takHta-e-mashq-e-jafa Thahra to ye dil Thahra

takHta-e-mashq-e-jafā Thahrā to ye dil Thahrā

chuur jo shīsha huā un ke muqābil Thahrā

jafā se tum na baaz aao to badleñ ham vafā se kyuuñ

tumheñ vo kaam aa.egā hameñ ye kaam aa.egā

sharārat naaz ġhamza sādgī shoḳhī adā ḳhūbī

mujhe ik shān-e-jalvat tuune ḳhalvat meñ dikhā.ī hai

ḳhirman-e-hastī jalāyā Dāl-dī jis par nazar

nāz-o-gamze meñ bhī uske barq kī tāsīr hai

kahnā ye nāma-bar ki thī hasrat-e-dīd mar ke bhī

āñkheñ khulī hī rah ga.iiñ aap ke intizār meñ

saḳht jaañ meñ aur mire qātil kā nāzuk dast-e-nāz

haaye us par dhaar muḌ kar rah ga.ī shamshīr kī

daad detā huuñ dil-e-zaḳhmī meñ tīr-andāz ko

tiir to niklā magar paikāñ judā hotā nahīñ

din-rāt zulf-o-ruḳh kā tasavvur hai aur ham

bas mubtalā haiñ gardish-e-lail-o-nahār meñ

guzārī ik umr sar paTak kar tumhāre dar par b-āh-o-zārī

magar tumhāre na sañg-e-dar ko ḳhayāl aayā mirī jabīñ kā

sharāb-e-mohabbat kī lazzat na pūchho

piye jā rahā huuñ magar tishnagī hai

takHta-e-mashq-e-jafa Thahra to ye dil Thahra

chur jo shisha hua un ke muqabil Thahra

jafa se tum na baz aao to badlen hum wafa se kyun

tumhein wo kaam aaega hamein ye kaam aaega

shararat naz ghamza sadgi shoKHi ada KHubi

mujhe ek shan-e-jalwat tune KHalwat mein dikhai hai

KHirman-e-hasti jalaya Dal-di jis par nazar

naz-o-gamze mein bhi uske barq ki tasir hai

kahna ye nama-bar ki thi hasrat-e-did mar ke bhi

aankhen khuli hi rah gain aap ke intizar mein

saKHt jaan mein aur mere qatil ka nazuk dast-e-naz

haye us par dhaar muD kar rah gai shamshir ki

dad deta hun dil-e-zaKHmi mein tir-andaz ko

tir to nikla magar paikan juda hota nahin

din-raat zulf-o-ruKH ka tasawwur hai aur hum

bas mubtala hain gardish-e-lail-o-nahaar mein

guzari ek umr sar paTak kar tumhaare dar par b-ah-o-zari

magar tumhaare na sang-e-dar ko KHayal aaya meri jabin ka

sharab-e-mohabbat ki lazzat na puchho

piye ja raha hun magar tishnagi hai