جبیں پہ کیوں ہے شکن نہ پوچھو

جبیں پہ کیوں ہے شکن نہ پوچھو

ہجوم رنج و محن نہ پوچھو

سمجھ لو سولی کو بامِ رفعت

نظام دار و رسن نہ پوچھو

روش روش پر ہے خونِ طائر

بہار رنگِ چمن نہ پوچھو

نہ کوئی منزل نہ راہ باقی

سزائے ترک وطن نہ پوچھو

ہر اک مسافر ہے پا شکستہ

الٰہی تو یہ تھکن نہ پوچھو

نہیں ہے کچھ بھی زباں پہ لیکن

ہے دل میں کیسی لگن نہ پوچھو

تجلیوں سے ہے چشم خیرہ

یہ ناز جلوہ فگن نہ پوچھو

وہ دیکھو پیشِ نظر ہے جو کچھ

فسانہ ہائے کہن نہ پوچھو

سحر اگر کی ہے سبحہ خوانی

تو شام توبہ شکن نہ پوچھو

کسی کا تیر نظر ہے دل میں

خلش نہ دیکھو چبھن نہ پوچھو

زبان عابدؔ کی کہتی ہے کچھ

کدھر ہے روئے سخن نہ پوچھو