیکن تاریخی اختلاف کی بنا پر کسی واقعہ سے اور نفسِ واقعہ سے انکار نہیں کیا جاتا بلکہ صحت کی طرف رجوع کرنا ہوتا ہے۔

کتب ملفوظات میں سے اگر کسی نسخے میں واقعہ کے ساتھ سنہ اور تاریخ وغیرہ صحیح نہیں ہے تو تصحیح کی طرف متوجہ ہونا چاہئے، واقعہ کا انکار کیسے کیا جاسکتا ہے یہ علمی و تحقیقی نقطۂ نظر ہے جو علمی دنیا میں مروج ہے، غلط تاریخی اندراج کی بنا پر کسی کتاب کو جعلی قرار نہیں دیا جاسکتا، اگر صحت کا نقطۂ نظر یہی قرار پائے تو ملفوظات ہی کیا بہت بڑا علمی ذخیرہ جعلی قرار پائے گا، اس لئے اہلِ علم اہلِ نظر اس روش پر کارفرما نہیں ہیں۔

ملفوظات سے دلچسپی رکھنے والے خاص ہوں یا عام معدودے چند کے سوا تاریخی قدروں سے دلچسپی نہیں رکھتے، ان کے دل و دماغ نفس واقعہ سے متاثر اور کیف اندوز ہوتے ہیں اور ہدایت کی نعمت سے سرفراز ہوتے ہیں، انہیں اس سے غرض نہیں ہوتی کہ کوئی واقعہ کب ہوا کس دن ہوا، کس تاریخ کو ہوا، کس مہینہ میں ہوا اور کس سنہ میں پیش آیا، یہ سوال اٹھتا ہی نہیں ہے، ان کے دل و دماغ روحِ واقعہ سے متعلق رہتے ہیں۔

بلا شبہ تاریخی صحت نہایت کارآمد اور مفید ہے، خصوصاً ان کے لئے جو تاریخ سے دلچسپی رکھتے ہیں، اصلاح کی طرف متوجہ ہوسکتے ہیں اور صحت مند معلومات فراہم کی جاسکتی ہیں لیکن جن کتابوں کا وجود صدہا دل سے پایا جاتا ہے ان میں اگر کسی تاریخی واقعہ میں سقم پایا جائے تو اُن کو جعلی قرار دینا صحیح نہیں یہ بھی کوئی اصول نہیں کہ اگر کسی کتاب کا کوئی قدیم ترین نسخہ دسیتاب نہ ہوسکے یا متداول کتابوں میں اس کا ذکر نہ ملے تو اس کے وجود ہی سے انکار کر دیا جائے اگر یہی اصول ہے تو دُررِ نظامی کے وجود سے سب سے پہلے انکار کیا جائے گا جس کا قدیم ترین نسخہ جو دستیاب ہوا ہے وہ قیاساً بارہویں صدی ہجری کا مکتوبہ ہے اور کہیں کہیں معلومات بھی مشتہ ہیں جس سے یہ بھی یقین ہوتا ہے کہ دُررِ نظامی بھی الحاق و تحریف سے محفوظ نہیں ہے حالانکہ تنقیدنگار کے نزدیک دُررِ نظامی کا شمار نہایت درجہ مستند کتابوں میں ہے۔

بہر حال! کتب ملفوظات جو ہم تک پہنچی ہیں وہ داخلی دلچسپی کی بدولت پہنچی ہیں جس میں بلا امتیاز عقیدت مندوں کی دلچسپی کو دخل ہے، علماء کی دلچسپی کے نقوش خال خال ملتے ہیں، غالباً اس لئے کہ ان میں درسِ عمل ہے اور عالمانہ قیل و قال نام کو نہیں ہے، بہر حال! ہم ان عقیدت مندوں کی دلچسپی کے مرہونِ منت ہیں جن کی بدولت ہم اپنے قدیم روحانی اور تہذیبی سرمایہ سے فیض یاب ہیں۔

