jala be-jurm hun aa kar bata de majra yara

jalā be-jurm huuñ aa kar batā de mājrā yaarā

miTā huuñ be-gunah zālim sazā bhī to batā yaarā

huuñ maiñ zinda magar mujh meñ nahīñ koī baqā yaarā

agar dekhā nahīñ aisā to ā-kar dekhnā yaarā

nā dekhā jis ne yūsuf ko vo dekhe ashk-e-yā’qūbī

mohabbat kī haqīqat kā use de ab patā yaarā

tujhe hairat hai kyuuñ mere bigaḌte haal par hamdam

zarā kuchh der to chehra dikhā phir aazmā yaarā

zamāna mere marqad par hañse parvā nahīñ mujh ko

tirī dahlīz par honā hai madfan rahnumā yaarā

jo maiñ bekas huā tanhā huā sab chhoḌkar guzre

tirī chaukhaT ke saa.e meñ mile rāhat zarā yaarā

rahī duniyā meñ rusvā.ī to koī ġham nahīñ lekin

tirī mastī meñ rusvā kar dikhā de intihā yaarā

mirī āñkhoñ meñ ashkoñ kā samundar maujzan kyuuñ hai

mirī qismat meñ hai kyā kuchh kabhī to paḌh zarā yaarā

maiñ jis mahfil meñ pahuñchā huuñ vahāñ kuchh bhī nahīñ baaqī

yahāñ sab kuchh tirī mastī meñ khoyā jā rahā yaarā

ye duniyā hai sarāb-e-dard is meñ kuchh haqīqat kyā

mujhe to ek pal de de mujhe bhī aazmā yaarā

bahak kar be-ḳhudī meñ bol uThā darbār meñ ‘naushā’

ye kyā 'ālam hai kaisā rañg hai kyā mājrā yaarā

jala be-jurm hun aa kar bata de majra yara

miTa hun be-gunah zalim saza bhi to bata yara

hun main zinda magar mujh mein nahin koi baqa yara

agar dekha nahin aisa to aa-kar dekhna yara

na dekha jis ne yusuf ko wo dekhe ashk-e-ya’qubi

mohabbat ki haqiqat ka use de ab pata yara

tujhe hairat hai kyun mere bigaDte haal par hamdam

zara kuchh der to chehra dikha phir aazma yara

zamana mere marqad par hanse parwa nahin mujh ko

teri dahliz par hona hai madfan rahnuma yara

jo main bekas hua tanha hua sab chhoDkar guzre

teri chaukhaT ke sae mein mile rahat zara yara

rahi duniya mein ruswai to koi gham nahin lekin

teri masti mein ruswa kar dikha de intiha yara

meri aankhon mein ashkon ka samundar maujzan kyun hai

meri qismat mein hai kya kuchh kabhi to paDh zara yara

main jis mahfil mein pahuncha hun wahan kuchh bhi nahin baqi

yahan sab kuchh teri masti mein khoya ja raha yara

ye duniya hai sarab-e-dard is mein kuchh haqiqat kya

mujhe to ek pal de de mujhe bhi aazma yara

bahak kar be-KHudi mein bol uTha darbar mein ‘nausha’

ye kya 'alam hai kaisa rang hai kya majra yara