جو ان کے نقشِ پا کا راہِ الفت میں نشاں ملتا

جو ان کے نقشِ پا کا راہِ الفت میں نشاں ملتا

تو پھر دیر و حرم کیا ہیں خدائے دوجہاں ملتا

پہنچ سکتے نہ منزل تک تلاشِ معرفت والے

اگر ان کو نہ تم سا کوئی میرِ کارواں ملتا

جو آجاتے کبھی بھولے سے بھی بہرِ عیادت وہ

یقیناً کچھ نہ کچھ تو چارۂ دردِ نہاں ملتا

اب اُس منزل پہ پہنچا دے تو اے جوشِ جنوں مجھ کو

جہاں پر ہم نشیں ملتا نہ کوئی مہرباں ملتا

ابدتک باخبر رہتا میں ہر اک رازِ فطرت سے

ترے ہاتھوں سے گر اک جام اے پیرِ مغاں ملتا

کبھی غیروں سے رودادِ الم میری سنی تو کیا

مسلسل مجھ سے وہ سنتے تو لطفِ داستاں ملتا

نہ جانے حشر کیا ہوتا خرد کا ہوش کا دل کا

کبھی وہ شوخ بے پردہ جو مجھ سے ناگہاں ملتا

ہماری جبہِ سائی کا یہ ہوتا ماحصل اخترؔ

جھکاتے سر جہاں پر بھی انہیں کا آستاں ملتا