ان حالات میں تاریخی قدروں کا برقرار رہنا کچھ یقینی نہیں لہٰذا ان کے در پے ہونا معقولیت سے بعید ہے، البتہ صحت کی جانب توجہ کی سکتی ہے اور یہ ایک اچھی کوشش ہوگی۔

ملفوظات کی مقبولیت:- ملفوظات میں کچھ ایسی جاذبیت اور کشش ہے کہ گونا گوں خامیوں کے باوجود پڑھنے اور سننے والے ان سے محظوظ اور لطف اندوز ہوتے ہیں، بسا اوقات وہ عالمِ کیف و سرور میں کھوسے جاتے ہیں، ان کا دل وہ جگہ چاہتا ہے، جہاں نور و سرور ہی ہو اور کچھ نہ ہو، ان سے ان کی روح کو ایسی طمانیت نصیب ہوتی ہے جو کسی نعمت سے کم نہیں وہ اللہ کے سوا سب کچھ بھول جاتے ہیں، انہیں اپنے حال پر ندامت ہوتی ہے، اصلاحِ حال کی طرف متوجہ ہوتے ہیں، انہیں ہدایت نصیب ہوتی ہے اور نور و سرور بھی، مجھے در اصل ملفوظات ہی نے مسلمان بنایا اور بنائے رکھا ہے اس مادی دور میں ملفوظات کی یہ تاثیر حیرت انگیز ہے مگر

ایں سعادت بزور بازو نیست

تا نہ بخشد خدائے بخشندہ

حضرت محبوبِ الٰہی کی مجلس میں سبیل تذکرہ ایک صاحب نے بیان کیا کہ ایک صاحب تھے جو صلاحیت بھی رکھتے تھے اور درویشوں کی خدمت میں خوب کیا کرتے تھے ایک دن میں نے اُن سے کہا کہ آپ ہمارے حضرت سے بیعت کیوں نہیں ہوجاتے انہوں نے کہا کہ ایک دن بیعت ہونے کے اردے سے گیا تھا مگر کیا دیکھتا ہوں کہ وہاں خوان پوش ہی خوان پوش جمع ہیں اور مشعلیں روشن ہیں یہ منظر دیکھ کر مجھے عقیدت نہیں رہی، میں چلا آیا، حضرت محبوبِ الٰہی نے حاضرینِ مجلس کی طرف رُخ کیا اور فرمایا کہ یہاں خوان اور مشعلیں کب تھیں پھر مسکرائے اور فرمایا یہ نعمت مقدر میں نہ تھی تو بیہ کچھ دکھا دیا۔ (فوائد صفحہ 25)

ایک زمانہ تھا کہ عام و خاص کو ملفوظات کے پڑھنے اور سننے میں بڑا ہی شغف تھا، خواندہ اشخاص کو اپنی مشغولیت سے جب وقت ملتا تو مطالعہ کرتے ہی تھے، خواص کے ہاں رات کو جو نششت ہوتی تھی اس میں بھی اؤلیا اللہ کا ذکر رہتا تھا، ان میں شریک ہونے والوں کے دلوں میں اللہ کی یاد تھی، میرے بچپن میں ولی کے کارخانہ داروں کا دستور تھا کہ وہ جاڑوں کی راتوں میں مل بیٹھتے، خانے ہی میں جمع ہو جاتے، نوجوان ہوتے تو قصے کہانیاں ہوتیں، قصہ چہار درویش پڑھا اور سنا جاتا، بوڑھے بزرگ اور سن رسیدہ ہوتے تو کسی سے ملفوظات پڑھواتے، سنتے اور سنواتے گاہِ بگاہ میں بھی پکڑ میں آجاتا تھا اگر پڑھنے والا نہ ملتا تو کوئی بزرگ خود بیان کرتے، سنتے سنتے انہیں بھی واقعات ازبر ہوتے تھے، مزے لے لے کے خوب سناتے تھے، کوئی شوخ کہہ بھی بیٹھتا استاد تو اچھے خاصے مولوی ہیں، وعظ بھی کہیں تو جچ جائے بہرحال! افکار دنیا سے دم بھر کے لئے چھٹکارا مل جاتا اور نہیں ایسا لگتا کہ وہ نور کی دنیا میں آبسے ہیں، بے ساختہ کہہ اٹھتے۔

