shikast-e-KHatir-e-ashiq mein hai rang unki mahfil ka

shikast-e-ḳhātir-e-'āshiq meñ hai rañg un kī mahfil kā

usī tasvīr par hai ā.īna TuuTe hue dil kā

tumheñ aañsū to samjhūñ maiñ ki manzil 'ishq kī aa.ī

chalā karatā hai ḳhushkī se pata dariyā ke sāhil kā

nigāheñ to bahut kuchh kar chukīñ milne kī tadbīreñ

magar ab kaam baaqī rah gayā hai jazba-e-dil kā

har ik meñ kuchh na kuchh niklī burā.ī jab nazar Daalī

hasīnoñ meñ na haath aayā koī un ke muqābil kā

na thī aisī to haibat-nāk sūrat dād-kHvāhoñ kī

ye āḳhir kyuuñ zarā sā muñh nikal aayā hai qātil kā

ḳhudā hī jāntā hai dekhne vāloñ ne kyā dekhā

gayā jo un kī mahfil meñ huā vo un kī mahfil kā

subūt-e-be-gunāhī aur kyā darkār hai 'afsar'

butoñ meñ dāman chāhiye shamshīr-e-qātil kā

shikast-e-KHatir-e-'ashiq mein hai rang un ki mahfil ka

usi taswir par hai aaina TuTe hue dil ka

tumhein aansu to samjhun main ki manzil 'ishq ki aai

chala karata hai KHushki se pata dariya ke sahil ka

nigahen to bahut kuchh kar chukin milne ki tadbiren

magar ab kaam baqi rah gaya hai jazba-e-dil ka

har ek mein kuchh na kuchh nikli burai jab nazar Dali

hasinon mein na hath aaya koi un ke muqabil ka

na thi aisi to haibat-nak surat dad-kHwahon ki

ye aaKHir kyun zara sa munh nikal aaya hai qatil ka

KHuda hi jaanta hai dekhne walon ne kya dekha

gaya jo un ki mahfil mein hua wo un ki mahfil ka

subut-e-be-gunahi aur kya darkar hai 'afsar'

buton mein daman chahiye shamshir-e-qatil ka