زلفِ پُر خم کھینچ کر شمشیر کھینچ

زلفِ پُر خم کھینچ کر شمشیر کھینچ

دل بھی کھنچ آئے گا تو زنجیر کھینچ

اور ترکش سے نہ تو اب تیر کھینچ

ذبح کر دے گردنِ نخچیر کھینچ

کیا مصور سے کھنچے تری ادا

آئینہ میں عکس کی تصویر کھینچ

کھینچ کر لا عرش سے تاثیر کو

یوں نہ اے دل نالۂ شبگیر کھینچ

آزما پہلے اد ا کو ناز کو

کون کہتا ہے ابھی شمشیر کھینچ

مجھ کو بندِ زلف ہے کافی ترا

پاؤں سے ظالم میرے زنجیر کھینچ

دل جگر پہلو میں دونوں چھِد گیے

دیکھ کر بڑھ کر سنبھل کر تیر کھینچ

کہہ دے قاصد جلد جو اس نے کہا

یوں نہ آہیں تو دمِ تقریر کھینچ

دل بھر آیا دیکھ کر خطِ جبیں

اس پہ خط اے کاتبِ تقدیر کھینچ

اس بتِ بد خو سے کیا چشمِ وفا

تو بھی دل اے بیدلؔ دلگیر کھینچ