ہوگیا سارا زمانہ جب کہ ہم سے بدگماں

ہوگیا سارا زمانہ جب کہ ہم سے بدگماں

ہورہے ہو تم بھی ایسے وقت میں دامن کشاں

وسعتِ عالم میں وہ ہے ان کا سنگِ آستاں

حور و غلمان و ملائک ہیں جہاں سجدہ کُناں

حالِ دل جس کو سناتے کہتے دل کی داستاں

کاش مل جاتا ہمیں بھی کوئی ایسا رازداں

اٹھ گئے آنکھوں سے پردے راز ہستی کھل گیا

جام جس کو تیرے ہاتھوں مل گیا پیرِ مغاں

چھوڑ دو شکوہ شکایت دور کردو سب ملال

چار دن کی زندگی ہے پھر کہاں تم ہم کہاں

اب چمن میں کیا ہوانجامِ نشیمن کیا خبر

ہے خفا گل چیں بھی ہم سے باغباں بھی بدگماں

راہِ الفت میں بقیدِ ہوش جس نے جان دی

در حقیقت مل گئی اس کو حیاتِ جاوداں

آشیاں جلتا ہے جل جائے نہیں پروا مگر

زد میں شعلوں کی نہ آجائے یہ سارا گلستاں

دل پہ ان کے کچھ اثر ہوتا مجھے بھی کچھ سکوں

میرے منہ سے جو وہ سنتے میرے غم کی داستاں

سوچتے رہتے تھے ہم اُن سے کہیں گے حالِ دل

سامنے وہ جب بھی آئے ہوگئے ہم بے زباں

روزِ اول سے ہے میرِ کارواں منزل شناس

ہو نہیں سکتا کبھی گم گشتہ میرِکارواں

جبہ سائی کا مرے اتنا تو ہوتا ماحصل

جس جگہ جھکتی جبیں ہوتا اسی کا آستاں

ہوگئی معدوم خاکِ دل مٹایا اس طرح

پھر بھی کہتے ہیں کہ باقی ہیں ابھی کچھ امتحاں

کر سکے اخترؔ فراہم کچھ نہ ہم زادِ سفر

زندگی کے قیمتی لمحے ہوئے سب رائیگاں