تمام رات جلے ہیں اگر چہ پروانے

تمام رات جلے ہیں اگر چہ پروانے

جو دل پہ شمع کے گزری ہے کوئی کیا جانے

ہمارے بعد بھی آتے رہیں گے اہلِ جنوں

ہمارے بعد بسیں گے مگر نہ ویرانے

حریمِ دل نے تو رکھا ہے راز سر بستہ

مگر یہ آنکھ سناتی رہی ہے افسانے

میں اپنے حجرۂ جاں میں سکوں سے بیٹھا تھا

یہ کیسی چاپ ابھر آئی دل کو دھڑکانے

نمازِ عشق میں وہ محویت کا عالم تھا

خیالِ یار بھی آیا نہ ہم کو بھٹکانے

عجب نہیں کہ اجڑ جائے میری بستی بھی

ندیمؔ اب یہاں رہتے نہیں ہیں دیوانے