مکیں جس میں ہو نہ ہو پھر اس مکاں سے خاک حاصل ہے

مکیں جس میں ہو نہ ہو پھر اس مکاں سے خاک حاصل ہے

تری الفت سے جو خالی ہے وہ دل بھی کوئی دل ہے

نہیں گو آج آرائش سےمہلت آپ کو لیکن

ہماری داستانِ غم کبھی سننے کےقابل ہے

تیرے جور و جفا سے ہم نے جب دیکھا یہی دیکھا

کوئی آفت رسیدہ ہے ستم دیدہ کوئی دل ہے

نگہ سے جو وہاں دیکھا زباں سے کہہ نہیں سکتا

اگر پوچھے کوئی مجھ سے کہ کیسا رنگ محفل ہے

عدد کی دشمنی جس میں نہیں وہ میرا سینہ ہے

نہیں ہے دوست کہ جس میں جگہ وہ آپ کا دل ہے

سبب سے رعب کے کرتے ہیں باتیں سب اشاروں میں

تمہاری بزم گویا آج کل گونگوں کی محفل ہے

کہاں ہیں شوخیاں ان کی ہٹا دیں اس گھڑی افضلؔ

حیا کمبخت کا پردہ شب وصلت جو حائل ہے