دونوں جانب جوشِ الفت کا اثر ہونے لگا

دونوں جانب جوشِ الفت کا اثر ہونے لگا

مجھ کو غش آنے لگے وہ بیخبر ہونے لگا

جلوہ گہہ میں دیکھ لیں جی بھر کے آؤ بھی کہیں

اب تو آنکھوں سے تقاضائے نظر ہونے لگا

اس تجاہل نے تو ہم کو اور بھی تڑپا دیا

پوچھتا ہے یار کیوں دردِ جگر ہونے لگا

وائے بیدردی مٹایا ہی فلک نے اس گھڑی

جب ہماری آہ کا کچھ کچھ اثر ہونے لگا

کچھ تو اس پہلو سے قاتل پر کھلے گا حالِ دل

کیا ہوا خوں آرزؤوں کا اگر ہونے لگا

دل سے تم ارمان بن بن کر نکل جاتے ہو آپ

اور کہتے ہو کہ نالہ بے اثر ہونے لگا

رسمِ الفت سے ہمیں احسانؔ وہ ایذا ملی

اعتبارِ روشنی ہر دوست پر ہونے لگا