طلوعِ شمس و قمر سے نمود جلوۂ دوست

طلوعِ شمس و قمر سے نمود جلوۂ دوست

اک اعتماد نظر کے سوا کچھ اور نہیں

نہ رکھ فلک سے توقع کہ اس کی جیب میں دوست

متاعِ شام و سحر کے سوا کچھ اور نہیں

نہ ہو ملول ستم ہائے آسماں سے نہ ہو

نصیب شام و سحر کے سوا کچھ اور نہیں

نجوم و ماہ پئے آفتاب عالم تاب

غبارِ راہ گزر کے سوا کچھ اور نہیں

وہاں ہزار کرشمے ہزار آئینے

یہاں بس ایک نظر کے سوا کچھ اور نہیں

تڑپ رہا ہوں کہ دل کو سکوں پسند کہوں

حیات اس ایک ہنر کے سوا کچھ اور نہیں

ادیبؔ نے بھی کہاں آشیاں بنایا ہے

جہاں کہ برق و شرر کے سوا کچھ اور نہیں