آوارہ ترا خضر کو کیوں رہنما کرے

آوارہ ترا خضر کو کیوں رہنما کرے

ہیں وہ بزرگ ان کو پریشاں کیا کرے

مجھ مست کی طرح سے جو یاد خدا کرے

زاہد شراب خانہ میں کیا جانے کیا کرے

صیاد سن لے حال مرا ایک بار پھر

ہے اختیار قید کرے یار ہا کرے

آتی ہے صاف یہ دہن گور سے صدا

آرام یاں مسافر راہ فنا کرے

مانا کہ سوئے عرش چلی بھی مری دعا

قسمت نہ اس کو جانے دے واں تک تو کیا کرے

تھوڑی سی مئے چھڑک لو تم اپنے پہ شیخ جی

رندوں کو بد دماغ نہ بوئے ریا کرے

اٹکھیلیوں سے قبر مری روندتے تو ہو

کیا ہو خرام ناز جو محشر بپا کرے

دکھ سہتے سہتے جاں کی غذا ہوگیا ہے غم

کیا ہو اگر نہ وہ ستم غم فزا کرے

پایا ہے دل کو خوگرِ ظلم و ستم تو اب

کہتا ہے وہ بلا مری تجھ پر جفا کرے

واعظ مجھے ڈراتا ہے محشر سے آئے دن

تیری گلی میں آئے کسی دن خدا کرے

جو آہ لا مکاں کی خبر لائے بار ہا

ظالم وہ تیرے ننھے سے دل میں نہ جا کرے

بے چین ہم ہیں اور یہ ناکام روزِ ہجر

غیرت میں اور کچھ نہ ہماری دعا کرے

افسوس ہم تو دم بھریں اک عمر زیست کا

آخر میں آکے ہم سے نہ وہ بھی وفا کرے

ناساز ہے طبیعتِ سلطاں غضب ہے آہؔ

اچھے مرے حضور ہوں جلدی خدا کرے