نور کی دنیا میں اب رہتے ہیں ہم

دل کے ہاتوں منزلت پائی بہت

یہ ذوق اتنا بڑھا ہوا تھا کہ ان پڑھ چھے چھے خوشنویسوں سے ملفوظات نقل کراتے سنہری درپی جدولیں نبواتے خوشنما چربی جلدیں بنواتے، ان پر بھی رنگ برنگی گلکاری کراتے، جزدانوں میں رکھتے اور بڑے احترام سے رکھتے اور نکالتے تھے، لوبان کی دھونی دیتے، کوئی نامی گرامی عالم یا ایسا ہی کوئی پڑھا لکھا آ نکلتا تو اسے اپنے گھر یا اپنے کارخانے میں لے جاتے عزت سے بٹھاتے، آؤ بھگت کرتے اور بڑے فخر سے وہ مجموعۂ ملفوظات اسے دکھاتے جب وہ حروف کی نوک پلک، کشش و دوائر کی تعریف کرتے تو مجھے حیرت ہوتی یہ تو اَن پڑھ ہیں، میں ہی نہیں جانتا، انہیں آگاہی کیسے ہوئی میں دیکھتا اور غور سے دیکھتا اور سنتا کہ کس کس کی کیا تعریف کر رہے ہیں، حیران رہ جاتا، بول کیا سکتا تھا ان آنکھوں نے ایسے ایسے خوش عقیدہ دیکھے ہیں جن کی یاد سے آج بھی روح میں اسرار پیدا ہوتا اور جی بھر آتا ہے، اللہ پاک اُن کی مغرفت فرمائیں اور اُن کے صدقے میں ہماری بھی۔

والدِ مرحوم کا معمول:- والد مرحوم (سید محمد ابراہیم حسنی حسینی) نہ تو سجادہ نشین تھے نہ کسی درگاہ کے خادم و مجاور، اُن کا تعلق محنت کش طبقہ سے تھا، البتہ صاحبِ ذوق اور صاحبِ نسبت تھے، مجاز بھی تھے مگر پیری و مریدی پیشہ نہ تھا، علماء صوفیہ اور شرفا غرض کہ عوام و خوص سب ہی سے میل جول تھا۔

مصرع : دل بیار و دست بکار

پر عمل تھا، ان کو معلوم یہ تھا کہ وہ رمضان المبارک میں روزہ مردانہ میں افطار کیا کرتے تھے، عصر کے بعد سے معمولاً ملفوظات کا مطالعہ فرماتے، رفتہ رفتہ احباب آ جمع ہوتے تو آواز سے پڑھنے لگتے اور نہ خاموش مطالعہ فرماتے رہتے تھے، عجب سماں ہوتا تھا، رمضان المبارک کا بابرکت مہینہ، عصر و مغرب کا درمیانی وقت، روزے کا کیف روح میں تازگی اور بالیدگی، ایسا لگتا تھا کہ یہ فرشتے ہیں یا نور کے پتلے، چہروں پر معصومیت اور نورانیت، ایسے بیٹھے سنتے، جیسے ہی نہیں مجلس سنسان ہُوکا میدان ہے، گاہِ بگاہ گریہ طاری ہو جاتا، یا آنسو ڈبڈبا آتے، دل کا کیا عالم ہوگا اللہ ہی بہتر جانتا ہے یا کچھ وہی جانتے ہوں گے، اللہ سے لو لگی ہوتی اور زبان پر اللہ اللہ ہوتا کبھی کبھی درد بھری آہ بھی سننے میں آجاتی، میں بیٹھا منہ تکتا رہتا اور زبانِ حال سے کچھ کہتا سنائی دیتا ہے۔

بِکَن پنبۂ غفلت از گوشِ ہوش

کہ از مردگاں پندت آید بگوش

میری آنکھوں نے سالہا یہ سماں دیکھا ہے، ملفوظات سے مجھے جو اُنسیت ہے وہ مجھے ورثہ میں ملی ہے، مان لیجئے گھٹی میں پڑی ہے۔

