خواجۂ_خواجگاں کی چادر ہے

خواجۂ خواجگاں کی چادر ہے

فخر‌ کون و مکان کی چادر ہے

راز دار الست قالو بلا

مظہر کن فکاں کی چادر ہے

سر پہ رکھوں لگاؤں آنکھوں سے

قبلۂ دو جہاں کی چادر ہے

عرش سے فرش پر اتر آئی

بر زمیں آسماں کی چادر ہے

جس پہ نازاں ہوئے معین الدین

اس معین زماں کی چادر ہے

رہنمائی کرے گی محشر میں

ہادی انس‌ و جاں کی چادر ہے

یہ جو نقش و نگار ہیں اس میں

کیا یہ جان جہاں کی چادر ہے

نور چمکا ہے جس کا ہر دل میں

اس مہ ضو فشاں کی چادر ہے

لے کے آئے ہیں دل سے اہل مراد

مونس بے کساں کی چادر ہے

حسن ہر دل میں ہے مکیں ناظرؔ

ساکن لا مکاں کی چادر ہے