کب تک فراق یار کے صدمے سہا کرے

کب تک فراق یار کے صدمے سہا کرے

ناچار ہوئے زہر نہ کھائے تو کیا کرے

میں جس کے کان غیر کی باتوں کے آشنا

ممکن نہیں کہ وہ کبھی میرا کہا کرے

فرصت تمام رات نہیں کنگھی چوٹی سے

پرسش ہمارے حال کی اس کی بلا کرے

اس کو نہیں کچھ ایسی غرض ہو کوئی تباہ

ہے اذن عام ظلم کی شدت ہوا کرے

دیکھے جو حسنِ یار محبت کی آنکھ سے

سکتے سے آئینہ کو نہ فرصت ملا کرے

بلبل بھرے جو تیری ہوا خواہیوں کا دم

گلشن میں روز تازہ شگوفہ کھلا کرے

مجھ پر تو بے قصور کھلی ہے زبانِ یار

دشمن ہی منھ کی کھائے کسی دن خدا کرے

اندھیر آئینہ کی نظر میں ہو دوجہاں

زلفیں پریشان گر وہ بتِ خود نما کرے

مدت سے بھر رہا ہوں ہوا خواہیوں کا دم

کچھ کام میرا آج تو پیکِ صبا کرے

مقبول وہ گھڑی بھی ہو یا رب شب وصال

ہم روٹھیں وہ منائیں عدو بدعا کرے

رہتا ہے میرے پہلو میں ہر دم وہ شعلہ رو

اخترؔ حسد کی آگ سے دشمن جلا کرے