نہیں ملے گا یہاں کچھ بھی اب زیاں کے سوا

نہیں ملے گا یہاں کچھ بھی اب زیاں کے سوا

ہمارے پاس ہے کیا اور دشتِ جاں کے سوا

ہم اٹھ تو جائیں تری بزم سے ابھی لیکن

ٹھکانا ہو بھی تو کوئی ترے جہاں کے سوا

ہے آخری یہی جائے پناہِ دل زدَگاں

ہمارے پاس بچا کیا ہے رفتگاں کے سوا

ہم اپنے طور پر دیکھ آئے انتہا اس کی

حدِ یقیں نہیں کچھ بھی حدِ گماں کے سوا

ہوائے دشت خبر ہے مرے رفیقوں کی

نشان کوئی نہیں پاؤں کے نشاں کے سوا

کچھ اور ہے بھی اثاثے میں وارنے کو ندیمؔ

ہم ان کی نذر کریں کیا متاعِ جاں کے سوا