nahin baad-e-fana koi kisi ki yaadgaron mein

nahīñ bā'd-e-fanā koī kisī kī yādgāroñ meñ

usī kī be-kasī rahtī hai us ke ġhamgusāroñ meñ

dimāġh un kā ġhurūr husn se hai 'arsh-e'ālā par

bhalā kab aake baiTheñge vo ham se ḳhāk-sāroñ meñ

tirī teġh-e-nigah kyā DhūñDhtī phirtī hai maqtal meñ

sitamgar kyā dharā hai dekh le aafat ke māroñ meñ

kiyā hai qatl-e-jurm 'āshiqī meñ aap ne ham ko

hue haiñ aap phir nāhaq hamāre sogvāroñ meñ

mire āġhosh meñ aanā tumheñ dam bhar ko aafat hai

chaman meñ kyā nahīñ dekhā hamesha gul ko ḳhāroñ meñ

rasā.ī ho to kyuuñ kar ho hamārī bazm-e-jānāñ meñ

jo dushman haiñ hamāre haiñ vo un ke dost-dāroñ meñ

judā.ī meñ kisī kī karvaTeñ letā hai tū har dam

tujhe bhī ai falak ham jānte haiñ be-qarāroñ meñ

bachānā ai falak un se tū apne ḳhirman-e-mah ko

balā kī aag hai un āh-o-nāloñ ke sharāroñ meñ

rahā karatā hai merā tazkira farhād-o-majnūñ meñ

samjhātā tū kyā hai maiñ bhī huuñ un nām-dāroñ meñ

samajhnā 'āshiq-o-mā'shūq kī bātoñ kā mushkil hai

nikaltā hai zabāñ kā kaam āñkhoñ ke ishāroñ meñ

hasīnān-e-jahāñ meñ is tarah par fauq hai us ko

ki aatā hai nazar jaise falak par chāñd tāroñ meñ

na 'adāvat mai-kahsī kī hai na raġhbat zohd-o-taqvā se

shumār apnā na rindoñ meñ na hai parhezgāroñ meñ

mire qātil ne maqtal meñ jo shamshīr-e-adā khīñchī

qazā bolī ki maiñ bhī huuñ qadīmī jāñ-bāzoñ meñ

udhar dil lūTtā hai is taraf bijlī taḌaptī hai

ilāhī ḳhair ho bahs aa paḌī hai do be-qarāroñ meñ

shab furqat meñ mirā naala sadā-e-sūr thā 'rahīm'

zamīñ jumbish meñ aa.e murde uTh baiThe mazāroñ meñ

nahin ba'd-e-fana koi kisi ki yaadgaron mein

usi ki be-kasi rahti hai us ke ghamgusaron mein

dimagh un ka ghurur husn se hai 'arsh-e'ala par

bhala kab aake baiThenge wo hum se KHak-saron mein

teri tegh-e-nigah kya DhunDhti phirti hai maqtal mein

sitamgar kya dhara hai dekh le aafat ke maron mein

kiya hai qatl-e-jurm 'ashiqi mein aap ne hum ko

hue hain aap phir nahaq hamare sogwaron mein

mere aaghosh mein aana tumhein dam bhar ko aafat hai

chaman mein kya nahin dekha hamesha gul ko KHaron mein

rasai ho to kyun kar ho hamari bazm-e-jaanan mein

jo dushman hain hamare hain wo un ke dost-daron mein

judai mein kisi ki karwaTen leta hai tu har dam

tujhe bhi ai falak hum jaante hain be-qararon mein

bachana ai falak un se tu apne KHirman-e-mah ko

bala ki aag hai un aah-o-nalon ke shararon mein

raha karata hai mera tazkira farhad-o-majnun mein

samjhata tu kya hai main bhi hun un nam-daron mein

samajhna 'ashiq-o-ma'shuq ki baaton ka mushkil hai

nikalta hai zaban ka kaam aankhon ke ishaaron mein

hasinan-e-jahan mein is tarah par fauq hai us ko

ki aata hai nazar jaise falak par chand taron mein

na 'adawat mai-kahsi ki hai na raghbat zohd-o-taqwa se

shumar apna na rindon mein na hai parhezgaron mein

mere qatil ne maqtal mein jo shamshir-e-ada khinchi

qaza boli ki main bhi hun qadimi jaan-bazon mein

udhar dil luTta hai is taraf bijli taDapti hai

ilahi KHair ho bahs aa paDi hai do be-qararon mein

shab furqat mein mera nala sada-e-sur tha 'rahim'

zamin jumbish mein aae murde uTh baiThe mazaron mein