دل میں تیری یاد کا ہنگام ہے

دل میں تیری یاد کا ہنگام ہے

واہ کیا لبریز میرا جام ہے

روشناس حسن کیوں مجھ کو کیا

اب یہ کیسا عشق کا الزام ہے

زندگی دی اور یہ بھی کہہ دیا

تیرے قبضہ میں ترا انجام ہے

تم نہ آؤ ہم سمجھ لیں گے یہی

ایک یہ بھی گردش ایام ہے

رہبرالفت کی یارب خیر ہو

منزل الفت بہت بدنام ہے

تم کو آنکھوں نے نہ دیکھا ہو کہیں

دل کی دنیا میں مری کہرام ہے

دل مجھے دے گا دعائیں دل کو میں

گر یہی انداز صبح و شام ہے

لاؤ رکھ لیں ہم کلیجہ میں اسے

یہ تمہارے ساتھ کس کا نام ہے