عہدِ حاضر میں ہندو پاک کے تنقیدنگار ملفوظات پر جو کچھ لکھ رہے ہیں وہ تنقیدیں نہیں تنقیصیں معلوم ہوتی ہیں، بارگاہِ الٰہی میں میری التجا ہے کہ تخریب سے یہ لوگ در گذریں اور تعمیر میں لگ جائیں۔

ملفوظات ہماری تہذیب رفتہ کا گراں قدر سرمایہ ہے جو اب بھی ہمارے سرمۂ چشم ہو، اس سرمایہ کا ضائع ہونا قوم و ملت کا ناقابلِ تلافی نقصان ہے، ان کی قدامت اور عام و خاص میں اُن کی مقبولیت رازِ سربستہ ہے جو ہمیں دعوتِ عمل دیتا ہے، یہ صحیح ہے کہ ملفوظات کے جو نسخے دستیاب ہوتے ہیں وہ خامیوں سے مبرّا نہیں مگر وہ خامیاں ایسی بھی نہیں جو رفع نہ ہوسکیں، یہ ہماری ذمہ داری ہے کہ قدیم سے قدیم نسخوں کا کھوج لگائیں اور نقد و مقابلہ کی صیقل سے اصل کا آئینہ بنا دکھائیں، چودہویں صدی کی یہ جیتی جاگتی کرامت ہے کہ جن کتبِ ملفوظات کے وجود سے انکار کیا جارہا ہے اور جنہیں جعلی قرار دیا جارہا ہے اور جنہیں مابعد کے کسی شخص کے ذہن کی خلاّقی کا نتیجہ بتایا جارہا ہے(صفحہ 140) ان کے قدیم ترین (سن 732 ہجری تک کے) نسخوں کا سراغ ملنے لگا ہے اور جنہیں معتبر و مستند بتایا جا رہا ہے، بارہویں صدی تک پہنچ کر اُن کے نشانِ قدم کا کھوج نہیں ملتا، بارہویں صدی تک بھی جو کھوج ملتا ہے وہ ظنّی اور قیاسی ہے حقیقی نہیں ہے، یہ امداد غیبی بھی ہے اور پیرانِ با صفا کی کرامت بھی ہے اور عقیدت مندوں کے لئے دعوتِ ایثار و عمل بھی ہے، دیکھئے پردۂ غیب سے کیا نمودار ہوتا ہے اور کون یہ سعات حاصل کرتا ہے۔ (یخلق ما یشاء و یختار)

تصنیف وتالیف:- کسی موضوع یا کسی عنوان سے متعلق معلومات فراہم کر کے اپنے خیالات اور اپنی معلومات کو سلیقے سے سپردِ قلم کرنا تصنیف ہے، تصنیف کسی اہلِ قلم کی ذاتی جد و جہد اور اس کے اپنے خیالات و رجحانات کا مرقع ہوتی ہے، مصنف ہی اس کا ذمہ دار ہوتا ہے۔

تالیف عرف عام میں مختلف مضامین (نثر و نظم) کو ایک جا جمع کرنے کو لائف کہتے ہیں اور تالیف کرنے والے کو مؤلف کہتے ہیں، مؤلف کسی ایک شخص کے مضامین کو بھی جمع کرسکتا ہے اور مختلف اشخاص کے مضامین کو بھی، کتب ملفوظات کو بھی تالیف سے تعیبر کرتے ہیں، اگرچہ بہم ہلکا سا امتیاز بھی ہے اور وہ یہ کہ مؤلف مرتب شدہ مضامین کو جمع کرتا ہے جو کسی ایک سے مخصوص ہوتے ہیں یا زیادہ سے مگر کتبِ ملفوظات میں سے ہر ایک کسی ایک ہی کی آواز بازگشت ہوتی ہے جس کو سُن کر مرتب کیا جاتا ہے، اس لئے بغرض امتیاز ملفوظات کے مرتب کرنے والے کو جامع بھی کہتے ہیں۔