بھلا میری زباں کس طرح بنتی ترجماں میری

بھلا میری زباں کس طرح بنتی ترجماں میری

تمہارا حسنِ زیبا بن گیا شرح بیاں میری

حدیثِ عشق نکلی جب کھلی رمزِ نہاں میری

نہیں تھا قصۂ مجنوں کوئی یہ داستاں میری

عجب دید تماشہ ہے کہ نظروں میں بیاں سب ہو

دمِ نظارہ حیرت سے بنیں آنکھیں زباں میری

تعالیٰ اللہ مری قسمت شہیدِ نازِ حضرت ہوں

عروسِ مہر میّت پر ہے کیسی گلفشاں میری

بوقت نزع آ جائے نبی کے سامنے صورت

الٰہی آبرو رہ جائے وقت امتحاں میری

میں دل ہی دل میں روتا ہوں یہی سچی ندامت ہے

نہیں گوش اصم سے بھی ذرا اونچی فغاں میری

عجب داغِ غمِ فرقت نے دل میں گل کھلائے ہیں

بہارِ بے خزاں سے کیوں نہ ہو بڑھ کر خزاں میری

وہاں بھی کام بن جائے خدا را آپ کے منہ سے

بنے گی دشمن جانی جہاں خود ہی زباں میری

نکالوں کس طرح دل سے میں اپنی حسرتیں بیدلؔ

میرے تابوت ارماں پر یہی ہیں نوحہ خواں میری