یا رب جو میرا درد سنے وہ دعا کرے

یا رب جو میرا درد سنے وہ دعا کرے

نالوں میں اس کے اب اثر اے خدا کرے

دشمن سے حال غیر مرا سن کے کہتے ہیں

موت آئے مر بھی جائے کہیں وہ خدا کرے

کہتا ہوں ٹھوکروں سے جلا لو تو کہتے ہیں

اب کون تری قبر پہ محشر بپا کرے

ظالم کہاں کی رسم کہاں کا چلن ہے یہ

میں تو وفا پہ جان دوں اور تو جفا کرے

تم آؤ یا اجل کو یہاں جلد بھیج دو

تنہا شبِ فراق کوئی رہ کے کیا کرے

بگڑی ہوئی بنانے کی تدبیریں ہیں بہت

قسمت ہی جب بری ہو تو پھر کوئی کیا کرے

زلفیں سنوارنے کے سوا کچھ خبر نہیں

ان کی بلا سے کوئی مرے یا جیا کرے

اب انتظار وصل کے بھی دن گزر چکے

کب تک کوئی فراق کے صدمے سہا کرے

اخترؔ مرا غبار بھی خاک شفا بنے

مر جاؤں کربلا میں میں جا کر خدا کرے