tulu’-e-shams-o-qamar se numud-e-jalwa-e-dost

tulū’-e-shams-o-qamar se numūd-e-jalva-e-dost

ik e'timād-e-nazar ke sivā kuchh aur nahīñ

na rakh falak se tavaqqo' ki us kī jeb meñ dost

matā’-e-shām-o-sahar ke sivā kuchh aur nahīñ

na ho malūl sitam-hā-e-āsmāñ se na ho

nasīb shām-o-sahar ke sivā kuchh aur nahīñ

nujūm-o-māh pa.e āftāb-e-’ālam-e-tāb

ġhubār-e-rāhguzar ke sivā kuchh aur nahīñ

vahāñ hazār karishme hazār ā.īne

yahāñ bas ek nazar ke sivā kuchh aur nahīñ

taḌap rahā huuñ ki dil ko sukūñ-pasand kahūñ

hayāt us ek hunar ke sivā kuchh aur nahīñ

'adīb' ne bhī kahāñ āshiyāñ banāyā hai

jahāñ ki barq-o-sharar ke sivā kuchh aur nahīñ

tulu’-e-shams-o-qamar se numud-e-jalwa-e-dost

ek e'timad-e-nazar ke siwa kuchh aur nahin

na rakh falak se tawaqqo' ki us ki jeb mein dost

mata’-e-sham-o-sahar ke siwa kuchh aur nahin

na ho malul sitam-ha-e-asman se na ho

nasib sham-o-sahar ke siwa kuchh aur nahin

nujum-o-mah pae aaftab-e-’alam-e-tab

ghubar-e-rahguzar ke siwa kuchh aur nahin

wahan hazar karishme hazar aaine

yahan bas ek nazar ke siwa kuchh aur nahin

taDap raha hun ki dil ko sukun-pasand kahun

hayat us ek hunar ke siwa kuchh aur nahin

'adib' ne bhi kahan aashiyan banaya hai

jahan ki barq-o-sharar ke siwa kuchh aur nahin